[Yuusufu do i kaman yugon yaqen xibaare]
39
Sumaayilaganko be do Yuusufu ga daga Misira,
i da a gaaga Potifaari yi,
ken ga ni Misira tunkanyugon seri saxiironte yi, tangandaanon yinmanken xa ya ni. 2 Tunka Duumanten wa do Yuusufu batte,
ken saabu da,
a wa wasayen kitana i fiinun su yi.
A gollini i kaman yugo ke yinme kan ya yi,
Misiranke ke.
3 Ken xa da a tu ti Tunka Duumanten wa do Yuusufu batte,
a wa a fi ɲaŋunten su sirondini a kitten ŋa.
4 Potifaari ɲaxali ti a yi moxo siri,
a da a wara i yinme golli xerexerenton ya yi,
na i kaanuxudungollun do i naaburen su xibaaren toxo a maxa.
5 Gelli ken waxati,
Tunka Duumanten da Misiranke ke fiinun su barekindi,
a kaanuxudunfiinun do a teenun xibaarun su bareki Yuusufu saabu da.
6 Ken ya saabu da,
Potifaari ga da i mareefon su toxo Yuusufu kitten ŋa :
a yinme ntaxa fo wo fo ɲaana keeta,
ma a yinme gaa yigande be yigana.
Yuusufu ni yaxanban faranpari nooronte ya.
7 Wuce dangi falle,
a kaman yugon yaqen jaarabe a yi,
a ti a n ri saxu do i ya.
8 Yuusufu ti a da :
« Nke nta ke ɲaana abada,
an da a wari,
n kaman yugon da saxiiraaxun ro in kanma,
na i naaburen su toxo in maxa,
a yinme ntaxa katiini fo wo fo yi.
9 Fankamaaxun nta sere su maxa diina in ŋa ka ke yi,
a da fon su laawara in da,
a ga feti anken baane,
baawo anken ni a yaqen ya yi.
Ken kuŋa,
nke katta ke fo bure ɲaana kan moxo yi,
nan saage Alla yinme kutana ? »
10 Koota su,
a wa Yuusufu laxadujagana,
xa Yuusufu ma duŋe a maxa.
11 Koota yogo,
Yuusufu ro kan ŋa kuudo i na i gollun dabari,
ken da a ɲi,
sere su nta kan ŋa.
12 Yaxare ke da a raga ti i doroken ŋa,
nan ti a da :
« Yeli o n saxu !
» Yuusufu buusi bakka i doroken ŋa,
na a toxo a maxa,
nan wuru bakka konpen ŋa.
13 A ga da a wari,
nan ti Yuusufu wuru na i doroken toxo i maxa,
14 a xosi xaaru,
na kaanuxudungolliɲaŋaanon xiri,
nan ti i da :
« Ee,
axa ma a wari in kiina ga da Habaraaniganka yugunne be wara yere, a gaa a mulla nan yaaxaraxura in ŋa ! A ri katta in ŋa, a ɲi a mulla nan soxu do in ŋa ya, xa, n xaaru, 15 a ga da in xaaru xanne mugu,
a wuru dagana sellan ŋa na i doroken toxo in maxa. »
16 A da Yuusufu doroke ke toxo saqa i kaaran ŋa,
ma kiinen gaa riini.
17 Ken moxo,
a da xiisa ke laxami kiinen da nan ti :
« An ga da Habaraaniganka komo yugo be wara yere,
a ɲi xenne in ŋa.
18 Xa gelli in ga xaaru nan xirindi,
a wuru na i doroken toxo in maxa. »
19 Yuusufu kaman yugon ga da fi ke laxaminten mugu yaxare ke yi,
nan ti i komo yugon ɲi ke golle ɲaana,
a butu moxo buru.
20 A da Yuusufu raga na a ro kason ŋa nan dalla,
tunkanyugon yinme seri raganton gaa kaso be.
21 Tunka Duumanten ɲa do Yuusufu batten ŋa non xa yi.
A da a neema,
na a fin liŋondi kason yinmanken da.
22 Ken xa da kasorankon xibaaren su kini a yi.
Kasorankon ga n xawa golle su ɲaana,
a su yinmankaaxun na Yuusufu ya maxa.
23 Kasonkan yinmanken ntaxa katiini golle su yi keeta,
baawo Tunka Duumanten wa do Yuusufu batte,
a wa a golli ɲaŋunten su sirondini a kitten ŋa.