Izirayɛli shiinbii ná Filisi shiinbii kàshige
13
Soli shìŋi mpyi a nɔ pɛ̀rɛge kà na mà jwo u pyi saanŋi ke.
U à yee beeshuunni ná shuunni pyi saanre na Izirayɛli shiinbii ɲùŋɔ na.
2 Ka Soli si kàshikwɔɔnbii shiin kampwɔhii taanre (3.000) cwɔɔnrɔ Izirayɛli shiinbilʼe.
Ka shiin kampwɔhii shuunni (2.000) si ŋkwôro ná u e Mikimasi kànhe ná Bɛtɛli ɲaŋkuluni i.
Ka shiin kampwoo (1.000) si mpyi ná u jyaŋi Zhonatan e Gibeya kànhe e,
Bezhamɛ shiinbii kùluni i.
Ka u u sùpyire sannte yaha a kàre pi pyɛnyi i.
3 Filisi shiinbii kàshikwɔɔnbii tatɛɛnge ku mpyi Gibeya e ke,
ka Zhonatan si kuru jya.
Ka Filisi shiinbii si puru lógo.
Ka Soli si Izirayɛli shiinbii pyi pi à mpuruge wyì kìni cyeyi puni i,
maa jwo:
«Eburu shiinbii puni,
yii mpe lógo.»
4 Ɲyɛ ka Izirayɛli shiinbii puni si lógo na Soli à Filisi shiinbii tatɛɛnge jya,
ka lire si Filisi shiinbii lùgigii yîrige pi taan.
Ɲyɛ ka Soli si pi pyi pi à kàshikwɔɔnbii puni yyerʼa pa bínni u taan Giligali i.
5 Ka Filisi shiinbii mú si piye bínni kàshige mɛɛ na Izirayɛli shiinbii na.
Kàshikwɔnwotoroyo kampwɔhii beɲjaaga ná kɛ (30.000) ná shwɔnyi dugufeebii shiin kampwɔhii baani (6.000) ná shinɲyahara mpyi pi á.
Pi mpyi a ɲyaha suumpe lwɔhe ɲwɔge nticyɛnŋi fiige.
Ka pi i ŋkàrʼa sà pi tatɛɛnge yaa Mikimasi i,
Bɛti-Avɛni kànhe canŋafyinmpe e.
6 Izirayɛli shiinbilʼà li ɲya na Filisi shiinbilʼà nɔ pire na,
tashwɔgɔ saha ɲyɛ pire na mɛ,
ka pi pìi si fê a sà ŋwɔhɔ ɲaŋgyiyi i,
pìlʼà sà ŋwɔhɔ tahayi i,
ka pìi si sà ŋwɔhɔ kafaawyiyi i,
ka pìi si sà ŋwɔhɔ ɲìŋke ɲwɔhɔ wyiyi i,
ka pìi si sà ŋwɔhɔ wyikuuyi i.
7 Ka Eburu shiinbii pìi si fê a Zhurudɛn baŋi jyiile mà kàre Gadi ná Galadi kùlugilʼe.
Lirʼà Soli ta Giligali i sahaŋki.
Kàshikwɔɔnbii puni pi mpyi ná u e ke,
pire mpyi a fyá fo na ɲcyɛ̂ɛnni.
8 Soli à canmpyaa baashuunni pyi na Samuwɛli sigili mà tàanna ná uru tèni niɲcyeeni i.
Ŋka,
Samuwɛli ɲyɛ a pa Giligali i mɛ,
ka sùpyire si li ɲwɔ cû na ɲcaali Soli na.
Soli kapiini
9 Ɲyɛ ka Soli si jwo:
«Yii a ma ná sárayi nizogoyi yatɔɔre ná funntanga sárayi i.»
Ka u yabiliŋi si sárayi nizogoyi súugo.
10 Soli à kwɔ̀ sárayi ŋgwùŋi na cyage ŋkemu i ke,
ka Samuwɛli si nɔ wani.
Ka Soli si fworʼa u círi si u shɛ́ɛre.
11 Ka Samuwɛli si jwo:
«Ɲaha shi mu à pyi amɛ yɛ?»
Ka Soli si jwo:
«Mii à sùpyire ɲya ti i ɲcaali mii na.
Tèni mu mpyi a cyêe na mu sí n-pa ke,
lire mpyi a tòro,
Filisi shiinbii sʼà bínni Mikimasi i.
12 Ka mii i jwo,
Filisi shiinbii sí n-pa n-cwo mii na Giligali i mà ta mii ɲyɛ a Kafooŋi ɲáare mɛ.
Lire kurugo,
mii à naye fége maa sáraga nizogogo súugo.»
13 Ka Samuwɛli si Soli pyi:
«Funŋɔbaara kyaa mu à pyi.
Kafooŋi mu Kileŋi à tùnnture ntemu jwo mu á ke,
mu ɲyɛ a tire yige ti kuni i mɛ.
Ká mpyi mu mpyi a lire pyi,
Kafooŋi mpyi na sí mu saanre tígile tèrigii puni i Izirayɛli shiinbii ɲuŋʼi.
14 Ŋka numɛ,
mu saanre sì mɔ mɛ.
Kafooŋi à u ɲyii shin cwɔɔnrɔ,
maa uru pyi u shiinbii ɲùŋufooŋi,
ɲaha kurugo yɛ,
mu ɲyɛ a Kafooŋi tùnnture yige ti kuni i mɛ.»
15 Lire kàntugo,
ka Samuwɛli si yîri Giligali i mà kàre Gibeya e,
Bezhamɛ shiinbii kùluni i.
Ka Soli si u kàshikwɔɔnbii tɔ̀rɔ,
pire mpiimu pi mpyi ná u e ke.
Pi mpyi a shiin ŋkwuu baani (600) kwɔ̀.
16 Ka Soli ná u jyaŋi Zhonatan ná pi kàshikwɔɔnbii si ŋkàrʼa sà ntɛ̀ɛn Geba kànhe e Bezhamɛ tùluge shiinbii kùluni i,
Filisi shiinbii sʼà tɛ̀ɛn Mikimasi kànhe e.
17 Ka kàshikwɔɔnbii pìi si fworo Filisi shiinbii kàshikwɔɔnbii shwɔhɔlʼe,
maa piye taa mà pyi kuruɲwɔ taanre,
mà sà kakyaare pyi.
Ka kuruŋke kà si ŋkàre Ofira kàmpanŋke na,
Sawali kùluni i.
18 Ka ku shwɔnwoge si ŋkàre Bɛti-Ɔrɔn kàmpanŋke na,
ka ku tanrewoge si ŋkàre kùluni tɛgɛni kàmpanŋke na mà sà nɔ Seboyimu tafage na síwage yyéreŋi i.
19 Lire tèni i,
tunntun ɲyɛ a mpyi a sìi Izirayɛli kìni i mɛ,
ɲaha kurugo yɛ,
Filisi shiinbii mpyi maha jwo:
«Wuu Eburu shiinbii sige pi àha raa kàshikwɔnŋwɔhii ná tàanlii yaa mɛ.»
20 Izirayɛli shiinbii puni mpyi maha sì na pi nùtuuyi ná pi tùuyi ná pi kaciiyi ná pi sóobii ɲwɔyi céeli Filisi shiinbii yyére.
21 Nùtuuyi ná tùuyi,
lire ɲyɛ mɛ kaciige,
lire ɲyɛ mɛ mà tɔɔnŋɔ ɲwɔ cée,
tire lwɔɔre mpyi a ɲyaha.
22 Ka li i mpa mpyi,
kàshige canŋke,
kàshikwɔnŋwɔɔ lire ɲyɛ mɛ,
tàan ɲyɛ a mpyi Soli ná Zhonatan kàshikwɔɔnbilʼá mɛ.
Soli ná u jyaŋi Zhonatan,
pire kanni pi mpyi ná yʼe.
23 Ka Filisi shiinbii kàshikwɔnkuruŋke kà si sà yyére Mikimasi ɲaŋgyige kuni i kàshige mɛɛ na.