45
Yehuuda ga duguta sefen ŋa,
Yuusufu ma kati i du ragana hinneyen ŋa moxo su yi i golliɲaŋaanon jon ŋa,
a da ɲaamariyen kini i n bogu.
A yinme baane toxo do i waaxinu ku yi non ŋa.
Ken moxo yi,
a da i du koyi i ya.
2 Xa,
a wu moxo siri,
ma Misirankon gaa a wuxannen mukku,
na a xibaaren kiɲandi tunkanyugon noqun ŋa.
3 Yuusufu ti i waaxinu ku da :
« Nke ya ni Yuusufu yi !
N faaba wa finna bireene ?
» I toxo sikki,
i ma kati a jaabini.
4 A ti i da :
« Xa tinko in ŋa !
» I tinko a yi,
a ti i da :
« Nke ya ni Yuusufu yi,
axa waaxi,
axa ga da ke be gaaga Misira banŋe.
5 Xa maxa kanu,
xa maxa axa du jalagi nan ti axa da in gaaga ke moxo yi.
Alla yinme ya n da in wara riini axa kaane yere,
kuudo nan kisindindi.
6 A siina fillan ya ni ke,
dullen ga ro jamaane ke yi,
siino karagi tana wa riini,
tipe nta a yi,
fateye nta a yi.
7 Ken ya ni,
Alla ga da inke wara riini axa kaane yere,
na axa kisi dullen ŋa,
axa na bonsonŋen gaben kita ke jamaane yi.
8 Axakun ma inke riiti yere de,
Alla ya n da in riiti yere,
na in ɲa tunkanyugon sere tinkun yinmanken ŋa,
na in ɲa a kan xibaaren finyaaxabagandaanan ŋa,
na in ɲa Misira su yinmanken ŋa.
9 « Saasa,
xa da a jewondi,
axa n daga xibaaren kiɲandi in faaba yi nan ti :
“ An renme Yuusufu ti :
‘ Alla da in ɲa Misira su yinmanken ŋa,
an na a jewondi nan ri in noqun ŋa.
10 An wa taaxunu Goseni maran ŋa,
nke yinme tinkoyen ŋa,
an do an renmun do an kisimaru,
a do an tanmison do naanu,
a do naabure su gaa an maxa.
11 In na an hanmiranfin su kiɲandi an ŋa no,
an do an kaadunkon do an daabanu,
fo wo fo lafi nta axa ragana,
baawo kaawayen siino karagi tana wa falle. ’ ” »
12 Yuusufu ti xadi :
« Axa yaaxen wa in ŋa,
n xoxone Beniyamiina xa yaaxen wa in ŋa,
nke Yuusufu yinme ya da axa faayi sefene.
13 Ken kuŋa,
xa daga in faaba noqu,
sigira xoore ke be gaa in maxa Misira yi yere,
a do axa yinme ga da ke be wari,
na a su laxami a da,
xa do a nan ri yere jawoye. »
14 Yuusufu fanama i xoxone Beniyamiina yi,
i filli su da na me xandunsunbu nan wu.
15 Yuusufu wuyinten da i waaxinu ku kuttun xandunsunbu,
ken falle,
i da a digaamu.
16 Ayiwa,
xibaaren kiɲe tunkanyugon kan ŋa nan ti Yuusufu waaxinun ri Misira.
Tunkanyugon yinme do i wuretaaxaanon ɲaxali ti xibaare ke yi moxo siri.
17 A ti Yuusufu da :
« A ko an waaxinu ku da,
i na i daabanun tiŋandi nan saage dagana Kanaana,
18 kuudo i do i faaba do i kaadunkon su nan ri yere.
N wa i taaxundini jamaanen noqu neemanten ŋa,
i na bire a soxofoonun fo sirun ŋa.
19 I na sinwotoronun wutu dagana,
i do i yaqun do i renmun do i faaba n ri.
20 I n maxa nimisi do fo toxinte su yi no,
baawo i riini taaxu Misira noqu neemanten ya yi. »
21 Isirayila renmu ku daga xoyi a ga koni i da moxo be,
Yuusufu da sinwotoronun do silafandanun kini i ya ti tunkanyugon ɲaamariyen ŋa.
22 A da yiran kurunba kini i baananbe su yi,
xa Beniyamiina,
a da ken xallen ɲa karago yi,
na kamo sikki godo xulle xa kini a yi.
23 A xayindi i faaba xa da :
faru tanmi tiŋanton wa Misira fo sirun ŋa,
faru tanmi tana,
kun tiŋanton wa yillen do buurun do biraadon tanan ŋa silifanda yi.
24 A da i waaxinu ku wara dagana nan ti i n maxa manqanŋe ɲa killen ŋa.
25 I bogu Misira yi nan joofe Kanaana jamaanen ŋa,
i faaba Yaaxuba noqu.
26 I ti a da :
« Yuusufu wa finna bireene,
a du ya ni Misira su yinmanken ŋa.
» Yaaxuba toxo kuurunu,
baawo a saxunte ma ɲi a yi.
27 Xa,
Yuusufu ga da ke be ko i da,
i ga da a su laxami a da bire be,
a do a yinme ga da sinwotoronun wari i wutunden xannen maxa katta Misira yi,
a yonkin saage.
28 A ti :
« Ke wase,
n ntaxa fo wo fo tirindini keeta,
n renme Yuusufu wa bireene.
Yelli in gan na a wari saado in gaa kalla. »