Jopaye 28

Ken falle, Isiyaaxa da Yaaxuba xiri nan duwa a da, na ɲaamariyen kini a yi ti : « Maxa kanaananka yaxare yaxi. 2 Killen raga, an nan daga an kisima Betuyeli noqun ŋa, Padana-haraami, an na yaxare muuru an kaawu Labaani ren yaxarun ŋa. 3  wa riini an barekindi, a wa riini renmun kini an ŋa, a wa an bonsonŋun gabondini, an wa riini ɲa jama gabu xooxo yi. 4 A wa Ibirahiima bareken kinni an do an bonsonŋun ŋa, kuudo an na jamaane ke wutu xaye yi, an gaa mukkaaxun ŋa noqu ke be, Alla ga da a kini Ibirahiima yi. » 5 Isiyaaxa da Yaaxuba deni, a daga Betuyeli ren yugo Labaani noqun ŋa Padana-haraami, Haraaminke, Yaaxuba do Yesaawu kaawu ga ni.

6 Yesaawu da a tu ti Isiyaaxa duwa Yaaxuba da, na a wara dagana Padana-haraami, kuudo a na yaxare yaxi no, nan saage a kabana xadi ti a n maxa kanaananka yaxare yaxi. 7 Yaaxuba da i ma do i faaba sefen batu nan daga Padana-haraami. 8 Yesaawu da a faamu ti, kanaananka yaxaren nta liŋo i faaba da, 9 ken ya saabu da, a ga daga Ibirahiima renme Sumaayila noqun ŋa, na a ren yaxare Mahalaati yaxi kafiini i yaqun ŋa, ken ga ni Nebayooti xoxona yaxaren ŋa.

[Yaaxuba wuruye]

10 Yaaxuba ga bogu Beeri-seba, nan daga katta Haraana banŋen ŋa, 11 wuron ga ro, a da gide yogo wutu na a ɲa talla yi, nan xenqe no. 12 A kuyi i ga da segensegemaaden wari gelli ɲiiɲen ŋa ma kanxotte. Alla maliikanun wa segenanyanqana do segensegemaade ke yi. 13 Tunka Duumanten yinme xosi du toxo a kanma nan ti a da : « Nke ya ni Tunka Duumanten ŋa, an kisima Ibirahiima Alla, do Isiyaaxa Alla. An gaa tuumana ɲiiɲe ke be yi, n na a kinni an do an bonsonŋun ya yi, 14 i wa riini gabo xo seyijuran moxo. I ɲiiɲe ke wa yuruweene do kaaran su yi, kinbakkan do kinxennan do saahelin do . Ɲiiɲen xabiilanun su wa riini bareki do an do an bonsonŋun batten ŋa. 15 Nke yinme wa do an batte, n wa an koroosini an dagaran su yi, n wa an saagandini riini ke jamaane yi, n nta booxene bakka an ŋa abada, n ga da ke be laayidun wutu an da, ma in ga da a tinmandi. »

16 Yaaxuba xosi heje nan ti : « Tonŋun ŋa, Tunka Duumanten na yere ya, xa inke ma ɲi a tu. » 17 A kanu nan ti : « Yere ni kanu noqun ya, a ra nta ɲaana fo wo fo tana yi, Alla yinme kan falle. Yere ya ni kanmun laqen ŋa. »

18 A yillankara, suxuba fana, a yinmun ga wuyi gide ke be kanma, a da a sigindi xo gondanma, na ten joxi a kanma. 19 A da noqu ke xiri Beeti-yeli, a wure ga ni « Alla ka », saado ken ŋa, noqu ke ɲi xiriini Luuja. 20 Ken falle, Yaaxuba da tekken wutu Alla da nan ti : « Selli Alla gaa do in batte, na in tanga ke terende yi, na in yigandi, na in feetufata, 21 n kisinten ga na saage riini in faaba noqu, n wa Tunka Duumanten ragana in Kaman ŋa. 22 N ga da ke gide be sigindi xo gondoma, a wa riini ɲa Alla kan ŋa, ayiwa, an ga na naabure su xa kini in ŋa, n wa riini a taxandi tanmundin sadaxini an da. »