[Yaaxuba do i kaadunko misirantaaxen xiisa]
42
1-2 Yaaxuba ga da a mugu ti biraadon wa Misira,
a ti i ren yugu ku da kuŋa :
« Axakun xa toxo yinme yere yi me faayinden ŋa ?
Xa daga naxafa xobe o da non ŋa,
o na a yiga nan toxo bireyen ken ken ŋa. »
3 Ken moxo,
Yuusufu gidayugu ku tanmi daga biraadoxobe Misira.
4 Xa Yaaxuba ma duŋe Yuusufu yaaxido Beniyamiina walla dagana,
a kanna fo bure n maxa daga a kita ya.
5 Isirayila renmu ku do yillixobaano tananu kiɲe doome yi Misira,
baawo dullen ɲi Kanaana ɲiiɲen su ya yi.
6 Yuusufu ya ni jamaanen yinmanken ŋa,
a ya ni biraadon gaagana jamaanen lenmen su yi.
A waaxinu ku ga joofe,
i sujudi a da ɲiiɲen ŋa.
7 Yuusufu ga da i waaxinu ku wari,
a da i tu,
xa a ma duŋe tuwanlenmaaxu n bogu i do me naxa.
A tirindindinxotaaxu ti i ya :
« Axakun giri minna ?
» I ti a da :
« O yinmanke,
oku giri Kanaana jamaanen ya yi,
o ri biraadoxobe ya. »
8 Yuusufu da i waaxinu ku tu,
xa ikun ma aken tu.
9 Ken ga ɲaŋi,
Yuusufu haqilen yanqa,
i ga da kuyi ke be wari i xibaaren kanma.
A ti i da xadi :
« Axakun ni sonsolondaanon ya yi,
axa ri yere na o jamaanen gudarafiinun ya yaaxen mundu. »
10 I ti a da :
« O yinmanke,
o ma ri ken ŋa,
o ri biraadoxobe ya tannu.
11 Oku su ni yugu baanen renmun ya yi,
seri soobon ya na o yi,
o feti sonsolondaano. »
12 Yuusufu ti i da :
« Ke feti tonŋu yi,
axa ri jamaanen gudarafiinun ya yaaxen mundu. »
13 I ti :
« O yinmanke,
ken fe de,
oku su ni yugu baanen renmun ya yi,
o bakka Kanaana ya,
o yugu tanmi do fillo ya ni,
xa fo tugunnen toxo o faaba wure,
baane tana ɲi no,
ken ntaxa no. »
14 Yuusufu ti i da :
« N ga da ke be ko ya ni haxiixan ŋa,
sonsolondaanon ya ni axa yi,
15 xa,
n wa riini axa segesege :
n kuna ti tunkanyugon birantaaxun ŋa,
axa nta bakka yere axa xoxona tugunne ke ga ma ri.
16 Xa da baane wara do a batte,
kuttun wa toqo kason ŋa yere.
Ken noxon ŋa,
n na axa sefon segesege,
gelli axa gaa ku beenu koono,
tonŋu ga ni.
Fin ga ma ɲa kundu ya,
n wa kunana ti sonsolondaanon ya ni axa yi. »
17 Ken moxo,
Yuusufu da i raqun texe kason ŋa bito sikki.
18 Bita sikkandin koota,
a ti i da :
« Nke ni allankannaanan ya yi,
n gaa riini haqilalla be ko axa da,
xa da a golli,
axa na kisi.
19 Gelli axa ga ni seri xullu yi,
baane n toxo axa yi kasonkan ŋa,
kuttun nan daga biraadon tunsi kan ŋa,
baawo dullen waxatin ya ni,
20 nan saage riini ti axa xoxona tugunne ke yi,
ken ŋa,
n wa saqa axa digaamun ŋa,
axa na kisi kallen xa yi.
» I duŋe ke haqilalla yi.
21 Ken falle,
i ti me da :
« O faayi ga yanganxate ya,
o ga da ke be ɲa o xoxonen ŋa,
a ga ɲi tooran ŋa,
a ga laxaraxaasa katta o yi,
o ga ma a terinka,
saasa,
oku xa faayi ken toora ya yi. »
22 Rubeeni saage nan ti i da :
« N ma a ko axa da nan ti axa n maxa fo bure ɲa Yuusufu yi ?
Xa,
axa ma in terinka,
ayiwa a faayi lenki,
a kallen tugaadin faayi ga waajibe o yi. »
23 I ma ɲi a tu ti Yuusufu wa i xanne ke mukku,
baawo xannediyandan ya n ɲi i naxa.
24 Yuusufu laato bakka i ya nan daga wu,
nan saage riini sefe i da,
na Simoonu wutu i ya na a raqen texe i siginton jon ŋa.
25 Yuusufu da ɲaamariyen kini golliɲaŋaanon ŋa,
i na i gidanu bootonun faga yillen ŋa,
na baane su xaalisin saaga a yi,
na a ro a booton ŋa,
na silifandan xa kini i ya.
I da golle ke ɲa ken moxo yi.
26 Yuusufu gidanu da i farun tiŋandi yillen ŋa nan daga.
27 Bire be,
i gaa tuumana wuron ŋa,
baane da i booton laqen wasa,
a wa a mulla na yille kini i faren ŋa,
a xosi i xaalisin ɲi i booton noxon ŋa.
28 A ti i waaxinun da :
« Ee !
I da inke xaalisin saaga in ŋa kooyi,
a faayi in booton ŋa yere.
» Ken ga ɲaŋi,
i kanu nan saralle,
nan ti me da :
« Alla da manne ɲaŋi o yi kundu ? »
29 I ga kiɲe Kanaana yi bire be,
i faaba Yaaxuba noqun ŋa,
fo wo fo su ga ɲa,
i da a su laxami a da,
nan ti :
30 « Yugo be ga ni jamaanen yinmanken ŋa,
a da o fiinun xotondi o maxa,
baawo a da o sinma sonsolondaano ya yi,
i jamaanen ŋa.
31 O ti a da :
“ Oku ni seri soobon ya yi,
o feti sonsolondaano yi.
32 O ni ren yugu tanmi do fillo ya yi,
o su ni faaba baane ya yi,
baane ntaxa no,
fo tugunnen xa toxo o faaba wure Kanaana. ”
33 Yugo ke ti o da,
i wa a mulla na a tu,
gelli tonŋunton ya ga na o yi,
ken kuŋa,
o na sere baane toxo no,
kuttun nan ri biraadon tunsi kaadunkon ŋa,
34 i do o xoxona tugunnen na saage riini,
ken ga na ɲa,
i wa saqa a yi nan ti sonsolondaano feti o yi,
tonŋunton ya ni o yi,
i wa o waaxi Simoonu xa saagana o yi,
o ra wa yaalanŋa jamaanen ŋa xa,
na o haajunun yaaxe bagandi. »
35 Ken falle,
i ga da yillen jurumi,
baane su da i xaalisin ɲi booton ŋa,
i do i faaba ga da xaalisinu ku wari,
i su kanu.
36 Yaaxuba ti i da :
« Ken kuŋa,
axa na a mulla na inke renmun su raga in ŋa ya ba ?
Yuusufu ken sanku,
Simoonu xa ntaxa yere,
axa na a mulla na Beniyamiina xa raga in ŋa ya ba ?
Ken toora ken su saagene katta in ya yi. »
37 Rubeeni ti a da :
« A xaliifi inke yi,
n do a wa saagene riini katta an ŋa,
ken ga ma ɲa,
an na in ren yugun filli su kari. »
38 Yaaxuba ti :
« Aayi,
n renmen nta dagana do axa yi,
a gida bono,
aken baane ya n toxo in maxa,
fo bure nda daga a kita killen ŋa,
n wuyin ga kiɲe noqu be,
axa na in kari kunpan ŋa. »