Jopaye 35

[Sixemu do Maamere taaxe]

Koota yi Alla ti Yaaxuba da : « Giri an nan daga Beeti-yeli, an na taga in da non ŋa, n bange an da non ya yi, bire be an ga wuru an gida Yesaawu yi. » 2 Yaaxuba ti i kaadunkon da kuŋa, a do sero beenu ga ɲi do a batten ŋa : « Xa da boori riyinto ku beenu gaa axa maxa yi sedi, xa n seno na axa yiraamun faraaxu. 3 O n daga Beeti-yeli, n wa sadaxindinoqu tagana Alla da no, aken be ga da in jaabi, bire be in ga ɲi waxati xoten ŋa, a ga ɲa do in batten xa yi, n terenden wucen su yi. » 4 Booru su ga ɲi i maxa, hari i tarudunkanŋu, i da i su kini Yaaxuba yi, a da i bulu yitti xoore be gaa Sixemu yi wure. 5 Ken falle, i da i tilliisun girindi, Alla da kanuyi xoore yanqandi i kaaradundebun seron sondomun ŋa, i maxa katu Yaaxuba renmun fanpana.

6 Yaaxuba do fo wo fo ga ɲi doome, i su kiɲe Luuja, ken ga ni Beeti-yeli yi, Kanaana jamaanen ŋa. 7 A da sadaxindinoqu taga non ŋa, na a toxora Beeti-yeli-alla, baawo Alla bange a da non ya yi, bire be a ga wuru laatono bakka i gida yugon ŋa.

8 Rebexa xoorondaana yaxare Deboora faati non ŋa. A buli Beeti-yeli kaaran ŋa, yitti xoore wure, gelli ken waxati, non xiri : « yaaxanjin yitte ».

9 Yaaxuba saage falle gilli Padana-haraami, Alla bange a da xadi, nan duwa a da. 10 A daali a da : « An toxon ni Yaaxuba ya, xa an ntaxa xiriini ken ŋa keeta, an wa saagene xiriini : Isirayila. » A da a toxora Isirayila. 11 A ti a da xadi : « Nke ya ni ŋa, n wa an barekindini, an na bonsonŋen gaben kita. An wa riini ɲa jama do xabiila gabe burujun ŋa, tunkanyugun wa bakka i yi. 12 N ga da jamaane be kini Ibirahiima do Isiyaaxa yi, n wa a kinni an ŋa, na a kini an bonsonŋun ŋa an dangi falle. » 13 Ken falle, Alla laato bakka i do Yaaxuba sefetaanu ku yi. 14 Yaaxuba da giden sigindi non ŋa, na sadaxanjin do ten joxi a kanma, kuudo a n ɲa gidi senne yi. 15 A da non xiri : « Beeti-yeli », [a wure ga ni : « Alla ka »], Alla ga da a sefanlenmaaxu noqu be.

16 Yaaxuba do i kaadunkon ga giri Beeti-yeli, i ga tinko Hefuraata yi, ren yugo jalan da Raheli bunu, jala ke xoto xa. 17 Na a toxo jala ke yi, saarandaana yaxaren wa tini a da : « Duruxoto, ren yugon ya ni. » 18 A guutumayi lagare, a yonkin gaa joqo, a da renme ke toxora : Beni-wooni, [a wure ga ni : « karandun renme »] xa faaben da a toxora : Beniyamiina [a wure ga ni : « kitti tayen lenme »]. 19 Raheli faati, nan buli Hefuraata killen ŋa, ken ga ni Beeti-leheemi yi. 20 Yaaxuba da giden sigindi a xaburan ŋa, hari lenki, ken gide wa no.

21 Ken falle, Isirayila da tilliisun girindi, nan daga taaxu Migidaali-hedeeri kaaran ŋa. 22 Na a toxo non taaxen ŋa, Rubeeni daga saxu do a taarayaxare Biliha yi koota yogo. Isirayila ga da ken mugu, a da a sunondi.

Yaaxuba da ren yugu tanmi do fillo ya kita i birantaaxun ŋa. 23 I toxonun faayi : Leeya ren yugun ni : Rubeeni, ken ni Yaaxuba sooman ya, a do Simoonu, Leewi, Yehuuda, Yisaxaari, a do Jebuluunu. 24 Raheli ren yugun ni : Yuusufu do Beniyamiina. 25 Raheli komo yaxare Biliha ren yugun ni : Daani do Nafutaali. 26 Leeya komo yaxare Jilifa ren yugun ni : Gaadi do Haseeri. Ku ya ni Yaaxuba ren yugun ŋa, i ga saare Padana-haraami.

[Isiyaaxa faatiye]

27 Yaaxuba daga i faaba Isiyaaxa noqun ŋa Maamere, Xiriyaata-haraaba, saasa non gaa xiriini Heburoona, Ibirahiima do Isiyaaxa demu taaxunu no. 28 Isiyaaxa da kame do tansege siine bire. 29 Ken falle, a da i yonkiraxillen lagaren ɲa, a faati nan kafi i seri fanon ŋa. A da wuyi barekinte kita, a ren yugu ku, Yesaawu do Yaaxuba, i da a firindi.