[Yuusufu do i waaxinu]
(Soora 37-50)
[Yuusufu kuyu]
37
Yaaxuba taaxu i faaba taaxura xasen ŋa,
Kanaana jamaane.
2 Yaaxuba kaadunkon taarexun faayi :
Yuusufu gaa siino tanmi do ɲeru,
a wa faaben tanmison nagaanini kafiini i gida yugun ŋa,
faabe ke taara yaxaru,
Biliha do Jilifa,
i ren yugu ku.
Gida yugu ku gaa fo wo fo ɲaana,
a wa riini a su laxami faaben da.
3 Isirayila ¤ wa Yuusufu mulla diina i renmun kuttun ŋa,
baawo a da a kita i xirisaaxun ya yi.
A da doroki faranpare ya kini Yuusufu yi.
4 Yuusufu gida yugu ku da a wari,
faaben na a ya mulla diina i su yi,
ken saabu da,
i da a xoni,
i ra ntaxa sefene a da ti horoma yi.
5-8 Wuro yogo Yuusufu kuyi,
a da a laxami i gida yugu ku da nan ti :
« N wa axa ɲaagana,
axa na in kuyin terinka :
o ɲi alikaamaxesiini ten ya,
nke alikaamanyettan xosi giri sigi,
nan toxo sikki,
axakun yetton ri yoori a yi nan sujudi a da.
» Gidenu ku ti a da :
« An sinmayen ŋa,
an riini ɲa tunkanyugo ya yi oku da na o mara ba ?
» I xonnaaxun fillanxote a kanma na a sababun ɲi a kuyin do a sefexannun ŋa.
9 Yuusufu kuyi xadi na a laxami i gida yugu ku da.
A ti :
« A faayi,
n kuyi xadi,
kiyen do xason do saanu tanmi do baane ga sujudi in da. »
10 A da kuyi ke laxami faaben xa da,
ken doxo a yi nan ti a da :
« An do ke kuyi xa wure ni manne yi ?
Walla an sinmayen ŋa,
nke do an ma do an gidanu ya n riini sujudi an da ? »
11 Gidenu ku suuxu a yi,
xa faaben da i haqilen toxo fi ke yi.
12 Waxati yi,
Yuusufu gidanu daga i faaba tanmison nagaani Sixemu maran ŋa.
13 Koota yogo,
Isirayila ti Yuusufu da :
« N wa a mulla na an xayi an gida yugu ku yi nagaaniran ŋa.
» Yuusufu duŋe faaben sefen ŋa.
14 Ken ŋa,
faaben ti a da :
« Daga bogu an gida yugun ŋa,
i do tanmiso,
an nan ri i xibaaren ko in da.
»
A da Yuusufu xayi gilli Heburoona napo ke yi ke moxo ya. Bire be Yuusufu ga kiɲe Sixemu gunnen ŋa,
15 yugo yogo da a wari yiile-yiilene.
Yugo ke ti a da :
« An na manne mundunu yere ? »
16 A ti a da :
« N na in gidanu ya mundunu,
an ra wa i nagaaniran koyini in ŋa ba ? »
17 Yugo ke ti a da :
« I gaa gilli yere,
n taron wa i ya i gaa tini :
“ O n daga Dotaani.
” » Yuusufu jokki do i gidanu muurunden ŋa ma a gaa i ɲiini no.
18 I ga da a wari laatoyen ŋa katta a gaa tinkoono i yi,
i da janbeyen siiti ti i na a kari.
19 I ti me da :
« Kuyinxaranmoxon faayi riini.
20 Saasa,
xa ri o na a kari na a sedi gedi xase yogo yi,
o na ti gundufo yogo da a yiga,
ayiwa a kuyin gaa riini ke be siro a yi,
o na ken wari. »
21 Rubeeni ga da ken mugu,
a da Yuusufu kisi bakka i ya,
nan ti :
« O n maxa a yonkin bonondi.
22 Xa maxa fore joxi !
Xa da a sedi ke gedi xase yi gunjuran ŋa yere,
xa maxa axa kitten saxu a kanma.
» A da ken ɲa na Yuusufu kisi ya,
na a saagandi katta i faaba yi.
23 Bire be Yuusufu ga kiɲe i gidanu yi,
i da doroki faranpare ke fariti bakka a xannen ŋa,
24 na a sedi gedi xasen ŋa.
25 Ken falle,
i taaxu,
i wa yigeene.
I ga da i yinmun wutu,
i xosi Sumaayilagankon¤ sette yogo wari gilli ti Gilaadi banŋe,
i ɲogomon tiŋanton ga ni kanbaren do futaaden ŋa,
a do misikinji,
i do i gaa dagana Misira jamaanen ŋa.
26 Yehuuda ti i waaxinu ku da :
« Manne xa nafa na o danŋa o xoxonen kallen ŋa na a kallen muxundi ?
27 O na a gaaga ku Sumaayilaganko yi,
o n maxa a yonkin bonondi,
a nda ɲa moxo su,
o sunpun ya ni,
o xattin ya ni.
» I duŋe ke sefi koninte yi.
28 I da Yuusufu bagandi geden ŋa,
na a gaaga Mediyaananka¤ julaanu ku danginton ŋa,
tanpille godo xulle,
kun do a daga Misira.
29 Bire be Rubeeni ga saage dagana gede ke faayi,
a da a ɲi Yuusufu ntaxa no.
Rubeeni jikken xose, a da i yiraamun booxo-booxo,
30 nan ti i waaxinu ku da :
« Yuusufu ntaxa yere de,
nke taŋeene minne yi ? »
31 Ken falle,
i da sugundige xurusi,
na Yuusufu doroken betexe ti a foron ŋa.
32 I da doroki faranpare ke wara dagana katta i faaba yi,
nan ti a da :
« O da ke ya wari de,
an da a tu an lenmen doroken ŋa ba ? »
33 Yaaxuba da doroke ke tu nan xaaru,
nan ti :
« N lenmen doroken ya ni !
Fonyaate ya n xenu a yi na a yiga ba ? »
34 A da i yiraamun booxo-booxo bakka i xannen ŋa kuŋa,
na sunoyinyiraamun rondi,
na i renme ke kallen hanmi,
bita gabu.
35 A ren yugu ku do a ren yaxarun su da a neene nan konto,
a ti i nta i renmen kallen hanmiyen walla ma i yinme ga na n daga kafi a yi.
A ma duŋe wuyen walla.
36 Ken waxati baane yi,
Mediyaananko ku do Yuusufu daga Misira,
na a gaaga Potifaari yi,
ken ga ni Misira tunkanyugon saxiirontan sere yi, a do a tangandaanon yinmanke.