Jopaye 27

[Isiyaaxa duwanŋe]

Isiyaaxa ga xirisaaxu, a yaaxon toxo lanpunu ma i gaa regeene. A da i ren yugu sooma Yesaawu xiri nan ti a da : « N renme. » Yesaawu ti : « N naamu. » 2 « An da a wari, nke ken xaso keeta, n nta in karakoota tu. 3 Ken kuŋa saasa, an bunnun do an bundanŋun wutu, an nan daga xaɲe, na gunduntiye falle in ŋa. 4 An na fo liŋe soro in da a yi xoyi in gaa a mulla moxo be, n na a yiga nan duwa an da katta in gaa faatini. » 5 Jaaxa Isiyaaxa sefe koninto ku Yesaawu danŋa, Rebexa da i mugu. Yesaawu daga xaɲe.

6 Ken waxati yi, Rebexa da i renme Yaaxuba xiri nan ti a da : « N da a mugu, an faaba gaa tini Yesaawu da : 7 “ Tiye falle in ŋa gilli gunnen ŋa, an na a soro in da yigandi liŋe yi. N ga na a yiga bire be, n na a mundu Tunka Duumanten maxa, a na an barekindi katta in gaa faatini. ” 8 Saasa kuŋa, n renme in terinka, n gaa ke be koono an da, an na ken dabari. 9 Daga tanmisangallen ŋa, an na sugu siru filli raga riini, n na fo liŋe soro an faaba da bakka a yi xoyi a yinme gaa a mulla moxo be. 10 An do a na daga katta a yi, a na a yiga, nan duwa an da katta a gaa faatini. » 11 Yaaxuba ti : « N ma, n gida Yesaawu faten su ni yinten ya yi, yinte xa nta inke faten ŋa. 12 N faaba nda kati in faten ŋa tannu, a wa a tuunu nan ti in na a mulla na i janba ya, n nan maxa daga langande kiɲe in du yi do duwaawu batten ŋa. » 13 Saaxen ti : « Langanden nan xenu in ŋa an batten ŋa. N ga da ke be ko an da, anken na ken mundu riini tannu. » 14 Ken moxo, a daga sugu yogo raga riini katta saaxe ke yi, saaxe ke da i soro yigandi liŋe yi xoyi faaben gaa a mulla moxo be. 15 Ken bire, na i sooma Yesaawu yiraamun fo siren wutu i konpen ŋa, na a ro i sanba Yaaxuba xannen ŋa. 16 A da sugufaten xufa a kittun do a xannen ŋa. 17 Ken moxo, a ga da yigande be do buuru be dabari, a da i kini a yi.

18 Yaaxuba ri katta i faaba yi nan ti : « N faaba. » Faaben ti a da : « Ko ni ? » 19 Yaaxuba ti : « Nke Yesaawu ya ni, an sooma, an ga da ke be muuru in ŋa, n do a ri. N wa an ɲaagana, an nan giri nan taaxu, an na in tiye ke yiga, nan duwa in da. » 20 Isiyaaxa ti a da : « An da manne ɲa na ke tiye kita jowoye yi kundu ? » Yaaxuba ti : « Tunka Duumante, an Alla ya n da a ro in warijaxen ŋa. » 21 Isiyaaxa ti a da : « Tinko in ŋa fonne in renme, n na an meeme, selli tonŋun ŋa in renme Yesaawu ya ga na an ŋa. » 22 Yaaxuba tinko faabe ke yi, faaben da a meeme nan ti i noxoodu : « Sefexannen ni Yaaxuba sefexannen ya yi, xa kittun ni Yesaawu kittun ya yi. » 23 Yaaxuba kittun xufunten ni ti yinten ya yi, xoyi i gida Yesaawu moxo, faaben ma katu ken tuunu, a da i duwaawun kini a yi, 24 xa, a ti a da fina : « Tonŋun tonŋun ŋa, anken ya ni in renme Yesaawu yi ? » Yaaxuba ti a da : « Yabo, n ya ni. » 25 Ken moxo, Isiyaaxa ti : « N renme, an xaɲefo ke kiɲe in ŋa, n na a yiga nan duwa an da. » Yaaxuba da a do reesendolon kiɲandi a yi, a da a yiga nan mini. 26 Ken falle Isiyaaxa ti : « Tinko in ŋa na in xandunsunbu, n renme. » 27 Yaaxuba tinko na a xandunsunbu. Isiyaaxa ga da a doroken timen raga, a duwa a da nan ti : « Tonŋun ŋa, n renmen fatankanen na xoyi soxante be Tunka Duumanten ga da a barekindi ya.

28 Yelli Kamanen gan na kanmun jin kini an ŋa,

na an ɲiiɲen ɲa soxoɲiiɲe yi,

na soxofon do gaben kini an ŋa.

29 Yelli xabiilanun su gan n xaayene an da,

jamon nan sujudi an da,

an nan ɲa an waaxinun yinmanken ŋa,

an maarenmun su nan sujudi an da.

Sere n lange, sere be ga da an langa,

sere n bareki, sere be ga duwa an da. »

30 Bire be, Isiyaaxa ga duguta duwanŋen ŋa Yaaxuba da, Yaaxuba daga. A gida Yesaawu xa ri gilli xaɲeran ŋa, 31 na yigandi liŋe dabari katta i faaba yi nan ti : « N faaba, n wa an ɲaagana, an nan giri na in gunduntiyen yiga nan duwa in da. » 32 Isiyaaxa ti a da : « Anken ni ko yi ? » A ti : « Nke na an sooma Yesaawu ya yi. » 33 Ken batte su yi, Isiyaaxa saralle sarallayi xote, nan ti : « Ko ken do tiyen nan giri yere, n ga da a yiga nan duwa a da katta anken gaa riini ? Saasa ke, a kaman ya n riini bareki de. » 34 Yesaawu ga da i faaba sefen mugu, a butu nan xaaru nan ti : « N faaba, duwa in xa da. » 35 Isiyaaxa ti a da : « An waaxin da an duwaawun wutu ti janbeyen ŋa. » 36 Yesaawu ti : « Baatara fe, a ga toxore Yaaxuba, baawo janbanten ya ni, a da in janba ta fillo ? Ta fana, a da in soomaaxun haqen raga in ŋa, nan saage na in duwaawun xa raga in ŋa. Ken kuŋa saasa, duwaawu sawunte nta non ŋa inke da ba ? » 37 Isiyaaxa ti : « Nke ken da a ɲaŋi an da yinmanke yi, na a maarenmun su kini a yi golliɲaŋaano yi, na soxofon do kini a yi, nke katta manne tana kinni anken ŋa, n renme ? » 38 Yesaawu ti a da : « Ee n faaba ! Fo tana nta anken maxa duwaawu baane falle ? Duwa in xa da. » A xosi wu nan sonqo. 39 Isiyaaxa da wuce kuuru, ken falle nan ti :

« Ayiwa, anken nta riini soxoɲiiɲa sire kita,

an nta riini kanji gabe xa kita.

40 An kaafan nafan ya n riini an birandi.

An wa ɲaana an maarenme ke da kome yi.

Xa, an daganansaagaye do noqunun ŋa,

ken wa riini an hooraaxu, na a komonkacen kutu bakka an xannen ŋa. »

41 Yesaawu faayi ga da Yaaxuba xoni na a sababun ɲa a ga da duwaawu be kita i faaba yi. A ti du da : « N faaba kallen ntaxa laatu, a faati falle, n wa in maarenme Yaaxuba karini. » 42 Rebexa ga da i sooma Yesaawu ŋanniye ke tu, a da i sanba Yaaxuba xiri nan ti : « Ayiwa, an gida Yesaawu wa a mulla na an kari de, kuudo i na i tanbon tuga an ŋa. 43 Ken kuŋa, n renme in terinka, n gaa ke be koono an da, an na ken batu. Wuru gilli yere, an nan daga in gida Labaani noqun ŋa Haraana. 44 An nan toxo non ŋa wuce, ma an gida butten ga na n yanqa. 45 Bire be, a butten ga na yanqa, nan mungu an ga da fi be ɲaŋi a yi, n na sere xayi an ŋa, an na ri. Manne maxa, n gaa bonno axa filli su yi koota baane ? »

46 Ken falle, Rebexa daga a ko Isiyaaxa da ti : « Bireyen tu su ntaxa inke yi na a sababu Yesaawu Heetiganka yaxaru ku filli yi. Ayiwa, Yaaxuba xa nda daga ke jamaane yaxare yaxi, nafa ntaxa ɲaana inke bireyen ŋa keeta. »