Zhonatan ná Filisi shiinbii kàshige
14
Canŋka,
Soli jyaŋi Zhonatan à jwo u kàshikwɔnyaayi lwófooŋʼá:
«Filisi shiinbii kàshikwɔɔnbii pi ɲyɛ fo ŋke kàmpanŋke sanŋke na ke,
ta ma wuu a sì pi tatɛɛnge e.»
Ŋka u ɲyɛ a yi jwo u tuŋʼá mɛ.
2 Lirʼà Soli ta Gibeya kànhe tɛgɛni na gerenadicige taan Migurɔn e.
Kàshikwɔɔnbii pi mpyi ná u e ke,
pire mpyi a nàmbaa ŋkwuu baani (600) kwɔ̀.
3 Akiya u mpyi Kafooŋi sáragawwuŋi Silo kànhe e ke,
Efodi vàanntinŋɛ mpyi uru u à le.
Akiya mpyi Ikabɔdi yyahafooŋi Akitubu jya.
Akitubu tuŋi u mpyi Fineyasi.
Fineyasi tuŋi u mpyi Kafooŋi sáragawwuŋi Eli.
Uru mpyi a tɛ̀ɛn Silo kànhe e.
Sùpyire ɲyɛ a mpyi a cè na Zhonatan à kàre mɛ.
4 Kuni i Zhonatan la mpyi si ntòro sʼa wà Filisi shiinbii tatɛɛnge e ke,
lire mpyi a tòro kafatɔɔnyɔ shuunni shwɔhɔlʼe.
Kuru kafaage kà mɛgɛ mpyi Bozɛni,
ku sanŋke mɛgɛ sí ɲyɛ Sɛne.
5 Kafaage kà mpyi suumɔ kùlu yyére Mikimasi kànhe yyetiimpe na,
ku sanŋke sí ɲyɛ wwòro kùlu yyéreŋi i,
Geba kànhe yyetiimpe na.
6 Ka Zhonatan si u kàshikwɔnyaayi lwófooŋi pyi:
«Ta ma wuu a sì mpii niŋkwɔnmbaabii tatɛɛnge e.
Lʼe,
Kafooŋi sí ɲɛɛ wuu tɛ̀gɛ,
ɲaha kurugo yɛ,
wuu à ɲyaha yo,
wuu à cyɛ́rɛ yo,
li sì u jà si wuu pyi wuu jà pi na mɛ.»
7 Ka u kàshikwɔnyaayi lwófooŋi si jwo:
«Nde lʼà sàa táan mu à ke,
lire pyi.
Mu aha jyè wyii maha wyilʼe ke,
mii ɲyɛ mu fye e.»
8 Ka Zhonatan si jwo:
«Wuu a si pi fye e wuu u sà wuye cyêe pi na.
9 Pi aha wuu pyi:
“Yii yyére wani,
wuu sí zhà yii mɛɛ na,”
lire e ke,
wuu sàha sì zhà pi fye e mɛ,
wuu sí n-yyére wuu tayyerege e.
10 Ŋka,
pi aha jwo:
“Yii dùgo naha wuu fye e,”
lire e ke,
wuu sí n-dùgo pi fye e.
Lire sí n-pyi tàafye si li cyêe na Kafooŋi sí pi le wuu cye e.»
11 Ka pi mú shuunniŋi si ŋkàrʼa sà piye cyêe Filisi shiinbii na pi tatɛɛnge e.
Ka pire si jwo:
«Eburu shiinbii pi mpii pi à fworo pi taŋwɔhɔyi i,
wyiyʼe.»
12 Ka kuru cyage kàshikwɔɔnbii si Zhonatan ná u kàshikwɔnyaayi lwófooŋi pyi:
«Yii dùgo naha,
wuu sí kani là pyiŋkanna cyêe yii na.»
Ka Zhonatan si u kàshikwɔnyaayi lwófooŋi pyi:
«Taha na fye e,
Kafooŋi à pi le Izirayɛli shiinbii cye e.»
13 Ka Zhonatan si cyeyi ná tooyi tɛ̀gʼa uye tɛ̀gɛ na dùru na wà,
u kàshikwɔnyaayi lwófooŋi sí ɲyɛ u fye e.
Ka pi i ŋkàrʼa sà ɲcwo Filisi shiinbii na.
Zhonatan mpyi na pi bwùun na ɲcyáan,
u kàshikwɔnyaayi lwófooŋi si i pi bîiŋi.
14 Kuru kàshige niɲcyiige e,
Zhonatan ná u kàshikwɔnyaayi lwófooŋʼà shiin beɲjaaga fiige bò tafabilere e.
15 Ka fyagare si sàa jyè Filisi shiinbii kàshikwɔɔnbii kuruŋke ná ku kwùumpe sùpyire puni i.
Kakyampyi kàshikwɔɔnbii ná saɲcwɔnsigibii puni mpyi a sàa fyá.
Ɲìŋke mú a cyɛ̂ɛnnɛ mà là bâra pi fyagare na.
Kile fyè u mpyi tire fyagare.
16 Soli saɲcwɔnsigibii pi mpyi Gibeya e Bezhamɛ kùluni i ke,
ka pire si wílʼa Filisi shiinbii niɲyahamii ɲya pi i fî na ɲcaali na wà kàmpanɲyi puni na.
17 Ka Soli si u fyèɲwɔhɔ shiinbii pyi:
«Yii sùpyire tɔ̀rɔ,
wà ká nta u à fô,
wuu u ɲcè.»
Pi à sùpyire tɔ̀rɔ ke,
ka li i mpa nta na Zhonatan ná u kàshikwɔnyaayi lwófooŋʼà fô.
18 Ka Soli si Akiya pyi:
«Kile tunmbyaare mbwùuni file naha.»
Lirʼà ta,
kuru canŋke na,
tunmbyaare mbwùuni mpyi Izirayɛli shiinbii tatɛɛnge e.
19 Mà Soli yaha u u yu ná sáragawwuŋi i,
lirʼà ta ɲyahaŋguruŋi na nâare Filisi shiinbii tatɛɛnge e.
Ka Soli si sáragawwuŋi pyi:
«Ma cyɛge núruŋɔ kàntugo.»
20 Ka Soli ná u kàshikwɔɔnbii puni si piye bínni,
maa yîrʼa kàre kàshige mɛɛ na.
Ka pi i sà Filisi shiinbii ta pi à wùrugo piye e na bùu ná kàshikwɔnŋwɔhigilʼe,
ka ɲyahaŋguruŋi si sàa pêe.
21 Eburu shiinbii pi mpyi a piye kan Filisi shiinbilʼá tèemɔni i,
maa báare pi á,
maa kàshige kwùun pi á ke,
ka pire si ŋkɛ̂ɛnŋʼa bâra Izirayɛli shiinbii na,
pire mpiimu pi mpyi ná Soli ná Zhonatan e ke.
22 Izirayɛli shiinbii puni pi mpyi a sà ŋwɔhɔ Efirayimu ɲaŋkuluni i ke,
pirʼà lógo na Filisi shiinbii wa na fî ke,
ka pire mú si fworʼa bâra kàshikwɔɔnbii na,
na pi kɔ̀re.
23 Lire pyiŋkanni na Kafooŋi à Izirayɛli shiinbii pyi pi à jà pi na kuru canŋke.
Ka pi i kàshige kwɔ̀n fo mà sà ntòro Bɛti-Avɛni taan.
Izirayɛli kàshikwɔɔnbilʼà Zhonatan múnaani shwɔ
24 Izirayɛli shiinbii mpyi a sàa kànha kuru canŋke,
ɲaha kurugo yɛ,
Soli mpyi a laŋaŋa jwumɔ jwo sùpyirʼá na:
«Shin maha shin ká lyî mà jwo yàkoŋke ku nɔ,
mà jwo mii i nàvunŋɔ kwɔ̀ na zàmpɛɛnbii na ke,
urufolʼà láŋa.»
Lire kurugo,
wà ɲyɛ a ɲɛnʼa yalyige lyî mɛ.
25 Ka pi puni si ŋkàrʼa sà nɔ tahe kà na,
mà sà sɛɛre ta ti i fwu ɲìŋke na.
26 Pi à jyè tahe e mà sɛɛre ɲya ti i fwu,
ŋka wà ɲyɛ a ɲɛnʼa tà lwɔ́ a le u ɲwɔge e mɛ,
ɲaha kurugo yɛ,
pi puni mpyi na fyáge laŋaŋke yyaha na.
27 Lirʼà ta,
Zhonatan ɲyɛ a mpyi a u tuŋi laŋaŋke mpyiŋi kyaa cè mɛ.
Kàbiini li mpyi u cye e ke,
ka u u lire múnaani le sɛɛre e,
mà tɛ̀gʼa tà lwɔ́ a le u ɲwɔge e mà lyî,
ka u yyahe si ɲcwó.
28 Ka kàshikwɔnŋi wà si u pyi:
«Mu tuŋʼà laŋaŋa jwumɔ jwo,
na ŋgemu ká lyî niɲjaa mà ta canŋaɲyiini sàha ɲcwo mɛ,
na urufolʼà láŋa.»
Lire lʼà sùpyire puni pyi tʼà kànha amɛ.
29 Ka Zhonatan si u pyi:
«Mii tuŋʼà sùpyire kànha.
Mii à sɛɛre tà lyî ke,
mu ɲyɛ a mii yyahe ɲya kʼà cwó mà?
30 Kàshikwɔɔnbilʼà yaayi ɲjemu kuu kàshige cyage e ke,
kampyi pi mpyi a yire yà lyî,
pi mpyi na sí n-jà Filisi shiinbii na si ntòro mpe na.»
31 Kuru canŋke,
Izirayɛli shiinbilʼà Filisi shiinbii tùn mà lwɔ́ Mikimasi kànhe na,
mà sà nɔ fo Ayalɔn kànhe na.
Sùpyire mpyi a sàa kànha.
32 Ka pi i ŋkà a jyè kàshige yaayi niŋkuuyi i,
maa mpàabii ná nìiyi ná nunaare tà cû mà kɔɔngɔ na ŋkyàa ná ti sìshange e.
33 Ka wà si sà yi jwo Soli á:
«Sùpyire wa na Kafooŋi kafuun pyi.
Pi wa na kyaare kyàa ná ti sìshange e.»
Ka Soli si jwo:
«Yii à ɲwɔmɛɛyahara pyi.
Yii kafaabwɔhe kà kùuŋkulʼa file naha na na numɛ.»
34 Ka u u núrʼa jwo:
«Yii ɲaarʼa yi jwo sùpyirʼá,
na pi shin maha shin u a ma ná u nùŋi lire ɲyɛ mɛ,
u mpàŋi i,
u u mpa u kɔɔn naha.
Lire ká mpyi,
yii sí n-lyî,
yii sàha sì kyaare ná ti sìshange lyî si Kafooŋi kafuun pyi mɛ.»
Ka sùpyire puni si mpa ná pi yatɔɔre e kuru canŋke numpilage e,
maa mpa ti kɔɔngɔ kuru kafaage na.
35 Ka Soli si sáraya tawwugo yaa Kafooŋi á.
Kuru u à yaa u sárayi tawwuge niɲcyiige Kafooŋi á.
36 Lire kàntugo,
ka Soli si jwo:
«Wuu tîge Filisi shiinbii fye e ŋke numpilage e,
wuu u sà pi tùn,
wuu u pi cyeyaayi kuu fo wuu sà ɲyɛ̀ge múgo.
Wuu àha zìi shin niŋkin yaha bòmbaa mɛ.»
Ka sùpyire si jwo:
«Nde lʼà táan mu á ke,
lire pyi.»
Ka sáragawwuŋi si jwo:
«Wuu fyânha a Kile yíbe naha.»
37 Ka Soli si Kile yíbe:
«Si ntîge Filisi shiinbii fye e ŋke numpilage e la?
Mu sí pi le Izirayɛli shiinbii cye e la?»
Ŋka Kile ɲyɛ a u ɲwɔ shwɔ kuru canŋke mɛ.
38 Ka Soli si jwo:
«Yyaha yyére shiinbii puni,
yii file naha yii i yi yyaha cya,
kapiini lʼà pyi niɲjaa ke,
yii i li ɲùŋke cya a cè.
39 Kafooŋi u ɲyɛ ɲyii na,
maa Izirayɛli shiinbii shwuu ke,
mii sí n-kâa uru mɛge na,
li mɛɛ ká nta mii jyaŋi Zhonatan u à nde kapiini pyi,
u sí n-bò.»
Ŋka sùpya ɲyɛ a u ɲwɔ shwɔ mɛ.
40 Ka u u Izirayɛli shiinbii puni pyi:
«Yii yyére kàmpanŋke kà na,
mii ná na jyaŋi Zhonatan sí n-yyére kàmpanŋke sanŋke na.»
Ka sùpyire si Soli pyi:
«Nde lʼà táan mu á ke,
lire pyi.»
41 Ka Soli si jwo Kafooŋi á:
«Izirayɛli u Kileŋi,
ɲaha kurugo mu ɲyɛ a ma báarapyiŋi ɲwɔ shwɔ niɲjaa mà yɛ?
Ká mpyi mii u à kapiini pyi,
lire ɲyɛ mɛ,
kampyi mii jyaŋi Zhonatan u à li pyi,
na ɲwɔ shwɔ ná Urimuŋi* i.
Ŋka,
kampyi Izirayɛli shiinbii pi à kapiini pyi,
na ɲwɔ shwɔ ná Tumimuŋi* i.»
Ɲyɛ ka Kile si Soli ná Zhonatan cyêe,
ka kàshikwɔɔnbii sanmpii ɲùŋɔ si wwû.
42 Ka Soli si jwo na pi ŋkyaanlwooni pyi uru ná u jyaŋi Zhonatan shwɔhɔlʼe,
ka Zhonatan si mpa ɲcyêe.
43 Ka Soli si Zhonatan pyi:
«Nde mu à pyi ke,
li jwo na á.»
Ka Zhonatan si jwo:
«Mii à na cyɛge kàbiini múnaani tɛ̀gʼa sɛɛre tà lwɔ́ a lyî.
Mii à tɛ̀ɛn na mbòŋi taan.»
44 Ka Soli si jwo:
«Zhonatan,
ná mu ɲyɛ a bò mɛ,
Kile kà na yaha mɛ.»
45 Ka sùpyire si Soli pyi:
«Zhonatan u à nte sítaare nimbwɔɔre kan Izirayɛli shiinbilʼá ke,
uru u sí n-bò la?
Lire sì n-jà mpyi mɛ.
Kafooŋi ɲyii wuŋi mɛge na,
wuu sì ɲɛɛ u ɲùɲjuŋke kà niŋkin ku ŋkò a cwo mɛ.
Ɲaha kurugo yɛ,
Kile ntɛ̀gɛŋi cye kurugo u à lire pyi kuru canŋke.»
Lire pyiŋkanni na sùpyirʼà Zhonatan pyi u à shwɔ kwùŋi na.
46 Ɲyɛ ka Soli si Filisi shiinbii ŋkɔ̀rɔŋi ɲwɔ yyéeŋɛ,
ka Filisi shiinbii si ŋkàre pi kìni i.
Soli à supyishiŋi wà tùn maa jà u na
47 Soli tiŋɛŋkwooni kàntugo mà pyi Izirayɛli shiinbii saanŋi,
u à u kwùumpe zàmpɛɛnbii puni tùn.
Pire pi mpyi,
Muwabu shiinbii ná Amoni shiinbii ná Edɔmu shiinbii ná Soba saanbii ná Filisi shiinbii.
U aha yyaha kan cyaga maha cyagʼá ke,
u mpyi maha mpyi javoo.
48 U à u ntanhaŋi cyêe Amalɛki shiinbii tùnŋi cye kurugo,
maa Izirayɛli shiinbii shwɔ pi yaayi kuufeebii na.
49 Soli jyaabii pi mpyi:
Zhonatan ná Isivi ná Malikisuwa.
U pworoŋi niɲjyeŋi mɛgɛ mpyi Merabu,
u sanŋi mɛgɛ sí ɲyɛ Mikali.
50 Soli cwoŋi mɛgɛ mpyi Ayinoyamu.
Uru na mpyi Ayimasi pworo.
U kàshikwɔɔnbii yyaha yyére shinŋi mɛgɛ mpyi Abinɛri.
Uru tuŋi mɛgɛ mpyi Nɛri.
Nɛri na mpyi Soli tubilere.
51 Soli tuŋi Kisi ná Abinɛri tuŋi Nɛri,
pire na mpyi Abiyɛli jyaa.
52 Soli à kàshibwɔhe kwɔ̀n Filisi shiinbii na u tìiŋi puni i.
U ná mpyi a nàntanhaga lire ɲyɛ mɛ kàshikwɔnmpege ɲya,
u mpyi maha ku bâra u kàshikwɔnkuruŋke na.