Samuwɛli yɛrɛge nizanŋke
12
Ka Samuwɛli si Izirayɛli shiinbii puni pyi:
«Yii à yaaga maha yaaga cya mii á ke,
mii à yire puni kan yii á.
Mii à saanwa tìŋɛ yii ɲùŋɔ na.
2 Ɲyɛ numɛ,
uru saanŋi u sí yii yyaha cû.
Mii wi ke,
mii à lyɛ fo mà ɲùŋke fíniŋɛ.
Mii jyaabii na ɲyɛ naha ná yii e.
Mii à yii yyaha cû mà lwɔ́ mii nàɲjyiwuŋi na mà pa nɔ niɲjaa na.
3 Mii niɲjyereŋi u ŋge yii ná Kafooŋi ná u shincwɔnrɔŋi yyaha yyére.
Mii aha nta mii à kapyimbaala pyi yii wà na,
urufoo u li jwo.
Yii jofoo nù mii à cyán a shwɔ yɛ?
Jofoo dùfaanŋa mii à cyán a shwɔ yɛ?
Jofoo na mii à cwo yɛ?
Mii à jofoo cùmulemɛ pi yɛ?
Jofolʼá mii à numpirekaŋkurugo shwɔ maa na ɲyiigii tò urufoo kapyiiŋkii na yɛ?
Lʼaha nta na mii à lire fiige pyi ŋgemu na ke,
mii sí urufoo yakange cyage núruŋɔ u á.»
4 Ka pi i jwo:
«Mu ɲyɛ a cwo wuu na mɛ,
mu ɲyɛ a wuu cùmulemɛ pi mɛ,
mu mú ɲyɛ a numpirekaŋkurugo swhɔ sùpya á mɛ.»
5 Ka u u núrʼa pi pyi:
«Kafooŋi u ɲyɛ yii shéere,
saanŋi u à cwɔɔnrɔ ke,
uru mú ɲyɛ shéere niɲjaa,
na yii ɲyɛ a ɲcɛ̀ɛgɛ cyaga ta mii na mɛ.»
Ka sùpyire si jwo:
«Ɔɔn,
yire yi!»
6 Ka Samuwɛli si núrʼa sùpyire pyi:
«Kafooŋi u à Musa ná Arɔn tìŋɛ yii tulyeyi ɲùŋɔ na,
maa pi yige Misira kìni i.
7 Ɲyɛ numɛ,
yii filʼa yyére,
kacɛnŋkii puni Kafooŋi à pyi yii ná yii tulyeyʼá ke,
mii sí yii funŋɔ cwo cyire na Kafooŋi yyahe taan.
8 Yakuba à nɔ Misira kìni i ke,
yii tulyeyʼà mɛɛ wà Kafooŋi á,
ka Kafooŋi si Musa ná Arɔn pyi pi à pi yige Misira kìni i maa pi pyi pi à pa ntɛ̀ɛn naha nde kìni i.
9 Ŋka,
pi à funŋɔ wwɔ̀ Kafooŋi pi Kileŋi na.
Lire kurugo u à pi le Azɔri shiinbii kàshicyɛge yyaha yyére shinŋi Sisera ná Filisi shiinbii ná Muwabu shiinbii saanŋi cye e,
ka pire si pi tùn.
10 Ka pi i núrʼa mɛɛ wà Kafooŋi á maa jwo:
“Wuu à kapii pyi,
ɲaha kurugo yɛ,
wuu à kàntugo wà Kafooŋi á maa kacyanhigii Baali ná Asitariti sunni.
Numɛ,
wuu shwɔ wuu zàmpɛɛnbii na,
lire ká mpyi,
wuu sí raa mu pêre.”
11 Ɲyɛ,
Kafooŋi à Yerubaali ná Bedan ná Zɛfite tun yii á,
lire kàntugo,
maa mii Samuwɛli tun yii á,
zàmpɛɛnbii pi à yii kwûulo ke,
bà yii sí n-pyi si shwɔ pire na si yyeɲiŋɛ ta mɛ.
12 Ŋka,
yii à Amoni shiinbii saanŋi Nakasi ɲya u u ma yii tatunŋʼi ke,
ka yii i yi jwo mii á na mà saanŋa tìŋɛ yii ɲùŋɔ na,
maa li ta,
Kafooŋi,
yii Kileŋi u ɲyɛ yii saanŋi.
13 Ɲyɛ numɛ,
saanŋi yii à cwɔɔnrɔ maa u cya ke,
uru u ŋge.
Kafooŋi à u tìŋɛ yii ɲùŋɔ na.
14 Yii aha a fyáge Kafooŋi na,
maa uru kanni pêre,
maa u ɲwɔmɛɛni cû,
yii aha mpyi yii ɲyɛ a kàntugo wà u jwumpʼá mɛ,
yii ná saanŋi yii à tìŋɛ yiye ɲùŋɔ na ke,
yii sí n-jà ntaha Kafooŋi yii Kileŋi fye e.
15 Ŋka,
yii àha mpyi yii ɲyɛ a Kafooŋi ɲwɔmɛɛni cû mɛ,
yii aha kàntugo wà Kafooŋi jwumpʼá,
Kafooŋi sí yyefugo nimbwɔhɔ nɔ yii na,
bà u à ku nɔ yii tulyeyi na mɛ.
16 Yii tɛ̀ɛn naha sahaŋki,
Kafooŋi sí kakyanhala kani ndemu pyi yii ɲyii na ke,
yii sí lire ɲya.
17 Sùmakwɔɔngii tèni i bà wuu ɲyɛ numɛ mà?
Mii sí Kafooŋi ɲáara,
u sí kileŋi pyi u a ntînni si zànhe cyán.
Lire e,
yii sí li cè na yii à saanŋi cya ke,
yii à sàa kapii pyi Kafooŋi yyahe taan.»
18 Ka Samuwɛli si Kafooŋi ɲáara,
ka Kafooŋi si kileŋi pyi u u ntînni maa zànhe cyán kuru canŋke.
Ka sùpyire puni si fyá sèlʼe Kafooŋi ná Samuwɛli yyaha na.
19 Ka pi puni si Samuwɛli pyi:
«Kafooŋi ma Kileŋi ɲáara ma báarapyiibilʼá,
bà wuu sí n-pyi wuu àha ŋkwû mɛ,
ɲaha kurugo yɛ,
wuu à sàa là bâra wuu kapegigii na,
ná saanŋi ɲcyaŋi i.»
20 Ka Samuwɛli si sùpyire pyi:
«Yii àha raa fyáge mɛ!
Sèe,
yii à lire kapiini nimbwooni pyi,
ŋka,
yii àha kàntugo wà Kafooŋi á mɛ,
yii à u pêre ná yii zòmpyaagii puni i.
21 Yii àha kàntugo wà u á mɛ,
lire baare e,
yii sí raa kacyanhigii sunni.
Cyire sì n-jà yafyin ɲwɔ yii na mɛ,
cyi sì n-jà sùpya shwɔ mɛ,
ɲaha kurugo yɛ,
cyi ɲyɛ yafyin mɛ.
22 Yii li cè na Kafooŋi mɛge mpèeŋi kurugo,
u sì cye wwû u shiinbii taan mɛ,
ɲaha kurugo yɛ,
Kafooŋi a ɲɛɛ si yii pyi u shiinbii.
23 Mii wi ke,
Kile u na shwɔ si nláha kileɲarage na yii á.
Mii aha lire pyi,
mii à kapii pyi Kafooŋi na.
Mii sí yii taanna kuɲcɛnni ná kuntiini ɲaaraŋi na.
24 Yii pi ke,
yii a fyáge Kafooŋi na,
yii raa u pêre ɲwɔmɛfente funŋke e ná yii zòmpyaagii puni i.
Kakyanhala karigii u à pyi yii á ke,
yii a sɔ̂nŋi cyire na.
25 Ŋka,
yii aha a kapegigii pyi,
yii ná yii saanŋi puni shi sí n-bò.»