30
Waxati ri,
Raheli saarayenbalaaxun sigi a yaaxon ŋa,
a suuxe i gida yaxaren ŋa,
a ti i kiina da :
« An ga ma in ku renmu,
n kalla ya de ! »
2 Yaaxuba suno a wure nan ti a da :
« Nke ra wa Alla gollen ɲaana ba ?
Alla ya na an kabana renmen kitta. »
3 A ti Yaaxuba da kuŋa :
« N komo yaxare Biliha faayi,
an ra wa a yaxini,
kuudo a na saare,
n xa na funtifo kita ti a yi. »
4 A da i komo yaxare ke kini Yaaxuba yi taara,
Yaaxuba ro ti a yi.
5 Biliha da noxon wutu na ren yugo saara Yaaxuba da.
6 Raheli ti :
« Alla da tonŋun kini in ŋa,
a da in terinka na ren yugo kini in ŋa.
» Ken saabu da,
i da a toxora Daani,
[a wure ga ni :
« faasandaana »].
7 Ken falle,
Biliha ri noxon wutu xadi nan saare ti ren yugu fillandin ŋa Yaaxuba da.
8 Raheli ti :
« N da gajan xooren kutu in gida yaxaren ŋa,
n da a ni xa.
» A da renme ke toxora Nafutaali,
[a wure ga ni :
« n gaja »].
9 Leeya ga da a wari nan ti i saarayun sigi,
a da i komo yaxare Jilifa wutu na a kini Yaaxuba yi taara.
10 Jilifa da ren yugo saara Yaaxuba da.
11 Leeya ti kuŋa :
« N xeerin faayi.
» A da a toxora Gaadi,
[a wure ga ni :
« xeeri »].
12 Ken falle Jilifa da ren yugu fillandi saara Yaaxuba da.
13 Leeya ti :
« N yinmaranliŋoyen faayi,
yaxarun wa riini ti in yinmen liŋen ni.
» A da a toxora Haseeri,
[a wure ga ni :
« yinmaranliŋe »].
14 Yillifate waxati,
Rubeeni bogu dagana teenun ŋa.
A da saarayinyittirenmen kita na a falle i ma yi.
Raheli ti Leeya da :
« An ren yugon ga da saarayinyittirenme be falle an ŋa,
fo kini in bakka a yi de. »
15 Leeya ti a da :
« An da in kiina raga in ŋa,
ken ma an baga ?
Ma an gan da in renmen yittirenmen xa raga in ŋa ?
» Raheli ti a da :
« A siro,
Yaaxuba wa wuyini an da wuro ke,
an renmen yittirenmen batten ŋa. »
16 Lellen ŋa,
Yaaxuba ga giri teenun ŋa,
Leeya bogu nan gemu a yi,
nan ti a da :
« An riini inke ya noqu wuro ke,
baawo in da in teyinnen wuron faraaxu a yi in renmen yittirenmen ŋa.
» Yaaxuba wuyi a da ken wuro yi.
17 Alla da Leeya terinka,
a da noxon wutu nan saare ti ren yugu karagandi yi Yaaxuba da.
18 A ti :
« Alla da in tuga,
n ga da in komo yaxaren kini in kiina yi.
» A da ren yugo ke toxora Yisaxaari,
[a wure ga ni :
« tugaadi »].
19 A saage na noxon wutu xadi nan saare ti ren yugu tunmundi yi Yaaxuba da.
20 A ti :
« Saasa ke,
Alla da kuye kini in ŋa,
n kiina wa riini in yinmerawutu,
baawo,
n da ren yugu tunmi saara a da.
» A da ren yugo ke xiri Jebuluunu,
[a wure ga ni :
« yinmarawutte »].
21 Wuce dangi falle,
a ri saare ti yaxare yi na a toxora Diina.
22 Waxati falle,
Alla sinme Raheli yi na a hanmirafiinun terinka,
na a saarenuxunlenmen wasa.
23 A da noxon wutu nan saare ti ren yugo yi nan ti :
« Alla da in saxamon girindi. »
24 A da a toxora Yuusufu,
[a wure ga ni :
« jiidiye »],
nan duwa :
« Yelli Tunka Duumanten gan na in warijaxa ren yugo tana yi. »
[Yaaxuba do Labaani]
25 Yuusufu saare falle,
Yaaxuba ti Labaani da :
« N kaawu,
n wa a mulla an na in wara,
n nan daga in jamaanen ŋa.
26 N ga golli an da yaxaru ku be saabu da,
i kini in ŋa,
n do i do i renmun nan daga,
an yinme wa a tu,
n ga da golle be haqen ɲaŋi an da. »
27 Labaani ti a da :
« An gaa xeeri mulla in da,
toxo yere,
baawo faayindaanon da a ko in da,
nan ti anken ya saabu da ni,
Tunka Duumanten ga da in barekindi.
28 Ken kuŋa,
tugaadi sabatinte koni in da,
n nan toxo ken kinni an ŋa. »
29 Yaaxuba ti a da :
« Anken yinme wa a tu,
n ga da golle be haqen ɲaŋi an da,
a do an daabanu ku ga lagari moxo be yi inke saabu da.
30 Naaburu lamaanu ya n ɲi an maxa inke gaa riini bire be,
xa an naaburen saabudunkugu.
Gelli in ga ri an noqu ke yi,
Tunka Duumanten da an barekindi,
xa saasa in wa a mulla nan golli in yinmen da. »
31 Labaani ti a da :
« Manne xa n xawa ɲaana na an tuga ?
» Yaaxuba ti a da :
« An nta riini fo wo fo su kita na in tuga ti a yi,
xa in ga na ke be ko an da,
an ga na duŋe ken ŋa,
n wa toqo yere,
na an tanmiso ku nagaani :
32 n na lenki su ɲi an tanmison faayini,
tanmise su ga ni walaxan ya,
a do jaxanlenme su binnen ga ni,
n na kun wara kaara yi,
kun na ɲaŋi in tugaadin ŋa.
33 Ken moxo,
n hooraaxun koroosinden na newo.
A xunbanen xunbane,
an ga na in tugaadin segesege,
an ga na tanmise ɲi in maxa,
walaxa ga fe,
walla ma jaxanlenmu,
i binnu ga fe,
an ra wa kun jaatene fo fayinto yi. »
34 Labaani ti a da :
« A siro,
an ga da a ko moxo be,
a ɲa kundun ŋa. »
35 Ken koota su yi,
Labaani yinme da sugundigun do sugu yaxarin walaxon do fuusun su kafu me yi,
a do jaxa binnu,
na i kini i ren yugun ŋa,
36 ken falle,
na bito sikki terende me wara i do Yaaxuba naxa.
Yaaxuba toxo do tanmison kuttun ŋa kuŋa.
37 Yaaxuba da yittikingin nooni xawu sikki wutu kuŋa,
na i ɲegu,
na i noxu ɲegunto ku wara sellan ŋa.
38 A da gumo ku wara fuuren ŋa,
tanmison yaaxo,
baawo,
i nda ri mini ya ni digun gaa katundini.
39 Tanmisa yaxarun wa katiini gumo ku kaaran ŋa,
i ga na saare,
i renmun wa ɲaana walaxon do fuusun ŋa.
40 Yaaxuba ɲi gumo ku koyini Labaani tanmison ŋa xa,
i nda ɲi katundini,
ken moxo yi,
a ɲi walaxon do fo binnun walla i dura,
na i ɲa du da duran guma yi.
41 Bire su,
tanmisa fakkon ga na ɲi katundini fuuren kaaran ŋa,
Yaaxuba na gumo ku saxundi a yi.
42 Xa,
tanmisa xuumanton ga na ɲi katundini,
a nta i saxundini a yi :
ken saabu da,
tanmisa xuumanton ɲa Labaani xallun ŋa,
fo katon ɲa Yaaxuba xallun ŋa.
43 Yaaxuba ɲa banna xoore yi ke moxo ya,
na tanmisen gaben kita,
a do komo yaxarun do komo yugu,
do farun do ɲogomo.