[Yehuuda do Tamara xiisa]
38
Ken waxati yi,
Yehuuda giri i waaxinu ku yi,
nan daga taaxu Dullaaminke yogo noqun ŋa,
ken toxon ga ni Hiira.
2 Kanaanaganke yogo,
a toxon ga ni Suuwa,
a da ken renyaxaren muuru non ŋa,
na a yaxi.
3 A da noxon wutu nan saare ti renyugo yi,
Yehuuda da a toxora Heeri.
4 Yaxare ke da renyugo tana kita,
na a toxora Wonaani.
5 A da renyugo tana kita,
na a toxora Seela.
Ken gaa saarene,
a na Kejiibu ya yi.
6 Yehuuda da yaxare yaxi i sooma Heeri da,
a toxon ni Tamara.
7 Heeri jikkunloxaaxun saabu da,
Tunka Duumanten da a kari.
8 Ken bire,
Yehuuda ti Wonaani da :
« An be ga ni furen waaxin ŋa,
an ya na a yaqen saagandini,
kuudo an na funtifo toxo fure ke da. »
9 Wonaani wa a tu nan ti i ga na renmu beenu kita yaxare ke yi,
i nta ɲaana ike renmu yi.
Ken saabu da,
saqanlenmaaxun noxon ŋa,
a na i manin joqo ɲiiɲen ya yi,
kuudo i n maxa funtifo toxo i gida yugo ke da.
10 Ke golli ɲaŋunte ma liŋo Tunka Duumanten da.
Ken saabu da,
a da a xa kari.
11 Ken kuŋa,
Yehuuda ti i kallu yaxare Tamara da :
« Toxo an faaba kan ŋa saado in renyugo Seela gaa xoorono baawo kiinakariidon ya ni an ŋa.
» Baawo Yehuuda wa a tini i noxoodu :
« N ga na a kini ke xa yi,
a xa kalla xoyi i gidanu moxon ya.
» Tamara daga taaxu i faaba kan ŋa.
12 Waxati dangi falle,
Yehuuda yaqe,
ken ga ni Suuwa renyaxare ke yi,
a faati.
Bire be kallen sunon ga waxi a yi,
a do i menjanŋe Hiira Dullaaminke daga Timinata,
i jaxaxesaanon noqu¤.
13 I da Tamara xibaari ti a kallu yugon daga i jaxon xesu Timinata yi.
14 Ken ga ɲa,
Tamara da i furujanyiraamun bagandi,
na sangayiraamun rondi,
na xufan xufu i du yi,
nan daga taaxu Henaayimu roraqen ŋa,
Timinata kille.
A wa a tu xa ti Seela ɲa yaxanbaane yi,
i xa ma i yaxindi a yi.
15 Yehuuda ga da a wari,
a da a sinma sangaana yaxare ya yi,
baawo a giyan xufunten ya ni.
16 A ma ɲi a tu ti i kalluyaxare ke ya ni.
A tinko a yi killinxannen ŋa nan ti i wa a mulla i do a n saxu.
A ti a da :
« An na man kinni in ŋa katta an do in gaa kafiini ? »
17 A ti :
« N wa sugunlenme xayini an da bakka in tanmison ŋa ».
A ti i duŋe,
xa a na tolomada kini i ya saado ken ŋa.
18 Yehuuda ti :
« Manne tolomada ?
» A ti a da :
« An xaatumundoronman do i kace,
do guma¤ ke be faayi an maxa.
» A da i kini a yi.
A do a saxu.
A xosi ɲa noxon ŋa.
19 Tamara daga i dingiran ŋa,
na sangayiraamu ku boora,
na i furujanyiraamun saaga du yi.
20 Ken dangi falle,
Yehuuda da i menjanŋe Dullaaminke ke wara dagana sugon tunsi,
kuudo a do i tolomadanun na ri,
xa a ma yaxare ke wari.
21 A da Henaayimu taaxaanon tirindi :
« Sangaana yaxare ke be gaa killinxannen ŋa yere,
a na minna ?
» Kun ti a da :
Non taaxe,
sangaana yaxare fi ma tuyi no.
22 Menjanŋe ke saage riini katta Yehuuda yi nan ti :
« N ma yaxare ke wari.
Ayiwa,
non taaxaanon xa da a xurandi in da nan ti,
non taaxe,
sangaana yaxare fi ma tuyi no. »
23 Yehuuda ti a da :
« Ayiwa,
a nan toxo ti tolomadanu ku yi,
oku ntaxa fo tana ɲaana,
a nan maxa ri ɲa saxamo yi.
A nda ɲa moxo su,
n da sugon wara dagana,
a ya ma wari. »
24 Xasu sikki me dangi falle,
i ri a ko Yehuuda da ti :
« An kallu yaxare Tamara da noxon kita sangen ŋa.
» Ken ga ɲa,
Yehuuda ti :
« Xa da a bagandi riini,
a n buyi. »
25 I ga da Tamara bagandi riini,
a ti :
« Xa da a ko in kallu yugo ke da,
ku yokku ga ni sere be xallu,
n da noxon kita ken kaman ya yi,
n wa a ɲaagana,
a na i faayi,
ke doronma do i kacen do guma ke ga ni sere be xalle. »
26 Yehuuda sigi a yi nan ti :
« Tonŋun-tonŋu,
a da sariyan batu diina in ŋa,
baawo in nan xawa a kinni in renyugo Seela yi ya,
xa in ma ken ɲa.
» Yehuuda do a maxa kafi ken falle.
27 A saare waxati,
a tuyi nan ti noxo ke ni funun ya yi.
28 A gaa jalan ŋa,
baane fina da i kitten bagandi.
Saarandaana yaxaren da a raga,
na gaari dunbe siiti a yi,
nan ti :
« Ke fina ya n saame. »
29 Xa,
a saage i kitten rondini.
A funukiren fina ya n xenu.
Ken ga ɲa,
saarandaana yaxare ke ti :
« An ke fuɲandi moxo xa du kaane ?
» I da a toxora Pereeci,
[a wure ga ni « fuɲande »].
30 Ken falle,
fillandi ke xenu,
gaari dunben gaa ke be kitten ŋa,
i da aken toxora Jeera [a wure ga ni « ŋaalinte »].