[Jamaanen taxandinde]
[Ɲiiɲen kutten rageye]
13
Yuusawu siinon laato,
xasoyen ri a yi.
Tunka Duumanten daali a da :
« Saasa ke,
xasoyen ri an ŋa.
Ɲiiɲa gabe ya n toxo a ga n xawa foyaaxunu harisa.
2 Ke jamaane kundu ya n toxo :
Filisitinun ɲiiɲanbaro ku danmo,
a do Gesuuruganko danman su,
3 gelli Sihooro be gaa Misira jon ŋa,
ma Hexoroona gingen gaa saahelin ŋa,
ken jaatene Kanaanaganko ya.
Filisitinun marayinmun karagi wa non ŋa,
kun ni :
Gaajanko,
Seduudunko,
Saxaloonanko,
Gaatanko,
a do Hexoroonanko.
Haawigankon xa wa
4 banboxun ŋa :
Kanaanagankon jamaanen danman su,
kafiini Meera be gaa Sidoonikaarankon da,
ma Hafeexa,
ma Hamoorikaarankon ginge,
5 Gibiligankon jamaane,
kafiini Libaano muuman su yi kinbakkan ŋa,
gelli Baali-gaadi gaa Herimoona giden wure,
ma Lebo-hanmaati,
6 gidinjamaanen taaxaanon su,
gelli Libaano,
ma Misirifooti-mayime,
Sidoonikaarankon su.
Nke yinme wa a su gengene Banisirayilaganko kaane. Sokkun saxundi* a yi Isirayila da faabanxaye yi tannu, xoyi n ga da an ɲaamari moxo be. 7 Saasa ke,
an na jamaanu ku taxandi faabanxaye yi,
xabiilanu ku kabi do Manaasekaara taxande ke da. »
[Yaradefanŋe kinbakkan xaye]
8 Annabi Muusa da faabantaqe kini [Manaasekaara taxandi baanen ŋa], kafiini Rubeenikaarankon do Gaadikaarankon ŋa, Yaradefanŋe kinbakkankutan ŋa ; i da i faabantaqen kita xo moxon maxa Tunka Duumanten kome Muusa ga da a kini i ya :
9 gelli Haroweera be gaa Harinooni waranlaqen kanben ŋa,
a do debe be gaa waranlaqen ŋa,
a do Meediba siŋanfaren su,
ma Dibooni,
10 a do Sihoona debun danmon su,
Hamoorikaarankon tunka be gaa toorini Hesiboona yi,
ma Hamoonigankon ginge,
11 a do Gilaadi,
do Gesuurugankon do Maxaatigankon ɲiiɲe,
kafiini Herimoona giden su,
do Basaani muuman su,
ma Salika,
12 Wooga mareyu beenu su gaa Basaani yi,
i gaa mareene Sitarooti yi a do Yedeeri.
Lefaayigankon sere kuttun yogo ya ni,
Muusa da i gaja na i xeyimaxakaraba.
13 Gesuuruganko do Maxaatiganko taaxunu Isirayila kaaran ya yi ma lenki ke koota kundu¤ ;
Banisirayilaganko ma i xata.
14 Ganta Leewikaara,
taqe ma kini i ya,
sadaxabuyindaanon ya ni Tunka Duumanten da,
Isirayila Alla,
ken ya ni ikun faabantaqen ŋa,
xoyi a ga koni a da moxo be.
15 Annabi Muusa da Rubeenikaarankon ku,
i fonlaqun lanɲara.
16 I gemu ɲiiɲe be gaa dagana ma Haroweera be gaa Harinooni waranlaqen kanben ŋa,
a do debe be gaa waranlaqe ke noxon ŋa,
a do Meediba siŋanfare ke su ;
17 Hesiboona do i debu beenu su gaa siŋanfare ke kanma :
Dibooni,
Bamooto-baalu,
Beeti-baalu-mowuna,
18 a do Yahaca,
do Xedemooti,
a do Mefaati,
19 a do Xiriyatiimu,
Sibima,
Cereti-sahara gaa guufure ke giden ŋa,
20 a do Beeti-poora,
Pisiga giden jipandanu,
a do Beeti-yesimooti,
21 a do siŋanfaren debun su,
a do Sihoona tunkaaxun danman su,
Hamoorikaarankon tunka be ga ɲi mareene Hesiboona yi.
Muusa da i gaja,
a do Mediyaana yinmanko :
Heewi,
a do Lexeemu,
a do Suuru,
do Huura,
do Reeba,
Sihoona marayinmu,
i taaxunton gaa jamaane ke yi.
22 Booro renme Balaamu,
fontuwaana ke,
Banisirayilaganko da a kari ti kaafan ŋa kapa i seri karinton ŋa.
23 Rubeenikaarankon gingen ɲi Yaradefanŋe ya yi.
Kun ɲiiɲo debi xooron do i debinlenmun ni Rubeenikaarankon faabanxayen ya,
i fonlaqun lanɲara.
24 Annabi Muusa da taqe kini Gaadikaarankon ŋa,
i fonlaqun lanɲara :
25 Yaajere ɲiiɲen ɲaŋi i da,
a do Gilaadi debun danmon su,
a do Hamoonigankon jamaanen taxande,
ma Haroweera be gaa Raaba taŋon ŋa,
26 a do gelli Hesiboona,
ma Raama-micipe do Betoniimu,
gelli Mahanaayimu yi xadi,
ma Lo-dibaari kutiyen ŋa,
27 a do Yaradenguufure noxo :
Beeti-haraama,
Beeti-nimira,
Sukkoti,
a do Safoona,
Sihoona mareyen kutte,
Hesiboona tunkanyugo,
a do Yarade do i fonkaaro,
ma Kinereetixaare xenpa,
Yaradefanŋe ken kuta yi kinbakkan ŋa.
28 Ken ni Gaadikaarankon faabantaqen ya,
i fonlaqen lanɲara,
i debi xooron do i debinlenmu.
29 Annabi Muusa da Manaasekaarankon xabiila taxanden ku,
ken ɲaŋi Manaasekaara taxanden da,
i fonlaqun lanɲara.
30 I kutiyen ɲa gelli Mahanaayimu,
Basaani danman su,
Wooga mareyen danma,
Basaani tunkanyugo,
ken do Yahiiri tandumen debinlenme be gaa Basaani yi ;
31 ken do Gilaadi taxande,
a do Sitarooti do Yedeeri,
Wooga maredebu i gaa Basaani yi,
kun na Maxiirilankon ya da,
i dunkoonun lanɲara,
Manaase bonsonŋu ku,
Maxiirilankon fonlaqi taxande.