Samuwɛli Sémeŋi niɲcyiiŋi
Elikana ná u cyeebii kani
1
Nàŋi wà na mpyi Aramatayimu-Sofimu kànhe e Efirayimu ɲaŋkuluni i,
u mɛgɛ mpyi Elikana.
U tuŋi mɛgɛ mpyi Yerohamu,
uru u tuŋi mɛgɛ mpyi Eliwu,
uru u tuŋi mɛgɛ mpyi Towu,
uru u tuŋi mɛgɛ mpyi Sufu,
uru mpyi Efirayimu tùluge shin.
2 Cyee shuunni mpyi uru nàŋʼá.
Wà mɛgɛ mpyi Anɛ,
u sanŋi mɛgɛ sí ɲyɛ Penina.
Pyìi mpyi Penina á,
ŋka pyà ɲyɛ a mpyi Anɛ á mɛ.
3 Yee maha yee,
Elikana mpyi maha yîri u kànhe na maha ŋkàre Silo kànhe e maha sà Síŋi foo Kafooŋi pêe,
maa sáraya wwû u á.
Eli jyaabii shuunniŋi,
Ɔfini ná Fineyasi,
pire pi mpyi na Kafooŋi sárayi ŋgwùŋi báaraŋi pyi wani.
4 Elikana ná mpyi a sáraga wwû canŋke ŋkemu i ke,
u mpyi maha ku kyaare tà kan u cwoŋi Penina ná Penina jyaabii puni ná u pworobii punʼá.
5 Ŋka u mpyi maha Penina nàzhanŋi fiigii shuunni kan Anɛ á,
ɲaha kurugo yɛ,
u kyaa mpyi a táan u á ali mà li ta Kafooŋi mpyi a u pyi cijiriŋɛ.
6 U yiɲcwoŋi Penina mpyi maha ŋkwôro na u ɲùŋke tare si u lùuni yîrige,
ɲaha kurugo yɛ,
Kafooŋi mpyi a u pyi cijiriŋɛ.
7 Li mpyi maha mpyi amuni yyee maha yyee.
Anɛ ná mpyi a kàre Kafooŋi bage e tère o tère e ke,
Penina mpyi maha u ɲùŋke taha.
Lire ká mpyi,
Anɛ maha mɛɛ súu maa ɲcyé si n-lyî.
8 U pooŋi Elikana mpyi maha u pyi:
«Anɛ,
ɲaha kʼà mu lùuni yîrige yɛ?
Ɲaha na mu ɲyɛ na mɛɛ súu yɛ?
Ɲaha na mu à cyé si n-lyî yɛ?
Mii ɲyɛ a pwɔ́rɔ pùnampyire kɛ na mu á mà?»
Anɛ Kile ɲarage
9 Ɲyɛ mà pi yaha Silo kànhe e,
pi à lyî maa bya a kwɔ̀ ke,
ka Anɛ si yîrʼa kàre Kafooŋi bage e,
lirʼà sáragawwuŋi Eli ta u à tɛ̀ɛn u yatɛɛnŋke e Kafooŋi bage ɲwɔge na.
10 Anɛ lùuni mpyi a sàa yîri.
Ka u u mɛɛ sú sèlʼe maa Kafooŋi ɲáare.
11 Ka u u ɲwɔfaaga fáa maa jwo:
«Ei,
Síŋi foo Kafooŋi,
kampyi mu mpyi na sí ɲɛɛ ma bilicwoŋi yyefuge wíi,
kampyi mu mpyi na si ɲɛɛ funŋɔ cwo mii na,
kampyi mu ɲyɛ a funŋɔ wwɔ̀ mii na mɛ,
mu aha pùnambile kan mii á,
mii sí li yaha mu yahare e u shìŋi canmpyaagii puni i.
Ɲùŋkuloyaage sì n-jyè u ɲùŋke e mɛa.»
12 Anɛ à mɔ ɲarage na Kafooŋi yyahe taan ke,
ka Eli si u kàanmucya mà ɲwɔseeyi ɲya yi i ɲyaha.
13 Anɛ mpyi na yu uye funŋʼi,
u ɲwɔseeyi mpyi na ɲyaha,
ŋka u jwumpe mpyi na núru mɛ.
Ka Eli si wá na sɔ̂nŋi na siɲcyan wi.
14 Ka Eli si jwo:
«Ɲaha tère e sinmpe sí n-láha mu na yɛ?
Ta wà yyaha yyére ná ma sinɲcyaanni i.»
15 Ka Anɛ si u ɲwɔ shwɔ:
«Ɔnhɔ,
mii kàfooŋi,
mii na ɲyɛ nàvunŋɔ foo.
Mii ɲyɛ a ɛrɛzɛn sinmɛ,
lire ɲyɛ mɛ,
sinmpe kuuge kà tufiige bya mɛ.
Ŋka,
na funŋɔ karigii puni mii mpyi na mpaare Kafooŋi á.
16 Ma hà raa sɔ̂nŋi na mu bilicwoŋi na ɲyɛ cikuuŋɔ mɛ.
Mii yyefuge nimbwɔhe ná mii nàvunŋke kʼà mii pyi mii à Kile ɲáarʼa mɔ amɛ.»
17 Ɲyɛ ka Eli si jwo:
«Ta sì yyeɲiŋke e,
nde mu à cya Izirayɛli u Kileŋi á ke,
u lire pyi ma á.»
18 Ka Anɛ si jwo:
«Ma bilicwoŋi yaha u ma ɲùmpiŋke ɲya.»
Lire kàntugo,
ka Anɛ si ŋkàre maa sà lyî.
U yyahe sàha ɲyɛ a mpyi a tanha mɛ.
19 Kuru canŋa nùmpanŋa ɲyɛ̀sɔɔge na,
Elikana ná u pyɛngɛshiinbilʼ à kwɔ̀ kileɲarage na ke,
ka pi i kuni lwɔ́ mà kàre pi pyɛnge e Arama kànhe e.
Samuwɛli ziŋi ná u nàŋkocyɛɛre
Ka Elikana si wwɔ̀ ná u cwoŋi Anɛ e,
ka Kafooŋi si funŋɔ cwo Anɛ na.
20 Ka Anɛ si laa ta,
tèrʼà tòro ke,
maa mpa pùnambile si,
maa li mɛgɛ le Samuwɛli.
Ɲaha kurugo yɛ,
u à jwo:
«Mii à u ɲáare Kafooŋi á.»
21 Lire yyee nùmpanŋa na,
ka u pooŋi Elikana ná u pyɛngɛ shiinbii puni si núrʼa kàre Silo e si sà yyeeni sárage wwû Kafooŋi á si u ɲwɔfaage wwû.
22 Ŋka Anɛ ɲyɛ a kàre mɛ,
ɲaha kurugo yɛ,
u à u pooŋi pyi:
«Pyàŋi ká láha jirimpe na,
mii sí n-kàre ná u e si sà ŋkan Kafooŋi á.
U sí n-kwôro wani tèrigii puni i.»
23 Ka u pooŋi Elikana si jwo:
«Nde lʼà táan mu á ke,
lire pyi.
Tɛ̀ɛn ná pyàŋi i naha fo u aha láha jirimpe na.
Li tɛgɛni li ɲyɛ,
nde Kafooŋi à jwo ke,
lire li pyi.»
Ka ceeŋi si ntɛ̀ɛn pyɛnge e maa pyàŋi ɲwɔ cya fo ka u u sà láha jirimpe na.
24 Pyàŋʼà láha jirimpe na ke,
ka u u ŋkàre ná u e Kafooŋi bage e Silo e mà bâra yyee taanre nupee ná farini mbyimpe cúlii beɲjaaga ná kɛ ná ɛrɛzɛn sinmpe seeye boɲyɛgɛ.
Pyàŋi mpyi na sàha lyɛ mɛ.
25 Ka pi i nupeeni bò a pyi sáraga,
maa ŋkàre ná pyàŋi i Eli yyére.
26 Ka Anɛ si jwo:
«Mii kàfooŋi,
maye sanŋa yaha,
mii sí sèeŋi jwo mu á.
Ceeŋi u ná mpyi a pa Kafooŋi ɲáara naha mu ŋkère na canŋka ke,
mii wi.
27 Ŋge pyàŋi mii à ɲáare Kile á.
Yaage mii mpyi a ɲáare Kafooŋi á ke,
u à kuru kan mii á.
28 Mii mú a pa si mpa u kan Kafooŋi á.
U sí n-pyi Kafooŋi wuu u shìŋi puni i.»
Ka pi i niŋkure sín maa Kafooŋi pêe.