33
Na Yaaxuba toxo killen ŋa,
a ga da i yinmen wutu,
a xosi Yesaawu do kamon naxati yugon wari riini,
a da leminun taxandi i maanu naxa.
2 A da taara yaxaru ku filli do i renmun wara kaane,
na Leeya do i renmun wara kun falle,
ken moxo yi,
na Raheli do Yuusufu wara i falle.
3 Yaaxuba yinme fina daga sujudi ta ɲeru saado a gaa kiɲene giden ŋa,
4 xa,
Yesaawu wuru genme a yi,
nan fenema a yi,
na a xandunsunbu.
I filli su xosi wu.
5 Bire be Yesaawu ga da yaxarun do leminun wari,
a ti :
« Ku ni manne sero yi do an batte ?
» Yaaxuba ti a da :
« Ku ni leminu be Alla ga da i ro an golliɲaŋaanan warijaxen ŋa ya. »
6 Taara yaxaru ku xa do i leminun tinko nan sujudi.
7 Leeya xa do i leminun tinko na ken me dabari,
Yuusufu do Raheli xa tinko nan sujudi.
8 Yesaawu ti a da :
« N do wooringa ke be ga gemu,
an na a mulla na manne ɲa ti ken su yi ?
» A ti a da :
« N kaman yugo,
nke ken da a xanu na an ya sagon kita ti i ya. »
9 Yesaawu ti a da :
« N waaxi,
naaburen gaben wa inke yinme maxa,
toxo ti an xallun ŋa. »
10 Yaaxuba ti :
« N wa an ɲaagana,
selli in n gaa an sagon kitana,
n darontaaxu ke raga.
Anken walle ke ɲaŋi inke maxa xo Alla walle ya,
na a sababun ɲi an bisimillanden siroyen ŋa.
11 N na an ɲaagana ya,
n ga da kuye ke be xayi katta an ŋa,
an na a raga.
Alla siro in da,
n gaa fo wo fo su mulla,
a wa in maxa.
» A da a xotondi a maxa,
Yesaawu lagari duŋeene.
12 Ken falle,
Yesaawu ti a da :
« O n daga doome,
nke na ware kaane. »
13 Yaaxuba ti a da :
« N kaman yugo,
an yinme yaaxen wa leminun ŋa,
i tereetan nan mula,
tanmiso do naanu beenu gaa sugundindini,
o n xawa i seesene ya,
o ga na i karaba tan,
i su wa kalla.
14 N kaman yugo,
anken nan daga o kaane,
an golliɲaŋaanan do naaburun do leminun wa dagana fonne-fonne,
ma i ga na n kiɲe i kaman yugon noqun ŋa,
Seyiri jamaane. »
15 Yesaawu ti a da :
« N do yugu beenu ga ri doome,
n wa i yogo toqo an maxa.
» Yaaxuba ti a da :
« Ken xa ni manne ?
Nke ga da bisimilla sire kita an ŋa,
ken wase. »
16 Ken koota su,
Yesaawu da Seyiri killen raga.
17 Yaaxuba ken daga Sukkoti,
na noqu dabari i du da no,
na biirun dabari i daabanun da.
Ken ya saabu da,
non gaa xiriini Sukkooti,
[a wure ga ni :
« biiru »].
18 Yaaxuba saagante gilli Padana-haraami,
a ga giri Sukkooti,
a sire ga kiɲe Sixemu deben kaaran ŋa Kanaana jamaane,
a taaxu no.
19 A ga da i tilliisen banba ɲiiɲe be yi,
a da a xobo Hamooro soxoodin maxa kame godo xulle,
ken ga ni Sixemu faaba yi.
20 A da sadaxindinoqu dabari non ŋa,
na a toxora :
Alla ni Isirayila¤ Alla ya yi.