Jopaye 44

Fi falle, Yuusufu da ɲaamariyen kini i kan figumen ŋa nan ti : « Xa da ku sero bootonun faga biraadon haqe be i ga ra wa a wuttu dagana, axa na baane su xaalisin ro a booton ŋa. 2 I su fo tugunne, xa na a xaalisin saaga a yi, nan saage in godoxullinjiranxolle ke roono a booton ŋa. » Yuusufu golliɲaŋaanan da a ɲa ken moxon yi.

3 A yillankaran suxuba fana, i da i do i farun wara dagana. 4 I ga bogu deben ŋa na wucinne ɲa, Yuusufu ti i golliɲaŋaana ke da : « Giri karama, an nan rege i ya, an nan ti i da : “ Axakun xa da manne ɲa kundu, na fo siren tuga ti fo buren ŋa, 5 na o kaman yugon godoxullinjiranxollen fayi, a gaa minni ti ke be yi, a do a gaa i fiinun faayini ti a yi ? Axa da fo buru xoore ɲa ke yi de ! ” »

6 Golliɲaŋaana ke rege i yi na sefe ke saagandi i da. 7 I ti a da : « O yinmanken xa na oku jalagini kundu yi kan moxo ? Hari na o tanga ken ŋa. 8 O ga da xaalisinu be ɲi o bootonun ŋa Kanaana, o do i saage riini. Oku katta xaalisi ma kanŋe fayini an kaman yugon kan ŋa kan moxo yi xadi ? 9 O ga na jiranxolle ke ɲi sere su likken ŋa, o wa ken kaman karini, o kuttun wa ɲaana an da komo yi. » 10 Golliɲaŋaanan ti i da : « A siro, jiranxollen ga na wari i be maxa, ken wa ɲaana in kome yi, kuttun wa wareene. » 11 I xosi i likkun yanqandi karaman ŋa, baane su da i booton raqen wasa. 12 Golliɲaŋaanan da bootonun su faayi, nan joŋa fo xooren xallen ŋa, nan lagari fo tugunnen xallen ŋa. Jiranxollen daga wari Beniyamiina booton ŋa. 13 Ken ga ɲa, i su da i , nan saage na likkun tiŋandi nan daga deben noxon ŋa.

14 Yehuuda do i waaxinun daga Yuusufu kan ŋa, i da a yinme ɲi no, i sujudi a da ɲiiɲen ŋa. 15 Yuusufu ti i da : « Axa da manne ɲa kundu ? Axakun nta a tu nan ti sere be gaa xoyi inke moxo, fi ra nta muqu a kaman ŋa ? » 16 Yehuuda ti : « O kaman yugo, sefe ntaxa oku maxa o gaa a koono, fo wo fo su ntaxa o maxa, o gaa o du xurandini ti a yi, Alla yinme ya n da o fo buren hayiba. Ken kuŋa saasa, o su ni an komon ya yi, o do jiranxollen ga wari ke be booton ŋa. » 17 Yuusufu ti i da : « Hari na in kisi ken ŋa, fin ra nta kiitini kundu, ken ni tooɲanden ya yi. Jiranxollen ga wari ke be maxa, ken ya n toqo yere kome yi, axa kuttun na kisi, nan saage dagana axa faaba noqun ŋa. »

18 Yehuuda tinko Yuusufu yi nan ti a da : « N yinmanke, anken nafa yere lenki, an do su ni baane ya. Ken saabu da, n nta a mulla nan ro an gacen ŋa, haqu toxo in da, sefo wa in maxa na i ko. 19 Koota fanan ŋa, an da o tirindi, selli o faaba gaa bireene, a do selli xoxone tana gaa o maxa. 20 O ti an da : “ O faaba wa bireene, xa a xirisaaxu, xoxone xa wa o maxa, a da ken kita i xirisaaxun ya yi. A na ken ya mulla moxo siri, baawo, ken baane ya n toxo a maxa i baata yaxaren renmun ŋa, ren yugu baanen bono. ” 21 An ti o do a n ri, an wa a mulla na a wari. 22 O ti an da : “ O yinmanke, lemine ke ra nta bakka i faaba wure, ken ga na ɲa tannu, faabe ke wa kalla. ” 23 An ti o do o xoxone ke ga ma ri, an nta o bisimillana. 24 Ken ga ɲa, o saage dagana o faaba noqun ŋa, an xidimandaana ke, an ga da ke be ko, n yinmanke, o da ken koni a da. 25 Bire be, a ga ti o n saage riini biraadoxobe, 26 o ti a da : “ O ra nta riini o xoxonen ga nta do o yi, ken falle, jamaanen yinmanken nta o bisimillana. ” 27 Faabe ke ti o da : “ Axa wa a tu, n kaagunyaxare Raheli da ren yugu filli baane ya kita in da. 28 Baane sanku bakka i ya, n sinmaye gundufo yogo ya n da ken yiga, baawo n maxa a wari hari abada. 29 Axa wa a mulla do ke xa nan daga ! Fo bure nda daga a kita killen ŋa, nke wuyin ga kiɲe noqu be, axa na in karini ti kunpan ŋa ya de ! ”

30 « Ken kanma saasa, n yinmanke, nke katta saagene kan moxo yi katta in faaba yi, leminen ga nta do o yi ? Faabe ke xa yonkin jonginten na ke lemine ya yi. 31 A ga ma daga a wari do o yi, a wa kalla. Ayiwa, a ra nta bakka oku kanma yi, i tini o da ke me yintinxulle kari ti buttunxaasan ŋa ya. 32 Kafiini ke su yi xadi n yinmanke, nke ya n da in yinmen ro lemine ke xaliifan wure n faaba jon ŋa, nan ti a da : “ N do lemine ke ga ma saage riini, an na kutu in ŋa in bireyen wucen su yi. ” 33 Saasa in yinmanke, nke ken wa an ɲaagana, nke wa toqo yere komaaxun ŋa, lemine ke n saage dagana do i gidanu yi. 34 N ra nta saagene moxo su dagana in faaba noqun ŋa, na a toxo lemine ke ga nta do in ŋa. Buttunxaasa be gaa riini saxu in faaba kanma, n ra nta riini ken muɲi. »