Kile tunmbyaare mbwùuni na ɲyɛ Filisi shiinbii yyére
5
Ɲyɛ,
Filisi shiinbii mpyi a Kile tunmbyaare mbwùuni shwɔ Ebɛni-Ezɛri kànhe e maa ŋkàre ná lʼe Azidɔdi kànhe e.
2 Pi à Kile tunmbyaare mbwùuni shwɔ Izirayɛli shiinbii na ke,
maa ŋkàre ná lʼe kacyiinni Dagɔn bage e mà sà yaha Dagɔn taan.
3 Kuru canŋa nùmpanŋa,
Azidɔdi kànhe shiinbii pi à sôlʼa yîri ke,
ka pire si Dagɔn ta u à cwo mà yyahe cyígile Kafooŋi tunmbyaare mbwùuni yyaha yyére.
Ka pi i u lwɔ́ a yaha u cyage e.
4 Kuru canŋa nùmpanŋa,
ka pi i sôlʼa yîri mà sà Dagɔn ta u à cwo sahaŋki mà yyahe cyígile Kafooŋi tunmbyaare mbwùuni yyaha yyére.
U ɲùŋke ná u cyeyi shuunniŋi mpyi a kwɔ̀n a láha u na mà yaha kacinmbage kuɲwuuni na,
u nimpumpuŋke pi à sà nta wani.
5 Lire kurugo,
ali niɲjaa,
Azidɔdi kànhe e,
Dagɔn sunfeebii ná mpii pi maha jyè Dagɔn kacyinmbage e ke,
pire wà ɲyɛ na ɲɛɛgʼa tɔɔge taha kuɲwuuni na mɛ.
6 Ka Kafooŋi si ntîge Azidɔdi shiinbii ɲuŋʼi fànha na,
maa pi kyérege sèlʼe,
maa nɔɔwaara pyi tʼà fworo Azidɔdi ná u kwùumpe kànyi shiinbii na.
7 Azidɔdi shiinbilʼà lire ɲya ke,
maa jwo:
«Izirayɛli shiinbii Kile tunmbyaare mbwùuni sì n-yaha naha wuu yyére mɛ,
ɲaha kurugo yɛ,
Kile na sùgure wuu ná wuu kacyiinni Dagɔn ɲuŋʼi.»
8 Ka pi i tùnntunmii tun pi à sà Filisi shiinbii yyaha yyére shiinbii puni yyere maa pi yíbe:
«Ɲaha shi wuu sí n-pyi ná Izirayɛli shiinbii Kile tunmbyaare mbwùuni i yɛ?»
Ka yyaha yyére shiinbii si pi ɲwɔ shwɔ:
«Lʼà yaa li tugʼa sà yaha Gati kànhe e.»
Ɲyɛ ka pi i li tugʼa kɛ̂ɛnŋɛ wani.
9 Pi à nɔ ná lʼe Gati kànhe e cyage ŋkemu i ke,
ka Kafooŋi si ntîge kuru kànhe shiinbii ɲuŋʼi,
ka pi i fyá sèlʼe.
U à yyefugo nimbwɔhɔ wà pi na,
nàŋkocyaawa bâra shinlye na.
U à nɔɔwaare pyi tʼà fworo kànhe shiinbii puni na.
10 Ka pi i ŋkàre na Kile tunmbyaare mbwùuni i Ekurɔn kànhe e.
Kile tunmbyaare mbwùunʼà nɔ Ekurɔn e ke,
ka kànhe shiinbii si ŋkwúulo maa jwo:
«Yii à pa ná Izirayɛli shiinbii Kile tunmbyaare mbwùuni i naha si mpa wuu ná wuu shiinbii puni bò.»
11 Ka pi i Filisi shiinbii yyaha yyére shiinbii puni yyere maa jwo:
«Yii Izirayɛli shiinbii Kile tunmbyaare mbwùuni núruŋɔ,
yii i li yaha lʼà wà li tayirige e,
lʼàha ŋkwɔ̀ wuu ná wuu shiinbii puni bò mɛ.»
Sèeŋi na,
kànhe sùpyire puni mpyi a sàa fyá.
Kile mpyi a tîge pi ɲuŋʼi sèlʼe.
12 Mpii pi à pyi pi ɲyɛ a kwû mɛ,
nɔɔwaare mpyi a pire yyahayi fwɔhɔrɔ.
Ka kànhe sùpyire tupyaagii si dùgʼa sà nɔ nìɲyiŋi na.