Yuusawu 14

[Yaradefanŋe kinxennankutan taxandinde]

Ku ya ni fo be ga da i foyaaxu Kanaana jamaanen ŋa, ke be sadaxakiɲandaana Lajaari ga da i foyaaxu i da, a do Nuunu renme Yuusawu do Banisirayilaganko xabiilanfaabanun yinmanko : 2 i da a foyaaxu ti sokkun ya yi, xo Tunka Duumanten ga koomandi ti annabi Muusa sooxen ŋa, xabiilanu ku kabi da, a do xabiila taxande ke. 3 Baawo Muusa ɲi ga da taqe kini xabiilanu ku filli yi, a do xabiila taxandi baane ke yi kutan ŋa, ganta taqe ma kini Leewikaarankon kun ŋa kafiini kuttu ku yi. 4 Yuusufu renmun ya n ɲa xabiilanu filli : Manaase dunkoonu, a do Hefarayimu dunkoonu. Taqe su ma kini Leewikaarankon kun ŋa jamaane ke yi, ma a ga na ɲa debu yi de : i gaa taaxunu i ya, a do nagaaniranu, i naaburun do i marefoonun da. 5 Moxo ke be Tunka Duumanten ga da Muusa ɲaamari, ken saanan ya ni Banisirayilaganko ga da a ɲa ; i da jamaanen taxandi.

[Kaalebu ɲaageyen do a taqe]

6 Yehuudakaarankon ri Yuusawu sagata Giligaali yi. Yefunne renme Kaalebu, Xeniijiganke ga ni, a ti Yuusawu da : « An wa fon tu, ke be Tunka Duumanten ga da a ko Alla sere annabi Muusa da inke finsaanen kanma, a do anken finsaanen kanma Xadesi-barineeya yi ? 7 N ɲi tannaxate siine ya yi bire be Tunka Duumanten kome Muusa gaa in xayini gilli Xadesi-barineeya yi kuudo n nan daga jamaanen sonsolo. N sondomen ga da fo be koyi in ŋa, n da ken saagandi a da. 8 N waaxinu beenu n do i ga sege doome, ikun da jaman buttun lanpundi. Nke kuŋa, n tuuge ti Tunka Duumanten ŋa, n Alla. 9 Annabi Muusa kuna ken koota yi nan ti : “ Jamaane ke be an tan ga da a tera, ma a ga ɲa an da xalle yi, na a ɲa an renmun xa xalle yi ma abada, baawo an tuuge ti Tunka Duumanten ya yi, n Alla. ” 10 Saasa kuŋa, Tunka Duumanten faayi ga da bireyen ɲaŋi in da xo moxon maxa a ga da a ko tannaxate do siino karagi, Tunka Duumanten na ke digaame kundu ko Muusa da, ken bire Isirayila wa tereene gunjuran ŋa : saasa kuŋa ke lenki, n faayi tansege do siino karagi yi. 11 N lenkinma, n wa koota be Muusa gaa in xayini faaren ŋa senben bakka gajanŋen dagananriyen da saasa. 12 Saasa ke, ke gidinjamaane kini in ŋa, ke be Tunka Duumanten ga digaamu a fin kanma yi a koota, baawo an da a mugu ken koota yi ti wa no, a do debi xoora koorinto. A me wa du Tunka Duumanten wa i boosini i ya n danŋa, xoyi a ga da a daali moxo be. »

13 Yuusawu duwa Yefunne renme Kaalebu da, na Heburoona kini a yi taqe. 14 Ken kanma Heburoona ɲa Xeniijiganke ke taqen ŋa, Yefunne renme Kaalebu, ma ke lenki kundu. Ken ni ya, a ga tuuge ti Tunka Duumanten ŋa, Isirayila Alla. 15 Ken kaane, Heburoona toxon ɲi Xiriyaata-haraaba ya, Hanaaxigankon su seri xoore ni ken Haraaba ya. Jamaanen tuuma gajanŋen ŋa.