Filisi shiinbilʼà jà Izirayɛli shiinbii na
4
Samuwɛli mpyi maha Kafooŋi jwumpe yu Izirayɛli shiinbii punʼá.
Ka Izirayɛli shiinbii si fworʼa kàre Filisi shiinbii mɛɛ na si sà pi tùn.
Pi à sà pi tatɛɛnge yaa Ebɛni-Ezɛri kànhe taan,
ka Filisi shiinbii si sà pi woge yaa Afɛki kànhe e.
2 Ka Filisi shiinbii si piye bégele kàshige mɛɛ na Izirayɛli shiinbii na,
ka kàshige si sìi.
Ka Filisi shiinbii si jà Izirayɛli shiinbii na,
maa shiin kampwɔhii sicyɛɛre (4.000) fiige bò pi e kuru kàshige e.
3 Pi sanmpilʼà núrʼa kàre pi tatɛɛnge e ke,
ka Izirayɛli shiinbii kacwɔnribii si jwo:
«Ɲaha na Kafooŋi à Filisi shiinbii yaha pi à jà wuu na amɛ niɲjaa yɛ?
Wuu shà Silo kànhe e,
wuu u sà Kafooŋi tunmbyaare mbwùuni lwɔ́ wuu a ma,
li i mpa mpyi wuu shwɔhɔlʼe,
li i wuu shwɔ wuu zàmpɛɛnbii na.»
4 Ka pi i pìi tun Silo e,
pi i sà a ma ná Síŋi foo Kafooŋi tunmbyaare mbwùuni i,
Kafooŋi nintɛɛnŋi sí ɲyɛ sherubɛɛn shuunni shwɔhɔlʼe.
Eli jyaabii shuunniŋi Ɔfini ná Fineyasi mú mpyi wani Kile tunmbyaare mbwùuni taan.
5 Tèni i Kafooŋi tunmbyaare mbwùuni à nɔ kàshikwɔɔnbii tatɛɛnge e ke,
ka Izirayɛli shiinbii puni si ŋkwúulo fànha na,
ná funntangʼe fo ɲìŋkʼà cyɛ̂ɛnnɛ.
6 Filisi shiinbilʼà kuru kwuuge lógo ke,
maa yíbe:
«Kwuuge kʼà fworo Eburu shiinbii kàshikwɔɔnbii tatɛɛnge e ke,
ɲaha shi wogo ki yɛ?»
Ka pi i lógo na Kafooŋi tunmbyaare mbwùuni à nɔ Izirayɛli shiinbii kàshikwɔɔnbii tatɛɛnge e.
7 Ka pi i fyá,
ɲaha kurugo yɛ,
pi à jwo:
«Wuu wuunʼà kɛ̀ɛgɛ,
kileŋi wà à pa Izirayɛli shiinbii kàshikwɔɔnbii tatɛɛnge e.
Lire fiige sàha ntêlʼa pyi mɛ.
8 Wuu wuunʼà kɛ̀ɛgɛ!
Jofoo u sí wuu shwɔ uru fànhaɲyahaga kileŋi na yɛ?
Uru kileŋi u à Misira shiinbii yyahayi fwɔhɔrɔ ná yyefuyi kuuyi shiŋi puni i síwage e.
9 Ɲyɛ,
Filisi shiinbii,
yii yii zòompii tàra yii i yiye pyi nàmbaa,
yii àha ŋkwɔ̀ mpyi Eburu shiinbii bilii,
bà pi à pyi yii bilii mɛ.
Yii yiye pyi nàmbaa,
yii i kàshige kwɔ̀n.»
10 Ka Filisi shiinbii si kàshige yîrige maa jà Izirayɛli shiinbii na.
Ka pi shin maha shin si fê a kàre u pyɛnge e.
Kakyaare mpyi a pêlʼa tòro.
Kàshikwɔɔnbii tɔɔrɔfee kampwɔhii beɲjaaga ná kɛ (30.000) mpyi a bò Izirayɛli shiinbilʼe.
11 Ka Filisi shiinbii si Kile tunmbyaare mbwùuni lwɔ́.
Eli jyaabii shuunniŋi,
Ɔfini ná Fineyasi mú à bò.
Eli ŋkwùŋi
12 Kuru cannuge e,
ka Bezhamɛ tùluge nàŋi wà si fê a yîri kàshige cyage e mà kàre Silo e.
U vàanɲyi mpyi a cwɔn,
u ɲùŋke puni sí ɲyɛ pwoore naa.
13 U à nɔ wani ke,
lirʼà Eli funvwugo wuŋi ta u à tɛ̀ɛn u yatɛɛnŋke e kuni ɲwɔge na,
na kàshige kafɛɛge sigili.
Ɲaha kurugo yɛ,
u funŋke mpyi a sàa pɛn Kile tunmbyaare mbwùuni kyaa na.
Ka nàŋi si jyè kànhe e maa yi yyaha jwo.
Ka kànhe shiinbii puni si wá na ŋkwúuli.
14 Eli à kwuuyi lógo ke,
maa yíbe:
«Mpe tùnmpe puni ɲùŋke ɲyɛ ɲaha shi yɛ?»
Ka nàŋi si ntílʼa nɔ wani maa yi yyaha jwo Eli á.
15 Lirʼà Eli shìŋi ta yyee beecyɛɛre ná kɛ ná baataanre (98).
U ɲyiigii mpyi a cwôro,
ŋka u mpyi na ɲaa mɛ.
16 Ka nàŋi si u pyi:
«Kàshige cyage e mii à yîri.
Wani mii à fê a yîri niɲjaa.»
Ka Eli si u yíbe:
«Ɲaha shi kʼà pyi yɛ na jya?»
17 Ka tùnnture jwufooŋi si u pyi:
«Izirayɛli shiinbilʼà fê Filisi shiinbii yyaha na.
Pi à shinɲyahara bò wuu e.
Mu jyaabii shuunniŋi,
Ɔfini ná Fineyasi mú à bò,
Kile tunmbyaare mbwùuni mú à shwɔ.»
18 Nàŋʼà Kile tunmbyaare mbwùuni zhwoŋi jwo cyage ŋkemu i ke,
ka Eli si yîri u yatɛɛnŋke e mà cwo u tùbuŋi na mà u kàɲyɛkwuunni jya kànhe tajyiɲwɔge na.
U à kwû,
ɲaha kurugo yɛ,
u mpyi a lyɛ,
u mú mpyi a pêe.
U à pyi Izirayɛli shiinbii yukyaaŋi yyee beeshuunni funŋʼi.
Eli napworoŋi ŋkwùŋi
19 Eli napworoŋi u ɲyɛ Fineyasi cwoŋi ke,
uru laa wu u mpyi.
U tèetigini mpyi a nɔ.
Tèni i u à Kile tunmbyaare mbwùuni zhwoŋi lógo maa u natuŋi Eli ná u pooŋi ŋkwùŋi lógo ke,
ka u laani si ntílʼa yîri,
ka u u si.
20 Mà u yaha u u kuro caa,
ka lashwoobii si u pyi:
«Ma hà raa fyáge mɛ,
pùnambile mu naha a si.»
Ŋka u ɲyɛ a jwo ná pi e mɛ,
u kuro bà ɲyɛ a mpyi pi e mɛ.
21 Ka u u pyàŋi mɛgɛ le Ikabɔdi,
lire ɲwɔhe ku ɲyɛ:
«Kile sìnampʼà láha Izirayɛli shiinbii na.»
Kile tunmbyaare mbwùuni zhwoŋi ná u natuŋi ná u pooŋi ŋkwùŋi kyaa na u mpyi.
22 U à jwo:
«Kile sìnampʼà láha Izirayɛli shiinbii na,
ɲaha kurugo yɛ,
Kile tunmbyaare mbwùuni à shwɔ pi na.»