Anɛ à mɛɛ cêe maa fwù kan Kile á
2
Ɲyɛ ka Anɛ si Kile ɲáare maa jwo:
«Kafooŋi à mii zòmbilini ɲî funntange na,
Kafooŋi à mii ɲùŋke yîrige.
Mii ɲwɔgʼà múgo na zàmpɛɛnbii mɛɛ na,
ɲaha kurugo yɛ,
u ntɛ̀gɛŋʼà mii funŋke táan.
2 Kafooŋi cyiin ɲyɛ tufeempe e mɛ,
kileŋi wà sàha ɲyɛ a sìi mu baare e mɛ.
Kafaaga sàha ɲyɛ wuu Kileŋi baare e mɛ.
3 Yii yàmpeente jwumpe yaha,
jwumbwompe kà raa fwore yii ɲwɔyi i mɛ,
ɲaha kurugo yɛ,
Kafooŋi u ɲyɛ karigii puni cèfooŋi Kile.
Uru u sí sùpyire puni sâra si ntàanna ná ti kapyiiŋkilʼe.
4 Fànhaɲyahagafeebii sintaayʼà kyɛɛgɛ,
ka fànhabaafeebii si fànha ta mà tɛ̀gʼa piye cyîbi.
5 Mpii pi mpyi a tìn ke,
pire na báara caa si mpyi si yalyire ta,
kategefeebii sʼà tìn.
Cijiriŋkʼà laɲyɛyɛ baashuunni si,
ka pyìɲyaharafooŋi si mpɔ̂ɔn u pyìibilʼe.
6 Kafooŋi maha boore pyi,
maa ɲcùuŋi pyi.
U maha pìi tîrige kwuu kànhe e,
maa pìi dìrʼa yige wani.
7 Kafooŋi maha sùpyaŋi pyi fòŋɔfoo,
uru mú u maha sùpyaŋi pyi yaarafoo.
Uru u maha sùpyaŋi tîrige,
uru mú u maha sùpyaŋi yîrige.
8 U maha fòŋɔfooŋi yige pwoore e,
maa làbaafooŋi yige kafuntuŋke e,
si pi tìŋɛ shinbwoobii shwɔhɔlʼe.
U sí bwomɔ tatɛɛngɛ kan pi á,
ɲaha kurugo yɛ,
ɲìŋke zúlubii ɲyɛ Kafooŋi wuu,
pire ɲuŋʼi u à diɲyɛŋi tìŋɛ.
9 U sí raa u tàanɲɛɛbii tooyi kàanmucaa,
ŋka shinpiibii sí kakyara numpini i.
Ɲaha kurugo yɛ,
sùpyaŋi ɲyɛ na mpyi javoo u yabiliŋi fànhe cye kurugo mɛ.
10 Kafooŋi zàmpɛɛnbii sí n-cwɔ̀nhɔnɔ,
mà u yaha nìɲyiŋi na,
u sí kiletinni tîrige pi ɲuŋʼi.
Kafooŋi sí yoge kwɔ̀n ɲìŋke puni na.
U sí fànhe kan u shiinbii saanŋʼá,
si fànha le u shincwɔnrɔŋi i.»
11 Lire kàntugo,
ka Elikana si núrʼa kàre u pyɛngɛ Arama kànhe e,
ka pùnambilini Samuwɛli si ŋkwôro sáragawwuŋi Eli yyére Kafooŋi báaraŋi mɛɛ na.
Eli jyaabii kani
12 Eli jyaabii mpyi zòŋkuuyo fee,
pi kuro ɲyɛ a mpyi Kafooŋi i mɛ.
13 Pire sáragawwuubii mpyi maha ndemu pyi sùpyire na ke,
lire li ɲyɛ,
wà ná mpyi a yatɔɔgɔ pyi sáraga,
tèni i tire kyaare na sore ke,
sáragawwuŋi mpyi maha u báarapyiŋi tun ná kyasuŋgwu yaage ŋkyànhii taanre woge e.
14 Uru mpyi maha kyaare súuli na wwû yaage e,
mu à jwo cwooni i,
lire ɲyɛ mɛ cwotiini i,
lire ɲyɛ mɛ peeni i.
Kyasugwu yaage ká ntemu sú a wwû ke,
tire puni mpyi maha mpyi sáragawwuŋi woro.
Izirayɛli shiinbii pi mpyi maha ŋkàre Silo e ke,
lire pi mpyi maha mpyi pire puni na.
15 Mà bâra lire na,
mà jwo pi kyaare sìnmpe súugo ke,
sáragawwuŋi báarapyiŋi mpyi maha sà sárage wwùfooŋi pyi:
«Sáragawwuŋi nàzhan kyaare kan u sà ŋkáa.
Kyaare nimpurure bàare e,
u sì ɲɛɛ kyaare nizhwɔhɔre na mu á mɛ.»
16 Sárage fooŋi ká u pyi:
«Yyére wuu sìnmpe súugo,
maa nta a ma ɲyii woore lwɔ́,»
u maha jwo:
«Ɔnhɔ,
ti kan numɛ,
lire baare e,
mii sí tà lwɔ́ fànhe e.»
17 Pire nàjyiibii kapegigii cye mpyi a tòro Kafooŋi yyahe taan,
ɲaha kurugo yɛ,
pi mpyi a Kafooŋi sárayi ɲjini faha.
Samuwɛli na ɲyɛ Kafooŋi báaraŋi na Silo kànhe e
18 Samuwɛli mpyi na báaraŋi pyi Kafooŋi yyahe taan.
Lire pùnambilini mpyi a sáragawwu vànntinŋɛ le,
dìizinzhiliŋʼà tɛ̀gʼa ŋgemu yaa ke.
19 Yee maha yyee,
Samuwɛli nuŋi mpyi maha vàanntinŋɛ jwoolo u á.
U ná u pooŋi ná mpyi na kɛ̀ɛge yyeeni sárage tawwuge e,
u mpyi maha ŋkàre ná kʼe maha sà ŋkan u á.
20 Eli mpyi maha jwóŋi leni Elikana ná u cwoŋʼá na:
«Kafooŋi u pyìibii piibɛrii kan ma á ŋge ceeŋi na,
ŋge pyàŋi cyaga,
u à uru ŋgemu yaha Kafooŋi yahare e ke.»
Lire kàntugo,
pi mpyi maha núrʼa kàre pi pyɛngɛ.
21 Kafooŋi mpyi a ɲwɔ Anɛ na,
ka u u wá na lahigii taa,
maa pùnampyire taanre ná pùcempyire shuunni si.
Pùnambilini Samuwɛli mpyi na lyɛge Kafooŋi yyahe taan.
Eli à u jyaabii faha
22 Eli mpyi a lyɛ sèlʼe.
Nde u jyaabii mpyi na mpyi Izirayɛli shiinbii puni na ke,
u à yire lógo.
Yʼà jwo u á mú na cyeebii pi ɲyɛ na báare mbìnniŋi vàanŋke bage ɲwɔge na ke,
na u jyaabii mpyi maha wwùu ná pire e.
23 Ka u u pi pyi:
«Ɲaha kurugo yii ɲyɛ na ɲcyii karigii shiŋi pyi yɛ?
Sùpyire punʼà yii kapyiiŋkii nimpegigii jwo mii á.
24 Yii ŋɔ̀ dɛ mii pyìibii!
Ɲje mii ɲyɛ na núru yii kyaa na ke,
niɲcɛnnɛ bà mɛ.
Yii na Kafooŋi sùpyire pyi ti i kapegigii pyi.
25 Sùpya ká kapii pyi u supyiɲɛɛ na,
Kile sí lire cwɔɔnrɔ,
ŋka sùpya ká kapii pyi Kafooŋi na,
jofoo u sí lire kani cwɔɔnrɔ yɛ?»
Ŋka pi ɲyɛ a ɲɛnʼa lógo pi tuŋʼá mɛ,
ɲaha kurugo yɛ,
Kafooŋi la mpyi si pi bò.
26 Pùnambilini Samuwɛli wi ke,
uru mpyi na lyɛge,
u kyaa mpyi a táan Kafooŋi ná sùpyire punʼá.
Nde li sí Eli ná u pyɛnge ta ke
27 Canŋka,
Kile sùpyaŋi wà a shà Eli yyére maa sà u pyi:
«Kafooŋi à jwo:
“Mii ɲyɛ a naye cyêe mu tulyeyi na mà pi yaha bilere e Farɔn cye e Misira kìni i mà?
28 Mii à mu tulyeyi cwɔɔnrɔ Izirayɛli tùluyi puni shwɔhɔlʼe pi raa sáragawwubaaraŋi pyi mii á sʼa sárayi wwû mii sárayi tawwuge e sʼa wusunaŋi súuge,
sʼa sáragawwuvàantinŋke leni mii yyahe taan.
Mii mpyi maha Izirayɛli shiinbii sárayi nizogoyi puni kyaare tà kan mu tulyeyi pyɛngʼá.
29 Mii bage e,
sárayi yi maha súugʼa kan mii à,
ná ɲje sanɲyi yi maha ŋkaan mii á ke,
ɲaha na yii a yire ɲjini faha yɛ?
Ɲaha kurugo mu à ma pyìibii pêe mà tòro mii na,
maa mii shiinbii,
Izirayɛli shiinbii sárayi tacɛnɲyi lyî a tɛ̀gʼa yiye pêe yɛ?”
30 Lire kurugo,
Kafooŋi,
Izirayɛli u Kileŋi à jwo:
“Mii mpyi a jwo na mu pyɛnge ná mu tuŋi pyɛngɛ shiinbii sí raa báaraŋi pyi mii yyahe taan tèrigii puni i.”
Ŋka numɛ,
Kafooŋi à jwo:
“Tire sɔ̀nŋɔre laage ku tɔɔn na na,
ɲaha kurugo yɛ,
ŋgemu ká mii pêe ke,
mii sí urufoo pêe,
ŋka,
ŋgemu ká mii faha ke,
mii sí urufoo faha.
31 Wíi,
tère na ma,
mii sí mu fànhe ná mu tuŋi pyɛngɛ shiinbii fànhe kwɔ̀ fo shinlye sì n-ta mu pyɛnge e mɛ.
32 Mu sí yyefuge nɔfooŋi ɲya mii bage e,
lire ná li wuuni mú i,
Izirayɛli shiinbii sí yyeɲiŋɛ ta.
Ŋka shinlye saha sì n-sìi mpyi mu pyɛnge e mɛ.
33 Mii sí mu tùluge shinŋi wà yaha na sáragawwubaaraŋi na bà lire sí n-pyi si mu yyahe tanha si mu lùuni yîrige sèlʼe mɛ.
Mu tùluge shiinbii kafugowuubii sí raa ŋkwûu.
34 Nde li sí mu jyaabii shuunniŋi,
Ɔfini ná Fineyasi ta ke,
lire sí n-pyi kyaa mu á,
si li cyêe na sèe mii à jwo.
Pi shuunniŋi sí n-kwû canŋa niŋkin i.
35 Mii sí sáragawwuŋi wabɛrɛ tìŋɛ,
ŋgemu u sí raa mii báaraŋi pyi sʼa ɲwɔge ke.
Uru sí raa mii ɲyii wuuni pyi si mii funŋke ɲíŋɛ.
Mii sí baga shiin niɲcɛnmii kan u á,
u sí raa báare mii shincwɔnrɔŋi yyahe taan tèrigii puni i.
36 Shinpaanre ntemu ká ŋkwôro mu pyɛnge e ke,
tire sí raa ma raa pi niŋkure sínni u á sʼa wyɛ́rɛfyinŋi tɔɔnnte ná yalyire ɲáare u á.
Pi sí raa u ɲáare na u pire yaha sáragawwubaaraŋi wà na,
bà pire sí n-pyi si ɲjyipaanra ta si n-lyî mɛ.”»