Samuwɛli ná Soli kani
9
Nàŋi wà na mpyi Bezhamɛ tùluge e,
u mɛgɛ mpyi Kisi.
Kàshikwɔnmpege ku mpyi ku ki.
Kisi tuŋi mɛgɛ mpyi Abiyɛli,
Abiyɛli tuŋi mɛgɛ mpyi Zerɔri,
Zerɔri tuŋi mɛgɛ mpyi Bekorati,
Bekorati tuŋi mɛgɛ mpyi Afiya.
2 Jya na mpyi Kisi á,
u mɛgɛ mpyi Soli.
Nàɲjyisinaŋa ku mpyi ku ki.
Wà lemɛ ɲyɛ a mpyi a ɲwɔ a u kwɔ̀ Izirayɛli shiinbilʼe mɛ.
U mpyi a tɔɔn sùpyire puni na sèe sèlʼe.
3 Canŋka,
ka Soli tuŋi Kisi dùfanɲcyeebii si mpînni.
Ka Kisi si u jyaŋi Soli pyi:
«Báarapyiŋi wà bâra maye na,
yii i sà dùfanɲcyeebii cya.»
4 Ka pi i sà Efirayimu ɲaŋkuluni ɲaara,
maa ŋkàrʼa sà Salisa kìni ɲaara,
pi ɲyɛ a pi ɲya mɛ.
Ka pi i Salimu kìni ɲaara,
pi ɲyɛ a pi ɲya mɛ.
Ka pi i Bezhamɛ kìni jyiile,
pi ɲyɛ a pi ɲya mɛ.
5 Ka pi i ŋkàrʼa sà nɔ Sufu kìni i.
Báarapyiŋi u mpyi ná Soli i ke,
ka Soli si uru pyi:
«Ta wà wuu u núru wuu a si pyɛngɛ,
lire baare e,
mii tuŋi funŋke sí n-pɛn ná wuu kani i si funŋɔ wwɔ̀ dùfanɲcyeebii na.»
6 Ka báarapyiŋi si jwo:
«Wíi,
Kile sùpyaŋi wà na ɲyɛ ŋke kànhe e,
shinbwo u ɲyɛ u wi.
U aha yaaga maha yaaga jwo ke,
kuru maha sàa pyi.
Wuu shà u yyére,
u aha ŋkwɔ̀ a sà tatoroyo cyêe wuu na,
ka wuu u dùfanɲcyeebii ɲya.»
7 Ka Soli si báarapyiŋi pyi:
«Wuu aha shà,
ɲaha shi wuu sí sà ŋkan uru nàŋʼá yɛ?
Yalyire sàha ɲyɛ wuu bɔrigilʼe mɛ,
yafyin ɲyɛ wuu á wuu kan Kile sùpyaŋʼá mɛ.
Yafyin ɲyɛ wuu cye e mɛ.»
8 Ka báarapyiŋi si núrʼa jwo:
«Wyɛ́rɛfyinŋi nimbilere na ɲyɛ mii á.
Mii sí uru kan uru Kile sùpyaŋʼá bà u si mpyi si tatoroyo cyêe wuu na mɛ.»
9 (Tèecyiini i,
Izirayɛli kìni i,
wà ná mpyi na ŋkɛ̀ɛge zà Kile yíbe kani là na,
u mpyi maha jwo:
«Yii a wà wuu u shà céepyiŋi yyére.»
Ɲaha kurugo yɛ,
mpii pi ɲyɛ Kile tùnntunmpii numɛ ke,
pi mpyi maha pire pyi céepyiibii lire tèni i.)
10 Ka Soli si u báarapyiŋi pyi:
«Mu jwumpʼà ɲwɔ,
wuu a sì!»
Kile sùpyaŋi mpyi kànhe ŋkemu i ke,
ka pi i ŋkàre wani.
11 Mà pi yaha pi i dùru na ŋkɛ̀ɛge kuru kànhe e,
ka pi i ɲcíri ná kànhe pùcempyire tʼe ti i ŋkɛ̀ɛge lwɔhɔ takwugʼe.
Ka pi i ti pyi:
«Céepyiŋi na ɲyɛ naha la?»
12 Ka pùcempyire si pi pyi:
«Ɔɔn,
u cyage na ɲyɛ yii yyaha yyére.
Yii a fyâa yii a sì,
numɛ u à pa kànhe e,
ɲaha kurugo yɛ,
sùpyire na ŋko raa sáraga wwû niɲjaa ɲaɲyi sárayi tawwuge e.
13 Yii fyâlʼa jyè kànhe e,
yii sí u ta wani mà jwo u kàre sárage talyige e ke.
Sùpyire sì cye le sárage ɲjyìŋi i ná u ɲyɛ a nɔ wani mɛ.
Ɲaha kurugo yɛ,
uru u sí sárage jwóŋi le,
shinyyerebii si nta raa ku lyî.
Yii a sì,
yii sí sà u ta wani numɛ.»
14 Ka pi i kuni lwɔ́ na ŋkɛ̀ɛge mà sà nɔ kànhe tajyiɲwɔge na,
mà círi ná Samuwɛli i u u ŋkɛ̀ɛge sárayi tawwuge e.
15 Lire mpyi a Kafooŋi ta u à Samuwɛli sɔ̂nŋɔ canmbile niŋkin mà jwo Soli u nɔ wani ke.
U mpyi a yi jwo u á:
16 «Nùmpanŋa numɛ cyíin,
mii sí Bezhamɛ tùluge shinŋi wà tun mu á.
Mu sí sìnmpe tìri u na,
si u tìŋɛ mii shiinbii,
Izirayɛli shiinbii ɲùŋɔ na.
Uru u sí mii shiinbii shwɔ Filisi shiinbii na.
Ɲaha kurugo yɛ,
mii à na shiinbii kanhare ɲya,
maa pi parage lógo.»
17 Samuwɛli à Soli ɲya ke,
ka Kafooŋi si u pyi:
«Nàŋi kyaa mii mpyi a jwo mu á ke,
uru u ɲyɛ ŋge.
Uru u sí n-pyi mii shiinbii ɲùŋɔ na.»
18 Ka Soli si file Samuwɛli na kànhe tajyiɲwɔge na maa jwo:
«Ɲwɔ na na,
ma a céepyiŋi saha cyêe na na.»
19 Ka Samuwɛli si u pyi:
«Mii u ɲyɛ céepyiŋi.
Ta wà na yyaha na sárayi tawwuge e,
mii ná yii sí n-lyî siɲcyan niɲjaa.
Nùmpanŋa ɲyɛ̀gɛ na,
mii sí mu kuni kan si mu funŋɔ jwumpe puni jwo mu á.
20 Mu dùfanɲcyeebii pi à pînni mu u ɲcaa,
ná niɲjaa ɲyɛ cyi canmpyaa taanre ke,
ma hà ma funŋke pɛn pi kyaa na mɛ,
ɲaha kurugo yɛ,
pi à ɲya.
Izirayɛli shiinbii puni na sɔ̂nŋi shinŋi ŋgemu na niɲjaa ke,
mu ná ma tuŋi pyɛnge shiinbii puni bàlʼa?»
21 Ka Soli si u ɲwɔ shwɔ:
«Mii na ɲyɛ Bezhamɛ tùluge shin.
Kuru ku ɲyɛ Izirayɛli shiinbii tùluyi puni nimbileni.
Mii pyɛnge mú ku ɲyɛ Bezhamɛ tùluge pyɛnyi puni nimbileni.
Ɲaha na mu ɲyɛ na mpe jwumpe yu mii á yɛ?»
22 Ka Samuwɛli si ŋkàre ná Soli ná u báarapyiŋi i yalyire talyige e,
maa tatɛɛnɲyi niɲcyiiyi kan pi á shinyyerebii shwɔhɔlʼe.
Pire mpyi a shiin beɲjaaga ná kɛ kwɔ̀.
23 Ka Samuwɛli si sushwɔ̀hɔŋi pyi:
«Mii mpyi a jwo ma kyaare ntemu wwûlʼa yaha ŋkère na ke,
ta ma ná tʼe.»
24 Ka sushwɔ̀hɔŋi si mpa ná kyaare cyiini puni i mà pa ntîrige Soli taan.
Ka Samuwɛli si jwo:
«Nàzhanŋi u mpyi a yaha mu yyaha na ke,
uru wi,
u lwɔ́ a lyî.
Ɲaha kurugo yɛ,
mii à u yaha mu yahare e,
tèni i mii à sùpyire yyere ke.»
Ka Soli si lyî ná Samuwɛli i kuru canŋke.
25 Lire kàntugo,
ka pi i yîri siɲcyan sárayi tawwuge e mà kàre kànhe e.
Ka Samuwɛli si ŋkàre ná Soli i bage kàtanŋke ɲuŋʼi pi i sà piye ɲya.
26 Kuru canŋa nùmpanŋa,
ka pi i sôlʼa yîri,
mà jwo ɲyɛ̀ge ku ɲcwó ke,
ka Samuwɛli si Soli yyere bage kàtanŋke ɲuŋʼi maa jwo:
«Ta sì,
mii sí mu tùugo.»
Ka Soli si yîri,
u ná Samuwɛli,
ka pi mú shuunniŋi si fworo.
27 Pi à sà nɔ kànhe tafworoŋke e ke,
ka Samuwɛli si Soli pyi:
«Ma báarapyiŋi pyi u a wà wuu yyaha na.»
Ka báarapyiŋi si ŋkàre pi yyaha na.
Ka Samuwɛli si jwo:
«Yyére,
jwumpe Kile à jwo mii á ke,
mii sí puru jwo mu á numɛ.»