Izirayɛli shiinbii na saanwa caa
8
Samuwɛli à pa lyɛ ke,
ka u u u jyaabii tìŋɛ mà pyi Izirayɛli shiinbii yukyaabii.
2 U jyaŋi niɲcyiiŋi mɛgɛ mpyi Zhowɛli,
shɔnwuŋi mɛgɛ mpyi Abiya.
Pire pi mpyi yukyaabii,
pi mpyi a tɛ̀ɛn Bɛrisheba kànhe e.
3 Ŋka Samuwɛli jyaabii ɲyɛ a mpyi a u zòŋi lwɔ́ mɛ.
Pi mpyi maha numpire kàŋkuruyi shwuu mà tɛ̀gʼa piye pyi yaarafee.
Pi mpyi maha karigii cwɔɔnre ntìimbaaŋi ɲuŋʼi.
4 Ka Izirayɛli shiinbii kacwɔnribii puni si piye bínni maa ŋkàre Samuwɛli fye e Arama kànhe e,
5 maa sà u pyi:
«Wíi,
mu à lyɛ,
mu jyaabii sì ɲyɛ a mu zòŋi lwɔ́ mɛ.
Wuu la na ɲyɛ ma a saanŋi wà tìŋɛ wuu ɲùŋɔ na,
uru sʼa wuu karigii cwɔɔnre bà supyishiŋi sanŋi puni wuubii ɲyɛ mɛ.»
6 Jwumpe sùpyirʼà jwo na:
«Saanŋi wà tìŋɛ wuu ɲùŋɔ na,
uru sʼa wuu karigii cwɔɔnre ke,»
ka puru si mpɛn Samuwɛli i.
Ka u u Kafooŋi ɲáare.
7 Ka Kafooŋi si Samuwɛli pyi:
«Sùpyire ká yaaga maha yaaga cya mu á ke,
lire pyi pi á.
Mu na bà pi à cyé mɛ,
mii na pi à cyé.
Pi la sàha ɲyɛ mii mpyi pire ɲùŋɔ na mɛ.
8 Mà lwɔ́ mii à pi yige Misira kìni i mà pa nɔ niɲjaa na,
nde pi à pyi mii na ke,
lire shi pi ɲyɛ na mpyi mu na.
Pi à cyé mii na maa kilebii piibɛrii pêre.
9 Ɲɛɛ pi niɲjwuyi na,
ŋka,
saanŋi u sí n-pa n-tɛ̀ɛn pi ɲùŋɔ na ke,
nde u sí raa mpyi pi na ke,
pi sɔ̂nŋʼà yaha pi i li cè.»
10 Jwumpe Kafooŋi à jwo Samuwɛli á ke,
ka u u puru puni jwo sùpyirʼá,
pire mpiimu pi mpyi na saanŋi ɲáare u á ke.
11 U à pi pyi:
«Saanŋi u sí n-tìŋɛ yii ɲùŋɔ na ke,
nde u sí n-pyi yii na ke,
lire li ɲyɛ:
U sí yii jyaabii cû,
si pìi pyi u kàshikwɔnwotorobii fèvee,
si pìi pyi u shwɔnyi fèvee,
bà pire si mpyi sʼa fî u wòtoroŋi yyaha na mɛ.
12 U sí pìi cwɔɔnrɔ,
pire shin maha shin sí n-pyi shiin kampwoo (1.000) ɲùŋɔ na,
lire ɲyɛ mɛ,
shiin beeshuunni nà kɛ kɛ ɲùŋɔ na.
Pìi sí raa u kɛrɛyi fàa,
pìi sí raa u sùmaŋi bégeli.
Pìi sí raa u kàshikwɔnyaayi yaa sʼa kàshikwɔnwotorobii yaayi yaa.
13 U sí yii pworobii cû,
si pìi pyi sìnmpe nùguntangawumpe yaafee,
si pìi pyi sushwɔhɔlii ná bwúuruŋi yaafee.
14 U sí yii kɛrɛyi ná yii ɛrɛzɛn cikooyi ná oliviye cikooyi puni niɲcɛnɲyi shwɔ yii na si ŋkan u kìni yyaha yyére shiinbilʼá.
15 U sí yii sùmaŋi ná yii ɛrɛzɛnŋi niŋkwɔnŋi yáhaŋi shwɔ si ŋkan u pyɛnge báarapyiibii ná kìni yyaha yyére shiinbilʼá.
16 U sí yii bilinambaabii ná bilicyeebii ná yii nàɲjiibii fànhaɲyahaga wuubii ná yii dùfaanɲyi shwɔ yii na,
si ntɛ̀gɛ raa u báaraŋi pyi.
17 U sí yii yatompyɛɛre yáhaŋi shwɔ.
Yii sí n-pyi u bilii.
18 Lire tèni i,
yii sí raa mpaare yii saanŋi niɲcyaŋi yyaha na,
ŋka Kafooŋi sì n-lógo yii ɲwɔ na mɛ.»
19 Ka sùpyire si ɲcyé Samuwɛli jwumpe lógogo maa jwo:
«Li mɛɛ ká mpyi amuni,
wuu la na ɲyɛ saanwa si ntɛ̀ɛn wuu ɲùŋɔ na.
20 Wuu la na ɲyɛ si mpyi supyishiŋi sanŋi puni fiige.
Wuu saanŋi sí raa wuu karigii cwɔɔnre,
si wuu yyaha cû,
si mpyi wuu yyaha yyére shinŋi kàshige tèni i.»