[Kuyunun fasarinde]
40
1-3 Waxati dangi falle,
Misira tunkanyugon minifoonun koorosindaanan do a buurukataanon koorosindaanan¤ da golli bure ɲaŋi a yi. A butu ku golliɲaŋaana xooro filli wure, na i raqun texe tangandaanon yinmanken kasonkan ŋa, Yuusufu gaa noqu ke be. 4 Tangandaanon yinmanken da i fin su xaliifa Yuusufu yi.
I ga da wuce ɲa kaso ke yi,
5 wuro yogo,
minifoonun koorosindaanan do buurukataanon koorosindaana,
i filli su kuyi.
Kuyinu ku du baananbe su do i wure ya ni.
6 A suxuba,
Yuusufu ga ri i xanta,
a da a tu nan ti fo yogo kunpan wa i ya.
7 A ti i da :
« Manne xa kunpa ni axa yi kundu lenki ? »
8 I ti a da :
« O baananbe su kuyi ya de,
ayiwa,
sere xa nta yere,
ke be ga ra wa i wure koono o da.
» Yuusufu ti i da :
« Alla ya ni kuyin wure tuwaanan ŋa,
xa da axa kuyinun moxon ko in da,
n na i mugu. »
9 Minifoonun koorosindaanan da i kuyin laxami a da nan ti : « Nke kuyi reesetinŋe ya yi.
10 Reesetinŋe ke,
kingu sikki wa a yi,
gelli i ga niri baane,
i fuugu na konbo moyinton bagandi.
11 Ken da a ɲi tunkanyugon minixollen wa in kitten ŋa,
n xosi reese ke yogo fata na a bolli roono minixolle ke yi,
na a kini tunkanyugon ŋa. »
12 Yuusufu ti a da :
« An kuyin wure faayi :
kingu ku sikki na bito sikki ya koyini.
13 Bito sikki noxo,
tunkanyugon wa riini an yinmarawutu,
a wa an saagana an gollen ŋa,
an wa saagene a minindini xoyi an ga ɲi a ɲaana moxo be.
14 Ayiwa,
fiinun moxon ga na siro,
maxa mungu in ŋa de,
an na in fin ko tunkanyugon da,
n gaa bakka kaso ke yi moxo be.
15 N karabanten ya n ri bakka Habaraanigankon jamaanen ŋa, ayiwa yere xa be ga ni, n ma kasorogolle ɲa. »16 Bire be buurukataanon koorosindaanan ga da a wari,
Yuusufu ga da kuyi ke wure ko na a sirondi,
a xa ti :
« N xa kuyi,
kuyi ke noxo,
tufullinkando sikki ya na in yinmen ŋa.
17 Kanda kanmudunken fakkan na tufulle be tunkanyugon gaa a mulla moxo siri ya,
xa yeliŋun wa a kanma nan ri sopindi kande ke yi in yinmen ŋa. »
18 Yuusufu ti a da :
« An kuyin wure faayi :
kando ku sikki wure ni bito sikki ya.
19 Bito sikki noxo,
tunkanyugon wa riini an yinmen wutu bakka an xannun ŋa na an jongi yitten ŋa,
yeliŋun wa an tiyen yigana. »
20 A bita sikkindi,
tunkanyugon da waliima xoore dabari,
i saarayen siinanyillan saabu da,
na i seri tinken su xiri a yi.
A su jon ŋa,
a da minifoonun koorosindaanan do buurukataanon koorosindaanan bagandi kason ŋa.
21 A da fanan saaga i gollen ŋa,
a n toxo i minindini,
22 xa a da fillandin jongintankari.
Fiinu ku su ɲaŋi xoyi Yuusufu ga da i fasari moxo be.
23 Ke su kanma,
minifoonun koorosindaanan mungu Yuusufu yi pewu.