Jopaye 43

Dullen wa a kanma nan tallan xoto Kanaana jamaanen ŋa. 2 Bire be Yaaxuba kaadunkon ga duguta naxafa riyinte ke yigeyen ŋa, a ti i ren yugu ku da : « Xa saage dagana biraado tana xobo katta o yi. » 3 Yehuuda ti a da : « N faaba, Misira yinmanken da a xurandi o da, nan ti o ga na daga, o xoxonen ga nta do o yi, i nta o bisimillana. 4 An ga na duŋe Beniyamiina walla do o batte, o wa dagana biraadon xobo riini. 5 An ga ma duŋe xa, o ra nta dagana de, baawo yugon ti i ntaxa o bisimillana, o xoxonen ga nta do o batte. »

6 Faaben ti i da : « Axakun xa da ke golli bure ɲaŋi inke yi manne, nan ti yugon da, xoxone tana wa axa maxa ? » 7 I ti a da : « Yugon yinme ya n da o segesege o kaadunkon xibaaren kanma, nan ti o da : “ Axa faaba wa bireene ba ? Xoxone tana wa axa maxa non ŋa ? ” A ga da o tirindi ku beenu yi, o da kun ya jaabun kini a yi. Oku ra ma ɲi a tuunu nan ti a wa riini ti o do o xoxonen nan ri. »

8 Yehuuda saage tini a da : « N faaba, o xoxone ke wara riini do o batte, o n daga, anken do oku do o leminu, o na bire, ken ga fe, kalle tu nta oku yi de. 9 Nke wa in yinmen roono a wure, an na in tirindi a yi. N do a ga ma saage riini katta an ŋa, n bireyen wucen su yi, an nan kutu in ŋa. 10 Ayiwa, a faayi, o ga n maxa leele, o ra ɲi o ta fillana. » 11 Faabe ke ti i da : « Baawo dagayen ga waajibi keeta, xa da o jamaanen fo siru yogo falla yugo ke yi, xoyi futaadi lamaane, do kanbaren do misikinji, do yaagi lamaane, a do pisitasin do amandi, [kun ni yittirenmu yogo ya.] 12 Axa do xaalisin haqe be ga n xawa dagana, xa da a fillo wutu, axa ga da xaalisinu be ɲi axa bootonun ŋa, xa do i n saage, a ra wa ɲaana i ga mungu ya. 13 Xa da axa xoxonen wutu, axa nan saage katta yugo ke yi. 14 Yelli gan na ke yugo hinnandi axa yi, axa do Simoonu do Beniyamiina gaa saagene riini. Fi be ga na inke xibaaren ŋa : n na karankarajaaxaaxu, ken ni Alla rakuton ya yi. »

15 Yuusufu gidanu da i fallanun wutu, a do yilli jonkon dunfillo. I do i xoxone Beniyamiina daga Misira, Yuusufu noqun ŋa. 16 Yuusufu ga da Beniyamiina wari do i batte, a ti i kan figumen da : « Ku denin noqun ŋa, an na baase xurusi, na yigande dabari, i yaraxatana do in batten ya yi lenki. » 17 Yugo ke da Yuusufu ɲaamariyen ɲa ti i moxon ŋa, nan daga yugu ku tunsi i kaman yugon kan ŋa.

18 Bire be i ga joofe Yuusufu kan ŋa, i kanu. I da a sinma ti i ga da xaalisinu be ɲi i bootonun ŋa i ta fana ke yi, ken ya saabu da ni i ga da i riiti non ŋa, i gaa a mulla nan xenu i ya, na i tooro, na i farun wutu, na i ɲa komo yi. 19 I royinto kan ŋa, i tinko golliɲaŋaana ke yi nan ti a da : 20 « Ee ! O yinmanke, oku ri biraadoxobe yere ta fana, 21 o saaganto, wuron ga ro, o ga yanqa, o ga da o bootonun wasa, baane su xosi xaalisin ɲi i booton ŋa, xa o do a ri ke kille yi xadi. 22 O do xaalisinu tana ri, na biraadon xobo, o nta a tu, sere be ga da xaalisinu ku ro o bootonun noxon ŋa. » 23 A ti i da : « Xa da axa haqilun taaxundi, xa maxa kanu fo wo fo yi. Axa Alla do axa faaba Alla yinme ya n da xaalisin wara axa bootonun ŋa, ken ga fe, nke yinme ya n da axa yillijonkonun taaxundi. »

Ken falle, a da Simoonu bagandi do a nan ri i noqun ŋa. 24 A do waaxinu ku su ri Yuusufu kan ŋa, na jin kini i ya, i na i taanun wanqi, nan saage sokken walla i farun wure. 25 I da fallanun moxon sirondi na Yuusufu riyen dugu kinsigan ŋa, baawo, i da a mugu nan ti i do a wa yaraxatana doome yi non ŋa.

26 Gelli Yuusufu ga ri i noqun ŋa baane, i da fallanu ku kini a yi, na sujudin xenundi a da ɲiiɲen ŋa. 27 Yuusufu da i kuuɲi, na i tirindi : « Axa yugu xasen wa no, axa ga da ke be xibaaren koni in da, a wa bireene ? » 28 I ti a da : « O yinmanke, o faaba, an xidimandaana ke, a wa no, toora su nta a yi. » I saage nan sujudi a da xadi. 29 Yuusufu ga da i yaaxido Beniyamiina wari, a ti i da : « Ke ya ni axa xoxona tugunne be axa ga da a fin ko ba ? » A ti a da : « N lenme, hari na an deema. »

30 Yuusufu ga da i xoxone ke wari, hinneyen xosi yanqa a sondomen ŋa na a yaaxanjin guuji, a da a jewondi roono i konpen ŋa nan wu no. 31 A ga da i yaaxanjin suura, a saage riini, na i wuye ke muxundi, a da ɲaamariyen kini, yiganden nan taxandi. 32 I da Yuusufu yiganden kini a yi i dura, na a waaxinu ku xa wara i dura, Misiranko beenu xirinton ga ni, na kun xa yiganden kini i ya, i dura, i do ra nta yigeene doome, baawo ken kabanten ya ni i diinan ŋa. 33 Yuusufu waaxinu ku gaa a jon ŋa, i da i taaxundi do me batte, i meerabotunto, nan giri sooman ŋa nan daga a wara lagaren ŋa. I yinmenu wa a kanma na me faayi, i kaawafinto. 34 Yuusufu da i yiganden yogo kini i ya, na ken me karago kini Beniyamiina yi, i toxo no, nan mini do Yuusufu yi ma i gaa moonikeene.