7
Ka Kiriyati-Yeharimu shiinbii si ŋkàrʼa sà Kafooŋi tunmbyaare mbwùuni lwɔ́ a kàre Abinadabu pyɛnge e mpwùuni ɲuŋʼi,
maa u jyaŋi Eliyazare tìŋɛ mà pyi li kàanmucyafooŋi.
Samuwɛli à pyi Izirayɛli shiinbii yukyaaŋi
2 Kafooŋi tunmbyaare mbwùunʼà nɔ Kiriyati-Yeharimu kànhe e ke,
lʼà yyee niɲyagii pyi wani.
Lʼà yyee beɲjaaga pyi wani.
Ɲyɛ ka Izirayɛli shiinbii puni si mɛɛ wà Kafooŋi á.
3 Ka Samuwɛli si Izirayɛli shiinbii puni pyi:
«Ká mpyi yii la ɲyɛ si núru Kafooŋi á ná yii zòmpyaagii puni i,
supyishiŋi sanŋi kilebii ná Asitariti kacyanhigii cyi ɲyɛ yii shwɔhɔlʼe ke,
yii yire puni yige yiye shwɔhɔlʼe yii i ŋkúu Kafooŋi na ná yii zòmpyaagii puni i,
yii raa báare uru kannʼá.
Lire ká mpyi,
u sí yii shwɔ Filisi shiinbii na.
4 Ɲyɛ ka Izirayɛli shiinbii si kacyanhigii baali ná Asitariti lwɔ́ a sà wà,
maa Kafooŋi kanni pêre.»
5 Ka Samuwɛli si jwo:
«Izirayɛli shiinbii puni pi piye bínni Misipa kànhe e,
mii sí Kafooŋi ɲáare yii á.»
6 Ka pi i piye bínni Misipa e,
maa lwɔhe kwó a wu Kafooŋi yyahe taan,
maa súnŋi le kuru canŋke maa jwo:
«Wuu à kapii pyi Kafooŋi na.»
Ka Samuwɛli si ntìŋɛ mà pyi Izirayɛli shiinbii yukyaaŋi Misipa e.
7 Filisi shiinbilʼà lógo na Izirayɛli shiinbilʼà piye bínni Misipa e ke,
ka pi yyaha yyére shiinbii si ŋkàre Izirayɛli shiinbii mɛɛ na.
Izirayɛli shiinbilʼà pi kyaa lógo ke,
ka pi i fyá Filisi shiinbii yyaha na.
8 Ka pi i Samuwɛli pyi:
«Ma hà Kafooŋi wuu Kileŋi ɲarage ɲwɔ yaha mɛ.
U ɲáare wuu á,
u u wuu shwɔ Filisi shiinbii na.»
9 Ka Samuwɛli si jiriŋwɔrɔ mpàbili cû,
maa li puni súugʼa pyi sáraga nizogogo Kafooŋi á,
maa Kafooŋi ɲáara sèlʼe Izirayɛli shiinbii kurugo.
Ka Kafooŋi si u ɲarage shwɔ.
10 Mà Samuwɛli yaha u u sárage nizogoge wwû,
ka Filisi shiinbii si mpa si mpa ɲcwo Izirayɛli shiinbii na.
Ka Kafooŋi si kiletinnɛ nimbwoo cùu Filisi shiinbii ɲuŋʼi kuru canŋke mà pi zòompii kwɔ̀n a cyán.
Ka Izirayɛli shiinbii si jà pi na.
11 Ka Izirayɛli nàmbaabii si fworo Misipa kànhe e,
maa Filisi shiinbii ɲwɔhɔ lwɔ́ maa pi bùu fo mà sà nɔ Bɛti-Kari kànhe taan.
12 Ka Samuwɛli si kafaaga lwɔ́ maa kuru yyéeŋɛ Misipa kànhe ná Sheni kànhe shwɔhɔlʼe,
maa ku mɛgɛ le Ebɛni-Ezɛri,
maa jwo:
«Kafooŋi à wuu tɛ̀gɛ fo mà pa nɔ naha.»
13 Ka lire si Filisi shiinbii sílige,
pi sàha ɲyɛ a jyè Izirayɛli shiinbii taare e mɛ.
Kafooŋi mpyi a tîge Filisi shiinbii ɲuŋʼi Samuwɛli shìŋi puni funŋke e.
14 Filisi shiinbii mpyi a Izirayɛli shiinbii kànyi ɲjemu shwɔ ke,
ka yire si núrʼa kan Izirayɛli shiinbilʼá mà lwɔ́ Ekurɔn na,
fo mà sà nɔ Gati na.
Ka Izirayɛli shiinbii si yire kànyi taare puni kɔ̀rʼa shwɔ Filisi shiinbii na.
Ka yyeɲiŋke mú si mpa Izirayɛli shiinbii ná Amori shiinbii shwɔhɔlʼe.
15 Samuwɛli à pyi Izirayɛli shiinbii yukyaaŋi u shìŋi canmpyaagii puni i.
16 Yyee maha yyee,
u mpyi maha ɲaare Bɛtɛli ná Giligali ná Misipa kànyi shwɔhɔlʼe,
maa Izirayɛli shiinbii karigii cwɔɔnre yire cyeyi puni i.
17 Lire kàntugo,
u mpyi maha núrʼa kàre Arama kànhe e,
wani u pyɛnge mpyi.
U mú mpyi maha Izirayɛli shiinbii karigii cwɔɔnre wani.
U mpyi a sáraya tawwugo yaa Kafooŋi á wani.