Jopaye 31

Koota yi Yaaxuba da a mugu ti Labaani ren yugun wa tini : « Yaaxuba da o faaba naaburen su ɲa du da xalle yi, na du bannaaxundi ti a yi. » 2 Yaaxuba da a koroosi xadi nan ti Labaani diinan nta katta i ya xo waxati danginte ke. 3 Tunka Duumanten daali a da kuŋa : « Saage katta an kaadunkon ŋa, an faabanjamaane, n wa ɲaana do an batte. »

4 Yaaxuba da Raheli do Leeya riiti i nagaaniran ŋa kuŋa, gunnen ŋa. 5 A ti i da : « N da a wari axa faaba diinan ntaxa katta in ŋa xo ganni, xa in faaba Alla wa do in batten ŋa. 6 Axakun yinmenu wa a tu, nan ti in golli axa faaba da, n fankan danman su yi, 7 na a toxo a gaa sangana ti in ŋa, a da in tugaadin filinka taanu tanmi. Xa ken su kanma, n yinmen liŋo, Alla ma in kini a yi. 8 Axa faaba ga na ti in tugaadin ɲaana tanmisa xuurun ya yi, tanmisen su na xuuron ya saarana, a ga na ti in tugaadin ɲaana walaxon ya yi, tanmisen su na saare ti walaxan ŋa. 9 Alla yinme ya n da axa faaba naaburen raga a yi, na a kini inke yi. 10 Bire be digun ga na ɲi katundini, n da a wari kuyin ŋa nan ti walaxon do fuusun ya ni, a do xuuru. 11 Alla maliikan da in gangu kuyi ke yi nan ti in da : 12 “ Yaaxuba, an yinmen wutu nan faayindi, digu beenu gaa katundini, walaxon do fuusun do xuurun ya ni, baawo, Labaani gaa fo wo fo ɲaana an ŋa, n yaaxen wa a su yi. 13 Nke ya ni Beeti-yeli Alla yi, noqu be an ga da ten joxi kanma, a do an ga da tekken wutu in da. Saasa ke, giri, an nan bogu yere, an nan daga an saareɲiiɲen ŋa. ” »

14 Raheli do Leeya ti a da : « Ee ! Fo ya na oku maxa o faaba xayen ŋa keeta ? 15 A ma o raga xo mukkunu ya, geni, baawo a da o gaaga na o jonkon yiga yinme du wo. 16 Ken ken ŋa keeta, Alla ga da naabure su raga o faaba yi, ken na oku do o renmun ya fo yi. Saasa ke, Alla ga da ke be koni anken da, ken dabari. »

17-18 Ken moxo, Yaaxuba da i moxo sirondi nan daga i faaba Isiyaaxa banŋe Kanaana jamaanen ŋa : a da i renmun do i yaqun setundi ɲogomon kanma, a ga da daaba su kita, a do naaburu jura, a do i su ri, kafiini a ga da fo wo fo kita i taaxe ke wucen ŋa Padana-haraami.

19 Labaani ga daga i jaxon xesu, Raheli da a boorun fayi a falle. 20 Yaaxuba wuru ya, a ma sere a yi, Labaani Haraaminke ma a tu. 21 Fo wo fo ga na a xalle yi, a do a su wuru, na Furaata fanŋen kara, nan taŋe Gilaadi giden banŋen ŋa.

22 Bita sikkandin koota, i da Labaani xibaari ti Yaaxuba wuru. 23 A da i kan yugun su wutu do a yi, na a batu bito ɲeri, nan rege a yi Gilaadi giden kanma. 24 Xa ken da a ɲi wuron ŋa, Alla da du koyi Labaani ya kuyin ŋa, nan ti a da : « Maxanɲa : maxa fo ko Yaaxuba danŋa, a fo sire do a fo bure su. »

25 Bire be Labaani gaa regeene Yaaxuba yi, a da a ɲi, a wa i tilliisen banbana Gilaadi giden ŋa. Labaani xa do i seron taaxu non ŋa. 26 A ti Yaaxuba da : « Man da an kita ? An ga da in janba do in ren yaxarun nan ri kundu xo meneguuru ? 27 Manne an ga wuru na in janba ? An ma fo koni in da, ganpinsa, n na an tunsi ti ɲaxa xoore yi, suugen do dinmen do ganbare, 28 an ma dugu in na in lenmun do in kisimarun xandunsunbu. Tonŋun ŋa, an da ke golle ken hawujantan ɲa ya. 29 Katudanŋen wa in da na fo buren ɲaŋi axa yi, xa an faaba Alla da in diganlenmaaxu wuri nan ti in nan maxanɲa, n nan maxa fo koni an da, a fo sire do a fo bure su. 30 Saasa ke, selli an ga ri ya baawo an ra nta ɲaana an faabankan falle, an da inke allanu ku xa fayi man ŋa ? » 31 A ti a da : « N kanu ya an nan maxa an ren yaxarun raga in ŋa. 32 Ganta, fi be ga na an allanu ku xibaaren ŋa, an ga na i ɲi sere be maxa yere, ken kaman nta toqo bireye yi. O seron su jon ŋa, fo wo fo ya gaa in maxa, yeli a su lorowe, fi be ga na ɲaŋi an xalle yi, an na a wutu bakka a yi. » Xa, Yaaxuba ma ɲi a tu nan ti Raheli da booru ku wutu.

33 Ken kanma, Labaani da Yaaxuba do Leeya do komo yaxaru ku filli tilliisun wure lorowe, a ma fo wo fo wari no. A bogunte Leeya tilliisen wure, a ro Raheli xa tilliisen wure. 34 Na a ɲi Raheli ya n da booru ku wutu, na i muxundi ɲogomen xirixen wure, nan taaxu a kanma. Labaani da tilliisen wure lorowe, a ma fo wo fo wari no. 35 Raheli ti i faaba ke da kuŋa : « N faaba, maxa butu de, nan ti in konto gilli nan sigi an jon ŋa, baawo, n na yaxarun laadan ya yi. » Ke mundunde su kanma, Labaani ma boorun wari.

36 Ken ga ɲa, Yaaxuba butu na Labaani jalagi moxo siri, nan ti a da : « Nke xa da manne bone ɲa, an gaa do in batten ŋa kundu ? 37 An da in yokkun su lonbooti, selli an ga da an xalle wari, a koyi beran ŋa, n seron do an seron jon ŋa yere, i n kiiti o naxa. 38 An da ke wari, nke da tanpillen siinen ya ɲa an maxa, ken wuce su yi, an tanmise su noxo ma bono, n ma dige yiga xa abada. 39 N do tanmisafure ma demu riini an ŋa, ti gundufo da a yiga, nke yinme ya n ɲi ken su bonon wuttu, tanmise su ga ɲi fayini kiye, ma wuro, an ɲi in tanbunu a su yi ya. 40 Jeberen tooran wa in kanma kiyen ŋa, n ma ɲi xenqene mullen xa maxa wuron ŋa. 41 N ga da tanpille siine be ɲa an maxa : siino ku tanmi do naxato, n da ken ɲa gollini do an ren yaxaru ku filli ya yi, siinon tunmi, na kun ɲa gollini an naaburun ŋa, taanu manime xa ni, an ga in tugaadin filinkana ? 42 Gelli in faaba Alla do Ibirahiima Alla do Isiyaaxa sarallandaanan ya ga n maxa ɲi do in batten ŋa, a do a yaaxen ga ɲi in tanpiyen ŋa, a do in ga da golli xote be ɲa, a ga da in deemanden rakutu wuri, an ɲi in kittiduuron ya walla. »

43 Ken falle Labaani ti Yaaxuba da : « Ku ren yaxaru na inke ya renmu yi, i renmun na inke ya kisimaru yi, ku daabanu na inke ya fo yi. An yaaxen gaa fo wo fo yi, a su na inke ya fo yi, ken kuŋa, nke katta riini manne ɲaŋi in renmu ku do in kisimaru ku yi lenki ? 44 Yeli o na saratin tafu o do me naxa, o na taagumanse toxo yere, ken na ɲaŋi o filli seedan ŋa. »

45 Yaaxuba da gide wutu na a sigindi xo gondanma, 46 nan ti i seron xa na giden gana riini. I da giden kafu me yi na a ɲa tintiŋa yi, nan yige a kaaran ŋa. 47 I da noqu ke xiri : « gidintintiŋan seedaaxu », Labaani xannen ŋa « Yegari-sahaduta », Yaaxuba xannen ŋa : « Galeedi ». 48 Labaani ti ken kuŋa : « Ke gidintintiŋa wa ɲaana seeda yi, nke do anken naxa lenki, ken ya saabu da, a toxon ga ni Galeedi. » 49 I da non xiri Micipe xa yi, a wure ni : « koroosindinnoqu », baawo, Labaani ti : « Yelli Tunka Duumanten gan na o koroosi, o ga na sanku me yi. 50 An ga na in ren yaxaru ku yebure, walla xa na yaxare tana kafu i ya, an na an moxo tu de ! Haadamarenme feti o seeda yi, Alla yinme ya ni o seedan ŋa. » 51 Labaani saage tini : « Ke gidindugaane do ke gidingondanma be, n ga da i barati o naxa, i faayi, 52 i wa riini ɲaŋi o da seedaano yi : inke ntaxa waqa i ya nan ri an gacen ŋa, an xa nta xawa i waqa nan ri in gacen ŋa. 53 Yelli Ibirahiima do Nahooro Alla gan na kiiti o naxa, o laayidunlenmaaxu ke yi. » Ken ga ɲa, Yaaxuba da kuneyen sabatindi ti Alla be ga da a faaba Isiyaaxa sarallandi. 54 Ken falle, a da sadaxa bagandi Gilaadi giden ŋa, na i seron xiri nan yige doome, nan wuyi no.