Kile à jwo ná Samuwɛli i
3
Pùnambilini Samuwɛli mpyi na Kafooŋi báaraŋi pyi Eli yyére.
Lire tèni i,
Kafooŋi ɲyɛ a mpyi na yu ná sùpyire e mà ɲyaha mɛ,
u mú ɲyɛ a mpyi na karii cyêre pi na mà ɲyaha mɛ.
2 Eli saha ɲyɛ mpyi na ɲaa sèlʼe mɛ.
U mpyi na ŋko raa mpyi fyin.
Canŋka numpilage e,
u mpyi u tasinnage e,
3 Kile fùkinaŋi mpyi na sàha ŋkwɔ̀ a fùgo mɛ.
Samuwɛli mpyi a sínni na ŋwúunni Kile tunmbyaare mbwùuni taan Kafooŋi bage e.
4 Ka Kafooŋi si Samuwɛli yyere,
ka u u jwo:
«Yo»,
5 maa fê a shà Eli yyére maa sà jwo:
«Mu à mii yyere,
mii u ŋge.»
Ka Eli si jwo:
«Mii ɲyɛ a mu yyere mɛ,
sà sínni.»
Ka Samuwɛli si sà sínni.
6 Ka Kafooŋi si núrʼa Samuwɛli yyere.
Ka u u yîrʼa kàre Eli yyére maa sà u pyi:
«Mu à mii yyere,
mii u ŋge.»
Ka Eli si jwo:
«Mii ɲyɛ a mu yyere mɛ,
sà sínni.»
Ka Samuwɛli si sà sínni.
7 Samuwɛli ɲyɛ a mpyi na sàha ŋkwɔ̀ a Kafooŋi cè mɛ.
Kafooŋi mpyi sàha ntêlʼa jwo ná u e mɛ.
8 Ka Kafooŋi si Samuwɛli yyere tontanrawogo.
Ka u u yîrʼa kàre Eli yyére maa sà u pyi:
«Mu à mii yyere,
mii u ŋge.»
Ka Eli si li cè na Kafooŋi u ɲyɛ na nàɲjiiŋi yiri.
9 Ka Eli si Samuwɛli pyi:
«Sà sínni,
u aha núrʼa mu yyere ma a jwo:
“Ta yu Kafooŋi,
mu báarapyiŋi naha na núru.”»
Ka Samuwɛli si ŋkàrʼa sà sínni u tasinnage e.
10 Ka Kafooŋi si mpa yyére maa núrʼa u yyere tèrigii nintorigii fiige:
«Samuwɛli,
Samuwɛli.»
Ka Samuwɛli si jwo:
«Ta yu,
mu báarapyiŋi naha na núru.»
11 Ka Kafooŋi si Samuwɛli pyi:
«Wíi,
mii sí kyaa pyi Izirayɛli shiinbii shwɔhɔlʼe,
shin maha shin ká li lógo ke,
li sí urufoo kakyanhala sèlʼe.
12 Kuru canŋke ká nɔ,
yaaga maha yaaga mii à jwo Eli ná u pyɛnge kyaa na ke,
mii sí yire puni pyi.
Mii sí ku sìi,
mii sí ku ɲùŋɔ kuu mú.
13 Mii mpyi a yi jwo u á,
mii sí têekwɔmbaa yoge kwɔ̀n u pyɛngɛ shiinbii na u jyaabii kapiini nimpyiini kurugo,
u à lire ndemu cè ná lʼà u jyaabii kyaa pɛn mii á ke.
U ɲyɛ a pi kíbe li na mɛ.
14 Lire kurugo,
mii à kâa ɲjwo kapiini Eli pyɛngɛshiinbilʼà pyi ke,
sáraga lire ɲyɛ mɛ yakanga sì n-sìi n-jà lire yàfa mɛ.»
15 Ka Samuwɛli si sínnʼa yaha fo mà sà ɲyɛ̀ge múgo,
lire kàntugo,
ka u u yîrʼa Kafooŋi bage ɲwɔyi múgo.
U mpyi a fyá si u karigii niɲyagii yyaha jwo Eli á.
16 Ŋka Eli à Samuwɛli yyere maa jwo:
«Mii jyaŋi Samuwɛli.»
Ka Samuwɛli si jwo:
«Yo!»
17 Ka Eli si u yíbe:
«Ɲaha shi Kafooŋi à jwo mu á yɛ?
Ma hà yafyin ŋwɔhɔ na na mɛ.
Ɲje u à jwo mu á ke,
mu aha lire là niŋkin ŋwɔhɔ mii na,
Kile kà ma yaha mɛ.»
18 Ɲyɛ ka Samuwɛli si yi puni yyaha jwo u á fo mà sà ŋkwɔ̀.
Ka Eli si jwo:
«Kafooŋi wi,
nde lʼà táan u á ke,
u lire pyi.»
19 Samuwɛli mpyi na lyɛge,
Kafooŋi si ɲyɛ ná u e.
Mpe Samuwɛli à jwo ke,
Kafooŋi ɲyɛ a puru pà niŋkin yaha pʼà shwɔ a cwo mɛ.
20 Mà lwɔ́ Dan kànhe na mà sà nɔ Bɛrisheba kànhe na,
Izirayɛli shiinbii puni mpyi a yi cè na Samuwɛli à tìŋʼa pyi Kafooŋi tùnntunŋɔ.
21 Kafooŋi mpyi na uye cyêre Silo kànhe e.
Wani Kafooŋi mpyi maha uye cyêre Samuwɛli na maa yu ná u e.