29
Yaaxuba giri nan jokki do i kaawunkan dagayen ŋa kinbakka.
2 Koota yi,
a da gede wari gunnen ŋa,
tanmisangumo sikki wa saqa a raqen ŋa.
Gede ke texenten ni ti gidinfeena xoore ya.
3 Tanmise ke su ga na me ɲi gede ke raqen ŋa,
i wa gidinfeena ke girindini bakka a yi,
i nda duguta minindinden ŋa,
i wa a saagana i batten ŋa.
4 Yaaxuba ti nagaanaanon da :
« N maarenmu,
axakun bakka minna ?
» I ti ikun bakka Haraana ya.
5 A saage tini i da yelli i wa Labaani tu ba,
Nahooro kisimare ?
I ti i wa a tu.
6 A ti i da :
« A moxo ?
» I ti :
« Ma jemu.
A ren yaxare Raheli du faayi kenni,
a do tanmison gaa riini. »
7 Yaaxuba ti :
« Saasa ken ken feti daabanun kafume waxati yi,
kiyen nan tawu,
manne axa ga nta tanmison minindini na i wara dagana nagaaniran ŋa xadi ? »
8 I ti a da :
« O nta fo wo fo ɲaana na a toxo gumon su ya ga ma me ɲi,
ken bire o na gidinfeena ke girindini bakka geden raqen ŋa na tanmison minindi. »
9 Na Yaaxuba do nagaanaanon toxo sefen ŋa,
Raheli do i faaba tanmison ri,
a xa ni nagaanan ya yi.
10 Bire be Yaaxuba ga da i kaawu Labaani ren yaxare Raheli wari,
a do a tanmiso,
a tinko na gidinfeena ke gulun-gulu bakka geden raqen ŋa,
na tanmiso ku minindi.
11 A da Raheli xandunsunbu kuŋa nan wu.
12 A ti a da :
« Nke ni an kallungooran ya yi,
Rebexa ren yugon ya ni in ŋa.
» Raheli xosi wuru dagana i faaba xibaari kuŋa.
13 Gelli Labaani ga da Yaaxubantoxon mugu,
a gidanyaxaren renme,
a wuru genme a yi na a xandunsunbu,
ken falle,
do a n daga kan ŋa.
Fo wo fo ga dangi,
Yaaxuba da a su laxami a da.
14 Labaani ti a da :
« Tonŋun ya ni,
an bogu inke ya yi,
o su ni xabiila baane ya yi.
» Yaaxuba da xasu baane ɲa a noqun ŋa.
[Yaaxuba yaxu]
15 Ken falle,
koota yi Labaani ti Yaaxuba da :
« Yabo,
n maarenmen ya ni an ŋa,
xa ken wa sikki an gaa gollini in da xafu ba ?
Fo ya koni in da,
n ga n xawa an tugana ke be yi. »
16 Ren yaxaru filli ya ni Labaani maxa,
siran toxon ni Leeya,
xunban toxon ni Raheli.
17 Xa Leeya,
ŋarun ti a da,
Raheli ya faranparen ni,
a gemunten sire.
18 Yaaxuba jaarabe a yi.
A ti Labaani da :
« N wa siino ɲeri gollini an da,
an na Raheli kini in ŋa yaqe yi,
an ren yaxarin fillandi ke. »
19 Labaani ti a da :
« N na a kini anken ŋa,
n wa ken fasoono na a kini sere tana yi.
Toxo do in batten ŋa kuŋa. »
20 Ken kanma,
Yaaxuba da siino ɲeri golli,
kuudo i na Raheli kita.
Siino ku ɲeri ɲi a maxa xo bita dantanto,
baawo a wa Raheli mulla.
21 Ken falle a ti Labaani da :
« Saasa,
n yaqen kini in ŋa,
n duguta waxati koninten gollen ŋa,
ayiwa in wa a mulla na a yaxi xa. »
22 Ken bire,
Labaani da waliima dabari,
na taaxanlenmon su xiri.
23 Wuron ga ro,
a da i ren yaxare Leeya leegundi katta Yaaxuba yi,
a do a nan wuyi.
24 A da i komo yaxare Jilifa wara do i ren yaxare ke yi.
25 Ken yillankara,
Yaaxuba xosi a tu ti Leeya ya ni.
A ti Labaani da :
« An da manne ɲaŋi in ŋa kundu ?
Nke ma golle an da do Raheli ya batten ŋa geni ?
An da in janba manne xa yi ? »
26 Labaani ti a da :
« Oku laadan ŋa,
xoxone nta yaxiini gide kaane,
27 xa,
koyen tinmandi do ke batte,
ken falle,
o na ri baanen xa kini an ŋa ti siino ɲeri tana gollen ŋa o maxa. »
28 Yaaxuba duŋe.
A do Leeya da koyen tinmandi,
ken bire,
Labaani da i ren yaxare Raheli kini a yi yaqe.
29 A da i komo yaxare Biliha kini Raheli xa yi.
30 Yaaxuba ro ti Raheli xa yi,
a na ken ya mulla diina Leeya yi.
A da siino ɲeri tana golli Labaani maxa.
[Yaaxuba renmu]
31 Tunka Duumanten da a wari nan ti Leeya feti seri sapinte yi i kiina maxa,
a da jiidiyen ɲaŋi a da,
xa Raheli ɲa boroken ŋa.
32 Leeya ri noxon wutu nan saare ti ren yugo yi,
a da a toxora Rubeeni [a wure ga ni :
« ren yugon faayi »] baawo a ti :
« Tunka Duumanten da in sapilloxaaxun wari,
saasa,
n kiina wa riini in xanu. »
33 Ken falle,
a da noxon wutu xadi,
ken xa ɲa ren yugo yi.
A ti :
« Tunka Duumanten da a mugu nan ti in feti seri xanunte yi.
A saage ke xa kinni in ŋa.
» A da a toxora Simoonu [a wure ga ni :
« a wa mugiini »].
34 A da noxon wutu xadi na ren yugo saara.
A ti :
« Keeta ke,
n kiina wa riini fanama in ŋa,
baawo in da ren yugu sikki saara a da.
» Ken ya saabu da a gaa a xilli Leewi [a wure ga ni :
« a wa fanameene »].
35 A da noxon wutu xadi nan saare ti ren yugo yi.
A ti :
« Keeta ken ke,
n wa Tunka Duumanten tiigana.
» Ken ɲa saabu da a ga da a toxora Yehuuda,
[a wure ga ni :
« a wa tiigandini »].
Ken falle a saarayun sigi.