10
Ka Samuwɛli si sìnmpe yaage lwɔ́ maa pu wu Soli ɲùŋke e,
maa u pûrʼa cû maa jwo:
«Kafooŋi à mu cwɔɔnrɔ mà pyi u shiinbii yyaha yyére shinŋi.
2 Mu aha yîri naha mii yyére niɲjaa,
mu sí n-sà ɲcíri ná nàmbaa shuunni i Arasɛli fanŋke cyage e Selisa kànhe e,
Bezhamɛ taare e.
Pi sí yi jwo mu á na dùfanɲcyeebii mu mpyi na ɲcaa ke,
na pi à ɲya.
Na dùfanɲcyeebii wogo sàha wà a mu tuŋi funŋɔ pɛn mɛ,
ŋka yii woge ku wà a u funŋɔ pɛn,
na ɲaha uru sí n-pyi si u jyaŋi ɲya yɛ?
3 Mu aha yîri pire cyage e na wà,
mu sí n-sà ɲcíri ná nàmbaa taanre e Tabɔri cibwɔhe taan pi i ŋkɛ̀ɛge Kile tapeeŋke e Bɛtɛli i.
Sikapyire taanre sí n-pyi pi wà niŋkin cye e,
bwúuruɲuɲyɔ taanre sí n-pyi shɔnwuŋi cye e,
ɛrɛzɛn sinmpe sí n-pyi sɛɛgɛ borʼe shin tanrewuŋi cye e.
4 Pi sí mu shɛ́ɛre si bwúuruɲuɲyɔ shuunni kan mu á,
ma a yi shwɔ.
5 Lire kàntugo,
mu sí n-sà nɔ Gibeya-Eloyimu i.
Filisi shiinbii kàshicyɛge shiinbii pìi na ɲyɛ wani.
Mu aha a sí raa jyè kànhe e,
mu sí n-círi ná Kile tùnntunmii kuruŋʼi pi i ntîri mà yîri sárayi tawwuge e,
ŋkɔ̀nɔbwɔɔnbii ná pùnmbwɔɔnbii ná tìnmpirigii wyìfeebii nà mpòombwɔɔnbii sí ɲyɛ pi yyaha na,
pire yabilimpii sʼà fworo pi lyempe e maa Kile tùnnture yu.
6 Lire tèni i,
Kafooŋi Munaani sí n-tîge mu ɲuŋʼi ná fànhʼe.
Mu sí n-fworo ma lyempe e sʼa Kile tùnnture yu pi fiige.
Mu sí n-kɛ̂ɛnŋɛ si mpyi sùpyaŋi wabɛrɛ.
7 Cyire karigii kampyi mu na mà kwɔ̀ tèni ndemu i ke,
nde mu sí n-jà mpyi ke,
lire pyi,
ɲaha kurugo yɛ,
Kile na ɲyɛ ná mu i.
8 Lire kàntugo,
ma raa wà na yyaha na Giligali i,
mii sí mu ɲùŋɔ bɛ̂ wani si sà sáraya nizogoyo ná funntanga sáraya wwû.
Mu sí canmpyaa baashuunni pyi sʼa mii sigili,
mà jwo mii nɔ wani si mu nimpyiini jwo mu á ke.»
9 Soli à yîri Samuwɛli taan sʼa wà cyage ŋkemu i ke,
ka Kile si Soli zòmbilini kɛ̂ɛnŋɛ,
ka cyire karigii puni si mpyi kuru canŋke.
10 Pi à sà nɔ Gibeya e ke,
ka pi i ɲcíri ná Kile tùnntunmii kuruŋʼi.
Ka Kile Munaani si ntîge Soli ɲuŋʼi ná fànhʼe,
ka u u fworo u lyempe e maa Kile tùnnture yu ná pi e.
11 Mpii puni pi mpyi a u cè a lyɛ,
maa u ɲya u u Kile tùnnture yu ke,
ka pire si wá na ŋko piyʼá:
«Ɲaha shi kʼà jyè Kisi jyaŋi i yɛ?
Soli mú à pyi Kile tùnntunŋɔ la?»
12 Ka Gibeya shinŋi wà si jwo:
«Jofoo u ɲyɛ pi cyelentuŋi yɛ?»
Kuru cyage e nde tàalinʼà jwo:
«Soli mú à pyi Kile tùnntunŋɔ la?»
13 Soli à fworo u lyempe e maa Kile tùnnture jwo a kwɔ̀ ke,
maa ŋkàre sàrayi tawwuge e.
14 Ka Soli tubileni si u ná u báarapyiŋi yíbe:
«Taa yii mpyi a kàre ke?»
Ka Soli si jwo:
«Wuu mpyi a kàre dùfanɲcyeebii tacyage e.
Wuu ɲyɛ a pi ɲya mɛ,
ka wuu u ŋkàrʼa sà Samuwɛli yíbe.»
15 Ka Soli tubileni si jwo:
«Ɲje Samuwɛli à jwo yii á ke,
yire jwo na á.»
16 Ka Soli si u tubileni pyi:
«U à yi fínniŋʼa jwo wuu á na dùfanɲcyeebilʼà ɲya.»
Ŋka,
saanre kani Samuwɛli mpyi a jwo u á ke,
u ɲyɛ a ɲɛnʼa yire jwo u tubilenʼá mɛ.
Soli à cwɔɔnrʼa pyi Izirayɛli shiinbii saanŋi
17 Ka Samuwɛli si Izirayɛli shiinbii puni yyere mà kàre Kafooŋi yyahe taan Misipa kànhe e,
18 maa yi jwo Izirayɛli shiinbilʼá:
«Kafooŋi,
Izirayɛli Kileŋi à jwo:
“Mii u à yii yige Misira kìni i,
maa yii shwɔ Misira shiinbii ná saanbii piibɛrii na,
mpiimu pi mpyi maha yii kyérege ke.”
19 Ŋka yii à kàntugo wà yii Kileŋi á niɲjaa,
uru ŋgemu u à yii yige yii kyaage ná yii yyefuge e ke,
maa jwo na u saanwa tìŋɛ yii ɲùŋɔ na.
Ɲyɛ numɛ,
yii file Kafooŋi na tùluyo tùluyo ná baya baya.»
20 Ka Samuwɛli si Izirayɛli shiinbii tùluyi puni pyi yʼà file,
maa ŋkyaanlwooni pyi,
ka Bezhamɛ tùluge si mpa ɲcyêe.
21 Ka u u Bezhamɛ tùluge pyi kʼà file pyɛnyɛ pyɛnyɛ,
ka Matiri pyɛnge si mpa ɲcyêe.
Lire kàntugo,
ka Kisi jyaŋi Soli si mpa ɲcyêe.
Ka pi i u cya,
ŋka pi ɲyɛ a u ɲya mɛ.
22 Ka pi i núrʼa Kafooŋi yíbe:
«Wà saha na ɲyɛ naha la?»
Ka Kafooŋi si pi pyi:
«U we u à ŋwɔhɔ yaayi shwɔhɔlʼe.»
23 Ka pi i fê a kàrʼa sà u yigʼa pa yyéeŋɛ sùpyire shwɔhɔlʼe.
U mpyi a tɔɔn sùpyire puni na sèlʼe.
24 Ka Samuwɛli si sùpyire puni pyi:
«Nàŋi Kafooŋi à cwɔɔnrɔ ke,
yii u wíi,
u fiige ɲyɛ sùpyire shwɔhɔlʼe mɛ.»
Ka sùpyire si ŋkwúulo maa jwo:
«Kile u shì kan saanŋʼá.»
25 Ka Samuwɛli si saanre sàliyaŋi jwo sùpyirʼá,
maa ŋkwɔ̀ maa u sémɛ sémʼe mà yaha Kafooŋi yyahe taan.
Lire kàntugo,
ka Samuwɛli si sùpyire puni cye yaha pi a sì pi pyɛnyi i.
26 Ka Soli mú si ŋkàre u pyɛnge e Gibeya kànhe e.
Kile mpyi a u kyaa pyi lʼà táan kàshikwɔnmpiyi yà á,
ka yire si ŋkàrʼa sà u tùugo.
27 Ŋka supyifahafahayi yà à ta wani,
ka yire si jwo:
«Di ŋge sí wuu shwɔ ɲjwo yɛ?»
Yire mpyi na u fwɔ́hɔre.
Yi ɲyɛ a yaaga kan u á mɛ.
Ŋka Soli ɲyɛ a yaaga jwo pi na mɛ.