[Yaaxuba ren yaxare Diina]
34
Koota yi,
Diina,
ken ga ni Yaaxuba do Leeya ren yaxaren ŋa,
a daga bogu Sixemu xusun ŋa debinnoxon ŋa.
2 Hiiwikaarankon yinmanke Hamooro ren yugo Sixemu da Diina wari,
a xenu a yi senben ŋa.
3 A saage nan jaarabe a yi moxo buru,
a wa xanuyen sefen koono a da waxati su.
4 A ti i faaba Hamooro da :
« N wa a mulla an na ke xusunne muuru in da,
n na a yaxi. »
5 Yaaxuba da a mugu ti Sixemu da i ren yaxaren mexendi,
xa a ma fo wo fo ko,
ma bire be,
a ren yugun gaa gilli nagaaniran ŋa.
6 Sixemu faaba daga Yaaxuba sagata,
na fi ke yaaxen ko a da.
7 Yaaxuba ren yugun ga da xibaare ke mugu,
i saage riini gilli gunnen ŋa,
i suno,
nan butu,
nan dangi haqen ŋa,
baawo Sixemu ga xenu Yaaxuba ren yaxaren ŋa,
a da fi ŋariɲanŋe ɲa,
ke be ga nta xawa ɲaana Isirayila yi.
8 Xa Hamooro ti Yaaxuba do i renmun da :
« N ren yugo Sixemu jaarabe axa ren yaxaren ŋa,
n wa axa ɲaagana,
axa na a kini a yi yaxun ŋa.
9 O n sarati me da,
axa na axa ren yaxarun kinni o yi yaxun ŋa,
o xa wa o xallun kinni axa yi.
10 Axa nan taaxu o kaaran ŋa,
jamaanen wa lawareene axa da,
axa wa taaxunu a yi na axa haajunun yaaxe bagandi,
axa na noqunu yogo xa kamanaaxun kita. »
11 Sixemu yinme da a ko ren yaxare ke faaba do a waaxinun da :
« N wa a mulla axa n yanpa in maxa,
axa gaa fo wo fo su mulla,
n wa a tugana axa yi.
12 Axa nda yaxudunnaabure do laaliŋondifo su muuru in ŋa,
n wa a su ɲaana axa da,
kuudo in na yaxare ke kita. »
13 Yaaxuba leminun da Sixemu do i faaba jaabi ti gotontaaxu yi,
baawo,
Sixemu da i saaxanbaana yaxaren maxayanqa.
14 I ti i da :
« Oku ra nta o saaxanbaana yaxaren kinni yugu sallinditanbali yi,
ken ni maxayanqaye ya yi oku maxa.
15 O na o xannen kinni axa yi ti sarati baane ya yi :
axa na axa kaara yugon su sallindi xoyi o moxo.
16 Ken ŋa,
o wa o ren yaxarun kinni axa yi yaxun ŋa,
o xa na axa xallun wuttu,
o wa taaxunu axa kaaran ŋa nan ɲa jama baane yi,
17 xa,
axa ga ma duŋe sallinden ŋa,
o wa o saaxanbaana yaxaren wuttu do a nan daga. »
18 Hamooro do i ren yugon duŋe ke haqilalla yi.
19 Sixemu maxa leele do xibaare ke yi,
baawo a wa yaxare ke mulla moxo buru,
aken ya ni kan lelleerin xa yi.
20 Hamooro do Sixemu daga deben roraqen ŋa nan ti debinlenmon da : 21 « Ku sero ŋanniyun sirun ni katta o yi,
o ti i n taaxu yere na i fiinun dabari,
baawo jamaanen xooren ni,
o renmun do i renmun ra wa me yaxini xa.
22 I duŋe taaxen ŋa kafiini o yi nan ɲa jama baane yi,
xa ti sariti baane :
yugo su gaa o maxa yere,
a su n salli xoyi i moxo.
23 O nda duŋe ken ŋa tannu,
i wa riini taaxu o kaaran ŋa,
ken ŋa,
i daabanu ku do i naaburu ku su lagarun ɲaana o xallun ya yi. »
24 Yugo su gaa deben roraqen ŋa,
i su duŋe ke haqilalla yi,
ken moxo yi,
deben yugon su salli.
25 A bita sikkandi,
na deben yugun toxo tooxen ŋa,
Yaaxuba renmu filli,
Simoonu do Leewi,
Diina gidanyugu,
i da i kaafon wutu nan ro deben noxon ŋa,
na a toxo sere ma du do a taaxu,
na yugon su kari.
26 Hamooro do i renmen wa kafiini seri karinto ku yi,
Simoonu do Leewi bogunto Sixemu noqu,
i da Diina wutu.
27 Yaaxuba renmun kuttun ri furu ku yokki nafanton do deben xooro,
baawo,
i saaxanbaana yaxaren hayibe ya.
28 I da tanmison do naanun do farun xaaxa,
a do fo wo fo su ga ɲi deben noxon do gunnen su yi.
29 I da deben naaburen su wutu,
do lemunun do yaxarun xa nan daga,
na konpon nuxudufoonun su xaaxa.
30 Ken ga ɲa,
Yaaxuba ti Simoonu do Leewi da :
« Axa da fo bure ɲa de !
Axa da taaxen xotondi in maxa jamaanen ŋa Kanaanagankon do Perijinun naxa.
Ku sero wa riini kafi me yi in xanne maxa,
na in ni,
baawo,
yugu gabe nta in maxa,
n do in kaadunkon na ri halaki. »
31 I ti a da :
« Ke yugunne xa ma xawa oku saaxanbaana yaxaren ragana xo sangaana yaxare wo. »