41
Siino filli dangi falle, Misira tunkanyugon kuyi i gaa Niili¤ xannen ŋa,
2 na a toxo non ŋa,
na kati siru ɲeri xosi bogu fanŋe ke yi,
i gaa fanxanne ke sokken yigana.
3 Ken falle,
naanu ɲeri tana bogu fanŋe ke yi,
i xuumanton ŋariɲanŋu,
nan sigi baanu ku kaaran ŋa fanlaqe ke yi.
4 Na xuumanta ŋariɲanŋu ku da fo kati siru ku ɲeri yiga.
Tunkanyugon xosi heje.
5 A saage xenqene nan kuyi xadi :
a xosi a wari,
jogodo ɲeri gaa funtini bakka kani baane yi,
i fakkon faranparo.
6 Ken falle,
jogodi miso ɲeri tana funti,
forofolli teyen ga da i kaawandi.
7 Jogodi misi kaawanto ku da fo siri fakko ku toni.
Tunkanyugon xosi wundi,
jaaxa kuyin ya ni.
8 Tunkanyugo ke kanu kuyi ke yi,
a yillankaran suxuba,
a da Misira korotindaanon do a fontuwaanon su kafu me yi,
na i kuyinu ku laxami i da,
xa sere su ma kati kuyi ke fasarini a da.
9 Ken ga ɲaŋi,
minifoonun koorosindaanan da sefen wutu nan ti tunkanyugo ke da :
« N yinmanke,
lenki ya ni inke ga sinme in fo buren ŋa.
10 Koota yogo,
an demu buttu in do buurukataanon koorosindaanan wure,
na o raqun texe tangandaanon yinmanken kasonkan ŋa.
11 O filli su kuyi wuru baane noxon ŋa,
kuyinu ku baananbe su do i wure ya ni.
12 Habaraanigankan yaxanbaane yogo ɲi do o batten ŋa kasonka ke yi, tangandaanon yinmanken komen ya ni, o da o kuyinu ku laxami ken da, a da baananbe su xallen fasari a da. 13 A ga da i fasari moxo ke be,
i su ɲa ken moxonne ya yi :
i da inke saaga in gollen ŋa,
na buurukataanon koorosindaanan jongintankari. »
14 Tunkanyugon da faaren wara dagana do Yuusufu yi.
I da a bagandi kason ŋa karama,
a da i yinmen siyi na i yiraamun faraaxu,
nan daga tunkanyugon noqun ŋa.
15 Tunkanyugo ke ti Yuusufu da :
« N da kuyi yogo ya wari,
sere su ma kati a wure koono in da,
xa in da a mugu nan ti anken ga na kuyin mugu baane,
an wa a wure tuunu. »
16 Yuusufu ti tunkanyugon da :
« N yinmanke,
nke feti kuyinfasarindaana yi de,
Alla ya n riini an kuyi ke fasaren haxiixan koni an da. »
17 Tunkanyugon ti a da :
« N kuyi ya,
n gaa sikki Niili xannen ŋa,
18 na kati siru ɲeri xosi bogu fanŋe ke yi,
i gaa fanlaqe ke sokken yigana.
19 Ken falle,
naanu ɲeri tana ri ti i falle,
i xuumanton ŋariɲanŋu,
n ma demu na i alihaala buren me wari Misira jamaanen ŋa.
20 I xosi fana kato ku yiga.
21 I da i toni roono i kuusun ŋa,
ayiwa,
o ma a tu nan ti i da fo yinme yiga,
a ma fo wo fo su bogu i xuumayen ŋa.
Ken ga ɲaŋi,
n heje.
22 « Ken dangi falle,
n saage kuyi tana walla :
jogodo ɲeri ya n funti bakka kani baane yi,
i fakkon faranparo.
23 Ken falle jogodo ɲeri tana funti kun falle,
i miso,
forofolli teyen ga da i xurumindi.
24 Jogodi miso ku ɲeri da jogodi fakka siru ku ɲeri yiga.
N da kuyi ke laxami korotindaanon da,
sere su ma kati a wure koono in da. »
25 Yuusufu ti tunkanyugon da :
« N yinmanke,
an kuyinu ku filli su wure ni baane ya.
Alla gaa riini fi be ɲa,
a da ken ya taagumansa an da.
26 Na kato ku ɲeri do jogodo fakko ku ɲeri na siino ɲeri ya koyini,
wure baane ya ni.
27 Na xuumanto ku ɲeri do jogodo miso ku ɲeri,
kun na dullen siino ɲeri ya koyini.
28 N gaa ke be koono an da,
haxiixan ya ni :
Alla gaa riini ke be ɲa,
a da ken ya koyi an ŋa.
29 Ku siino ɲeri be faayi riini,
i wa ɲaana jin siinon ŋa Misira jamaanen su yi.
30 Ken falle,
dullen siinon ɲeri wa riini,
fo wo fo su ga kite siina danginto ku yi,
a su wa yigeene nan ɲeme,
dullen wa jamaanen bonondini.
31 Dulle ke wa xotoono,
o ntaxa hari jin siino ku neeman taagumanse walla keeta.
32 Alla fanqe fi ke ɲanŋen kanma,
ken ya saabu da,
a ga da kuyi ke koyi an ŋa ta fillo.
33 « Ken kuŋa saasa,
an na seri haqilante ya muurunu,
fontuwaana,
na a ɲa yinmanke yi Misira,
34 nan saage na golliɲaŋaanon wutu,
naxafa be nda kite kitaye ke siinon ŋa,
i na ken taxandi karangan wutu,
35 i na siina siru ku ɲeri naxafan su kafu me yi debi xooron ŋa,
na yillen kafu me yi na a ɲa kaanataaxaado yi ti an ɲaamariyen ŋa.
36 Dullen siinon ɲeri na a ɲi biraadon gaben sawunten wa Misira,
a na kisi dullen bonondinden ŋa. »
[Yuusufu ɲanŋe Misira yinmanken ŋa]
37 Yuusufu haqililan liŋo tunkanyugon do i wuretaaxaanon su da.
38 A ti i wuretaaxaanon da :
« An ti oku ra wa sere tana kitta,
Alla ga da haqili siren kini a yi xo ke yugo moxo ? »
39 Ken falle,
a ti Yuusufu da :
« Xoyi Alla ga da an sondontuyindi ke su yi,
ken kuŋa,
sere su nta du yi,
ke be ga n haqilanta anken ŋa,
ma a ga n fintuwaaxunta an ŋa.
40 Anken ya n ɲaana in fanka ke fi su yaaxabagandaanan ŋa,
jamaanen lenmen su mereyen wa kiniini an ŋa,
ma a ganta in tunkanyugaaxu ke xiima,
ken gaa in walla an kaane.
41 Saasa,
n wa Misira jamaanen su mereyen kinni an ŋa. »
42 A da tunkandoroman¤ bogu i kitten ŋa na a ro Yuusufu kitten ŋa,
na a sansandi ti hariirin yiraamun ŋa,
na kanjellen ro a xannen ŋa.
43 A da a setundi wotoro xerexerenti fillandin ŋa,
na wuraanon wara do a batte,
i gaa xiribeene nan ti :
« Xa da killen wara !
Xa da killen wara !
»
Tunkanyugon da a ɲa Misira su yinmanken ŋa kundu ya.
44 A saage tini Yuusufu da :
« Nke ya ni tunkanyugon ŋa,
ken darontaaxun wa toqo in kanma,
xa jamaanen kutte,
sere su ra nta doronxude haqe wuttu an ɲaamarinden falle. »
45-46 Tunkanyugon da misirankantoxon saxu a yi,
na a xiri Safunaati-paana,
na Wosinaati kini a yi yaqe,
diinan yinmanke Poti-feera ren yaxaren ya ni,
bakka Wooni deben ŋa.
Yuusufu gaa riini Misira tunkanyugon banŋen ŋa,
a wuyin ni tanjikke siine ya yi.
A bogu tunkanyugon noqun ŋa,
na jamaanen su wura.
47 Kiteye ke siinon ɲeri noxon ŋa,
soxoɲiiɲen da naxafan gaben bagandi.
48 Kun siino ɲeri noxon ŋa,
Yuusufu wa biraadon kapa me yi,
a wa dabbaayun xallun riitini debi xoore be ga n tinka,
na i sawu maron ŋa no.
49 A da yillen gaben kafu me yi,
xo seyijuran moxo,
a ra nta hari jaatene gaboyen maxa.
50 Saado dullen gaa jopene,
Yuusufu yaqe Wosinaati saare a da ti ren yugu filli.
51 Yuusufu da sooman toxora Manaase,
[a wure ga ni :
« nan mungu »],
baawo a ti :
« Alla da in mungundi in yaaxandunbun do in faabankan su yi. »
52 A da fillandin toxora Hefarayimu,
[a wure ga ni « nan jiidi »],
nan ti :
« Alla da in jiidi jamaane ke be in ga liixi a yi. »
53 Bire be kiteyen siinon ɲeri ga tinme,
54 kaawayen siinon ɲeri jope xo Yuusufu ga da a ko moxo be.
Dullen ro jamaanun su yi,
xa biraadon sawunten wa Misira jamaanen ŋa.
55 Dullen ga jope Misirankon ragana,
i wa dagana laxaraxaasa tunkanyugon ŋa,
a na ti i da :
« Xa daga katta Yuusufu yi,
a ga na ke be ko axa da,
axa na ken dabari. »