[Isiyaaxa do Habimeleexi xiisa]
26
Waxati be Isiyaaxa ga ɲi Lahayi-rooyi,
dullen ro jamaanen ŋa xo Ibirahiima waxatin xallen moxo.
Ken saabu da,
Isiyaaxa daga taaxu Garaara yi,
Filisitinun tunkanyugo Habimeleexi noqu.
2 Tunka Duumanten bange a da nan ti :
« Maxa daga Misira !
Daga taaxu in gaa riini noqu be koyi an ŋa.
3 An nan taaxu ken noqu yi,
n wa ɲaana do an batten ŋa,
na an barekindi xa,
baawo in na ke jamaane kinni an do an bonsonŋun ya yi.
Ayiwa !
N ga kuna ti ke be yi an faaba Ibirahiima da,
n wa a tinmandini.
4 N wa an bonsonŋun gabondini xoyi saanun moxo,
na ke jamaane su kini i ya.
Ɲiiɲen xabiilanun su xa wa barekiini do i batten ŋa,
5 baawo,
Ibirahiima da in daro,
na in sefon terinka,
na in ɲaamarixannun batu,
a do in farilanun do in sariyanu. »
6 Isiyaaxa taaxu Garaara yi kundu ya.
7 Bire su jamaane ke seron ga na a tirindi Rebexa xibaaren ŋa,
a na ti i maarenyaxaren ya ni.
A kanna tini i yaqen ya ni,
non seron nan maxa daga i kari do a batten ŋa,
baawo a n faranpara.
8 Bire be Isiyaaxa ga da wuce ɲa jamaane ke yi,
koota yogo,
Filisitinun tunkanyugo Habimeleexi gaa faayindini do folonboten ŋa,
a xosi Isiyaaxa do Rebexa wari saxa yi.
9 A da faaren wara a yi na a xiri,
nan ti a da :
« An yaqen ya ni kuŋa mene.
Manne an ga ti an gidanyaxaren ya ni ?
» Isiyaaxa ti a da :
« N ɲi ken koono ya,
kuudo in nan maxa kara do a batten ŋa. »
10 Habimeleexi ti a da :
« An da manne ɲaŋi o yi kundu ?
Fonne tan in jama ke yogo na an yaqe ke kapanlenmaaxu.
An ma ɲi fi kiɲana o yi ? »
11 Habimeleexi ti i jaman su da kuŋa,
sere su nda kati ke yugo yi,
walla ma a yaqen ŋa,
a kaman wa kallen yanganxatan temme.
12 Xaaxon ga kiɲe,
Isiyaaxa soxo,
na i soxofon me kame kita,
Tunka Duumanten da a barekindi.
13 A kittidufoonun toxo gaboono ma a gaa ɲaana banna xoore yi,
nan ɲa seri senbente yi.
14 Tanmisen do nan guma gabe wa a maxa,
a do komen gabe,
ma Filisitinun gaa a haasidaaxunu.
15 Ken saabu da,
a faaba Ibirahiima komon ga da gedu beenu soxo a birantaaxun ŋa,
i da i su faga dooren ŋa na i bulu.
16 Ken kanma Habimeleexi ti Isiyaaxa da :
« Girindindi,
an na o jamaanen wara o da,
baawo an ya n senbente o yi. »
17 Isiyaaxa daga i tilliisen banba Garaara waranlaqen ŋa,
nan sabati no.
18 Na a toxo non ŋa,
gedu beenu ga soxe a faaba Ibirahiima birantaaxun ŋa,
a da i jaaba,
baawo Ibirahiima faati falle,
Filisitinun da i bulu,
nan saage na faaben toxon saxunten toxo gedu ku yi.
19 Koota yi,
Isiyaaxa golliɲaŋaanon da gede soxo guufuren noxo.
A ware jin yaaxa xoore yi.
20 Garaara nagaanaanon da Isiyaaxa nagaanaanon gaja nan ti ikun ya fo ni ji ke yi.
Isiyaaxa da gede ke toxora Yeseexa,
a wure ga ni « gajanŋe »,
baawo i gaja do a batte.
21 I da gedi fillandi soxo.
I gaja do ken xa batte.
I da ken toxora Sitina,
a wure ga ni « kutande ».
22 Ken kanma,
a girindindi bakka no,
nan daga taaxu noqu tana,
na gedi sikkandi soxo no.
Gajanŋe ma ɲa do ken batten ŋa.
A da a toxora Rehebooti,
a wure ga ni « yuruwante »,
a ti :
« Tunka Duumanten da o bisimilla noqu yuruwante yi.
Ayiwa,
o wa riini gabo xa. »
23 A do i toxo no nan taaxu Beeri-seba.
24 A kiɲekoota wuron ŋa no,
Tunka Duumanten bange a da nan ti :
« Nke ya ni an faaba Ibirahiima Alla yi.
Maxa kanu,
baawo in wa do an batte,
n wa an barekindini,
na bonsonŋen gaben kini an ŋa,
n kome Ibirahiima saabu da. »
25 Isiyaaxa da sadaxindinoqu sigindi no,
na Alla xiri ti i toxo,
Tunka Duumante.
A da i tilliisen banba no.
A golliɲaŋaanon da gede tana soxo non ŋa.
26 Koota yogo,
Habimeleexi do i kapanlenma Huujati do i kurunyinmanke Pixooli giri Garaara,
nan ri Isiyaaxa sagata.
27 Isiyaaxa ti i da :
« Axa riini in sagata yere yi manne ?
Axa da in xoni na in xata bakka axa jamaanen ŋa. »
28 I ti a da :
« O da a wari ya nan ti Tunka Duumanten wa do an batte.
O ti kuŋa,
o do an nan xawa kunana me da ya.
Oku kun na a mulla o do an nan tafundi ya.
29 Kuna !
O nan tafundi,
nan ti an nta fo bure ɲaana o yi,
xoyi o ga ma fo bure ɲaŋi an ŋa moxo be,
baawo o da an ragemoxon sirondi,
na an kisinten wara dagana.
Ayiwa,
a xura o da saasa nan ti Tunka Duumanten da an barekindi. »
30 Ken moxo,
Isiyaaxa da baasi xoore dabari i da,
i yige nan mini.
31 A yillankaran suxuba fana,
i kuna me da.
Ken kanma,
Isiyaaxa da i wara kille,
i daga jamu.
32 Ken koota baane su yi,
Isiyaaxa golliɲaŋaanon ri a ko a da ti i ga ɲi gede be soxono,
a ware jin ŋa.
33 Isiyaaxa xosi gede ke xiri Saba.
Ken ya saabu da,
debe ke toxon gaa xiriini hari lenki Beeri-seba,
a wure ga ni « kuneyen gede ».
[Yesaawu yaxu]