32
Ken yillankaran suxuba,
Labaani da i kisimarun do i ren yaxarun xandunsunbu,
nan duwa i da,
ken falle nan saage dagana i noqun ŋa.
[Yaaxuba do Yesaawu mewalle]
2 Yaaxuba jokki do i killen ŋa,
Alla maliikanun ri a gemundi.
3 A ga da i wari,
a ti :
« Alla kurun na yere ya !
» A da non toxora :
Mahanaayimu,
[a wure ga ni :
« kuru filli »].
4 Yaaxuba da faarun wara dagana du kaane katta i gida Yesaawu yi,
Seyiri ɲiiɲen ŋa,
Hedoomu mara.
5 A ti i da :
« Axa na ti in kaman yugo Yesaawu da :
“ An golliɲaŋaana Yaaxuba ti o na a ko an da,
i ɲi Labaani noqun ya,
i toxo non ŋa ma ke waxati.
6 Saasa,
i da nan do faren kita,
a do tanmise,
na komo yugun do komo yaxarun kita,
o na a ko i kaman yugon da,
ma i na bisimilla moxo sire kita a yi. ” »
7 Bire be faaru ku ga saage riini,
i ti Yaaxuba da :
« O da faaren kiɲandi an gida Yesaawu yi,
a yinme faayi killen ŋa riini katta an ŋa,
a do kamo naxati yugo. »
8 Yaaxuba kanu buru,
sero beenu gaa do a batte,
a da i taxandi jamo filli,
tanmison do naanun do ɲogomon xa taxandi ken moxo yi.
9 A ti i noxo du :
« Hari Yesaawu nda xenu taxandi baanen ŋa,
taxandi baanen ken na kisi. »
10 Ken falle,
Yaaxuba da Alla ɲaaga :
« Ee,
n kisima Ibirahiima Alla,
n faaba Isiyaaxa Alla,
anken ya n ti in nan saage dagana in faabankan ŋa,
n seron noqu,
an wa riini xeeri ɲaŋi in da.
11 N Kama,
an ga da ke xeeri xoore be ɲaŋi in da ti an duntenŋaaxun ŋa,
n sigiran nan loxi a yi,
baawo n gaa Yarade fanŋe ke kuttu,
fo wo fo ma ɲi in maxa in guma ke falle.
Xa saasa,
n do ku sorobo filli ri.
12 N kisi in gida Yesaawu yi,
baawo n wa kanna,
a n maxa xenu in do yaxarun do leminun ŋa.
13 Sinme,
nan ti an ya n ti in nan daga,
xeeri wa do in batte,
an wa riini in bonsonŋun gabondi xo seyinfunsen moxo,
fanlaqen ŋa,
a ra ga nta yirigeene gaboyen maxa. »
14 Yaaxuba toxo no,
nan wuyi.
Ken falle,
naabure be gaa a maxa,
a da buttumurefo wutu a yi i gida Yesaawu da :
15 kamo filli sugu yaxare do tanpille sugundige,
a do kamo filli jaxa yaxare do tanpille jaxandige,
16 tanjikke ɲogon yaxare do i renmu,
tannaxate na yaxare do gunbunu tanmi,
a do tanpille fari yaxare do fari yugu tanmi.
17 A da wooringa su xaliifi i golliɲaŋaana yi,
nan ti i da :
« Xa ware dagana kaane,
axa na bara toxo wooringanu ku do me naxa. »
18 Ken falle a da ɲaamariyen kini golliɲaŋaana fanan ŋa nan ti :
« N gida Yesaawu ga na ri an ŋa,
nan ti :
“ Anken ni ko fo yi ?
An dagana minne ?
Ke wooringa ni ko fo yi ? ”
19 An nan ti a da :
“ An golliɲaŋaana Yaaxuba ya fo na a su yi,
a da i ɲa ɲaxalindifo yi i kaman yugo Yesaawu ya da,
a yinme wa falle yi riini. ” »
20 A da ke ɲaamariye me kini fillandin do sikkandin ŋa,
a do fo wo fo gaa do wooringanu ku yi.
21 A saage na a xotondi i maxa,
i n ti a da :
« An golliɲaŋaana Yaaxuba yinme wa falle yi riini.
» Yaaxuba wa tini i noxo du :
« N da ɲaxalindifo wara katta a yi in kaane,
n sinmaye maxa,
a wa in bisimilla moxon sirondini. »
22 A da ɲaxalindifo ke wara i kaane,
aken yinme toxo non ŋa,
nan wuyi.
23 Yaaxuba giri wuron noxon ŋa,
na i yaqu ku filli do i taara yaxarun filli do i renmun tanmi do baanen wara dagana Yabooxo gufuren falle.
24 Kaadunko ku daga falle,
a da i naaburun xa su wara dagana.
25 Yaaxuba yinme baane toxo non ŋa.
Yugo yogo ri xanu a yi non ɲa,
do a nan fanqe,
ma fajiri.
26 Bire be fanqanlenma ke ga da a tu ti i nta a niini,
a da a katu i fengeɲen ŋa,
na a bagandi gubon ŋa.
27 Ken moxo,
yugo ke ti a da :
« N wara in nan daga,
fajirin faayi ga kiɲe.
» Yaaxuba ti a da :
« N nta an walla dagana,
an ga ma duwa in da. »
28 A tirindindi ti :
« An toxo ?
» A ti a da :
« Nke Yaaxuba ya ni. »
29 A ti a da :
« An ntaxa xiriini Yaaxuba,
an toxon ɲaana Isirayila ya yi keeta,
[a wure ga ni :
“ Alla fanqanlenma ”] an da Alla gaja,
na seron gaja,
an niyindi a su yi. »
30 Yaaxuba da a tirindi i toxon ŋa.
A ti Yaaxuba da :
« An na in tirindini in toxon ŋa manne yi ?
» Ken moxo,
a duwa a da.
31 Yaaxuba ti kuŋa :
« N da Alla wari,
n yinme do a yinme,
n toxo bireene xa.
» Ken ya saabu da,
a da noqu ke toxon xiri Penuweeli,
[a wure ga ni :
« Alla yeeso »].
32 Kiyen bogu waxati,
Yaaxuba da fanŋen kutu,
xa a toxo jugumunu na a sababun ɲi a fengeɲe ke yi.
33 Ken ya saabu da,
hari lenki Banisirayilagankon nta fengeɲen tiyen yigana,
baawo,
Yaaxuba fengeɲen joogi.