Soli à Amoni shiinbii tùn maa jà pi na
11
Ɲyɛ ka Amoni saanŋi Nakasi si sà ntɛ̀ɛn Yabɛsi kànhe ɲwɔ na,
Galadi kùluni i kàshige mɛɛ na.
Ka Yabɛsi shiinbii si u pyi:
«Tunmbyara le ná wuu e,
wuu sí raa báare mu á.»
2 Ka Amoni saanŋi Nakasi si jwo:
«Nde li sí mii pyi mii tunmbyara le ná yii e ke,
lire li ɲyɛ,
mii sí yii shin maha shin kàniŋɛ ɲyiini jya,
bà Izirayɛli shiinbii puni si mpyi si sílige mɛ.»
3 Ka Yabɛsi kànhe kacwɔnribii si u pyi:
«Canmpyaa baashuunni kan wuu á,
wuu sí tùnntunmii tun Izirayɛli kìni puni i.
Sùpya kampyi u ɲyɛ a ta si wuu shwɔ mɛ,
wuu sí wuye kan mu á.»
4 Ka tùnntunmpii si ŋkàre Soli kànhe Gibeya e maa sà puru jwumpe jwo sùpyirʼá.
Ka sùpyire puni si wá na mpaare maa mɛɛ súu.
5 Lirʼà Soli ta u u nɔni ná u nìiyi i mà yîri sige e.
Ka u u yíbe:
«Ɲaha na sùpyire ɲyɛ na mɛɛ súu amɛ yɛ?»
Ka pi i Yabɛsi shiinbii jwumpe yyaha jwo u á.
6 Soli à puru jwumpe lógo cyage ŋkemu i ke,
ka Kile Munaani si ntîge u ɲuŋʼi ná fànhʼe,
ka u lùuni si sàa yîri.
7 Ka u u nìiɲyɛ shuunni cû,
maa yi cirige cirige,
maa tùnntunmii tun ná yi kyayirigilʼe Izirayɛli kìni puni i maa jwo:
«Shin maha shin kampyi u ɲyɛ a ɲɛnʼa taha Soli ná Samuwɛli fye e mɛ,
amɛ urufoo nìiɲyi sí n-pyi.»
Ka Kafooŋi si fyagare pyi tʼà sàa Izirayɛli shiinbii ta.
Ka pi puni si sɔ̀nŋɔre pyi niŋkin maa kuni lwɔ́.
8 Ka Soli si pi tɔ̀rɔ Bezɛki kànhe e.
Pi mpyi shiin kampwɔhii ŋkwuu taanre (300.000) mà fworo Izirayɛli tùluyi i,
Zhuda wuubii sí ɲyɛ shiin kampwɔhii beɲjaaga ná kɛ (30.000).
9 Mpii pi mpyi a pa tùnnture jwo ke,
ka pi i yi jwo pirʼá:
«Yii sà yi jwo Yabɛsi kànhe shiinbilʼá Galadi kùluni i:
“Nùmpanŋa canvwuge na,
yii sí tɛgɛfee ta”.»
Ka tùnntunmpii si ŋkàrʼa sà yire jwo Yabɛsi shiinbilʼá,
ka lire si sàa táan pi e.
10 Ka Yabɛsi shiinbii si Amoni shiinbii pyi:
«Nùmpanŋa,
wuu sí n-sà wuye kan yii á,
nde lʼà táan yii á ke,
yii i lire pyi wuu na.»
11 Kuru canŋa nùmpanŋa,
ka Soli si sùpyire táa tataaya taanre.
Mà jwo ɲyɛ̀ge ku múgo ke,
ka pi i ŋkàre Amoni shiinbii tatɛɛnge e maa sà pi bò fo mà sà canŋke wyɛ̀rɛŋɛ.
Mpii pi à pôlʼa shwɔ ke,
ka pire puni si fê a ɲcaala.
Pire e,
ali shiin shuunni ɲyɛ a kàre kunuulʼe mɛ.
12 Ka sùpyire si Samuwɛli pyi:
«Mpii pi mpyi a jwo:
“Taha Soli u sí n-tɛ̀ɛn wuu ɲùŋɔ na?”
Yii pire kan wuu á wuu bò.»
13 Ka Soli si jwo:
«Sùpya sì n-bò niɲjaa mɛ,
ɲaha kurugo yɛ,
Kafooŋi à Izirayɛli shiinbii shwɔ niɲjaa.»
14 Ka Samuwɛli si sùpyire pyi:
«Yii a ma wuu a sì Giligali i,
wuu u sà Soli tìŋɛ sahaŋki wuu pyi wuu saanŋi.»
15 Ka sùpyire puni si ŋkàre Giligali i,
maa sà Soli tìŋɛ sahaŋki mà pyi saanwa Kafooŋi yyahe taan wani.
Ka pi i funntanga sáraya wwû Kafooŋi á.
Ka Soli ná Izirayɛli shiinbii puni si múguro sèlʼe wani.