[Ibirahiima soxodu]
25
Ayiwa,
yaxare tana ɲi Ibirahiima maxa,
a toxon ni Xetuura.
2 A da Jimuraana do Yaxasaani saara a da,
a do Medaani do Mediyaana do Yisibaaxa,
kafiini Suuha.
3 Seeba do Dedaani faaba ya ni Yaxasaani ke yi.
Dedaani soxoodin ni Hasuurilanko,
a do Letuusilanko do Luumilankon ya.
4 Mediyaana soxoodin ni Yeefa do Hefeera,
kafiini Hanooxi do Habiida,
a do Lidaaya.
Ku ya ni Xetuura soxoodin ŋa.
5 Fo wo fo ga ɲi Ibirahiima mareyen ŋa,
a da a su kini Isiyaaxa yi.
6 Yaxaru kuttu be renmun ga ɲi Ibirahiima maxa,
a da i kittidunku,
xa,
gelli a yinme ŋalintaaxun ŋa,
a da i wara dagana taaxu kinbakkan ɲiiɲe tana yi,
nan giri Isiyaaxa kaaran ŋa.
7 Ibirahiima da kame do tanɲere do siino karagi bire.
8 Ken falle,
a da i yonkiranwareyen lagaren ɲa.
A faati bireyi barekinti tinmante falle,
nan kafi i seri fanon ŋa.
9 A ren yugu ku,
Isiyaaxa do Sumaayila,
i da a firindi Maxapeela gidinkunme ke yi,
Maamere kaara,
Heferoona Heetiganke ten noxo,
Sohaara ren yugo,
10 te ke be Ibirahiima ga da a xobo Heetigankon ŋa.
Ibirahiima bulu i yaqe Saaratu kaaran ŋa.
11 Ibirahiima faati falle,
Alla da a ren yugo Isiyaaxa barekindi,
aken taaxu Lahayi-rooyi geden kaaran ŋa.
12 Sumaayila kaadunkon taarexun faayi,
Ibirahiima ga da i ren yugo be kita Haajara yi,
Saaratu tunbaari yaxarin Misiranke ke.
13 Sumaayila renmun toxonun faayi,
a do i ga da me batu moxo be :
Nebayooti,
Xedaari,
Daabiyeli,
Mibusaamu,
14 Misima,
Duuma,
Maasa,
15 Hadaadi,
Teema,
Yetuuru,
Nafiisa do Xediima.
16 Ku ya ni Sumaayila renmun toxonun ŋa.
I ya n ɲa yinmanko tanmi do fillo,
baane su do i xabiila,
do i debe.
17 Sumaayila da kame do tanjikke do siino ɲeri ya bire.
Ken falle,
a da i neeguye lagaren ɲa,
nan faati,
nan kafi i seri fano beenu ga faati.
18 A bonsonŋun taaxu na a wutu Haawila nan daga a wara Suura be gaa Misira kaaran ŋa,
Hasuura kille.
I taaxu i waaxinun kuttun laatoyen ŋa.
[Yaaxuba xibaare]
(Soora 25.19-36.43)
[Yesaawu do Yaaxuba]
19 Ibirahiima renme Isiyaaxa bonsonŋun faayi.
20 Isiyaaxa gaa Rebexa yaxini,
a wuyin wa tannaxate siine.
Rebexa ni Betuyeli ren yaxaren ya,
Labaani xoxoni yaxare.
I su ni Haraaminkon ya yi,
nan giri Padana-haraami.
21 Rebexa ɲa boroge yi.
Isiyaaxa da Tunka Duumanten ɲaaga a da.
Tunka Duumanten da a jaabi.
Rebexa da warijaxen kita.
22 Fununlenmun toxo me yontono a lengan ŋa,
a ti :
« Manne ni inke yi ?
» A da a koyi Tunka Duumanten ŋa,
ken da a jaabi ti :
23 « Jamo filli ya ni an furaasen ŋa,
jaman xabiilanu filli ya n riini bogu an ŋa,
i feteene ya,
baanen wa senbene diina baanen ŋa,
Sooman wa xaayeene xoxonen da. »
24 A saare waxatin ga kiɲe,
a danqanaaxu nan ti funun ya ni.
25 Fana be ga bange¤,
a dunben ya ni,
faten su ni yinten ya yi,
xoyi daaban moxo.
I da a toxora Yesaawu [a wure ga ni :
« yintinte »].
26 Ken falle,
a xoxonen ri,
Yesaawu tanjunqon wa a maxa,
i da a toxora Yaaxuba [a wure ga ni :
« tanjunqon » wala xa « janbante »].
Ken da a ɲi Isiyaaxa wuyin wa tandume siine.
27 Leminu ku filli xooro.
Yesaawu ɲa xaɲaana haqilante yi,
a wa gundunyiileyen mulla.
Yaaxuba,
ken ɲa kaadunsere yi,
seri mulle.
28 Isiyaaxa na Yesaawu ya mulla,
baawo gunduntiyen nan liŋi a da,
xa Rebexa na Yaaxuba ya mulla.
29 Koota yogo,
Yaaxuba da maxafonjin dabari,
Yesaawu ga giri gunnen ŋa,
a dullunte.
30 A ti Yaaxuba da :
« N dullu buru,
an maxafonji dunbe ke yogo kini in ŋa de.
» Ken ya saabu da,
i ga da a xiri Hedoomu [a wure ga ni :
« dunbiye »].
31 Yaaxuba ti a da :
« Lenki an na an soomaaxun gaaga in ŋa. »
32 Yesaawu ti a da :
« Dullen wa riini in kari,
soomaaxu na manne sirono in ŋa ? »
33 Yaaxuba mali a yi nan ti :
« Kuna in da fina.
» Yesaawu kuna a da,
nan saage na i soomaaxun gaaga a yi.
34 Ken moxo,
Yaaxuba da buurun kini a yi,
a do maxafonji,
Yesaawu da i yiga nan giri nan daga.
A da i soomaaxu ke wararanburu ke moxo ya yi.