[Isiyaaxa yaqen muurunde]
24
Ibirahiima xirisaaxu na wuyin kita moxo siri,
Tunka Duumanten da bareke ro a fiinun su yi.
2 Koota yi,
a ti i golliɲaŋaanan xirise be beesinten gaa a fiinun su yi da :
« Haqu toxo in da,
an kitten ro in wure¤,
3 an nan kuna in da ti Tunka Duumanten ŋa,
kanmun do ɲiiɲen Kama,
nan ti an nta yaxare kinni in ren yugon ŋa bakka Kanaanaganko ren yaxarun ŋa,
ku beenu in taaxunten gaa i noxo,
4 xa,
nan ti an wa dagana in yinme faabankan ŋa,
na yaxare wutu in seron ŋa,
n ren yugo Isiyaaxa da. »
5 Golliɲaŋaana ke ti a da :
« A ra wa ɲaana yaxaren nta duŋeene riini yere.
Ken kuŋa,
o do an ren yugon ra wa dagana an faabankan ŋa ba ? »
6 Ibirahiima ti a da :
« Aayi,
an do in ren yugon nan maxa daga no.
7 Tunka Duumante ke be ga ni kanmun tagandaanan ŋa,
aken ya n da in bagandi in faabankan ŋa,
n saareɲiiɲe,
aken Alla ya n sefe in da nan kuna in da ti :
“ N wa ke jamaane kinni an bonsonŋun ŋa.
” A wa i maliikan walla dagana an kaane,
kuudo an na yaxare kita riini gilli no.
8 Yaxare ke nda bara an batta riini,
ken bire an baari bakka in kunanden ŋa,
xa ren yugo ke,
an do a n maxa daga non ŋa. »
9 Ken bire,
golliɲaŋaanan da i kitten kini Ibirahiima yi nan kuna a da ke fi kanma.
10 Ken falle,
a da i kaman yugon ɲogomo tanmi do a munnafantafo gabe tana wutu,
nan daga Haraami-nahariimi¤ yi,
Nahooro taaxunten gaa debe be yi.
11 A ga kiɲe no,
a da ɲogomo ku tusindi gedinlaqe yogo yi kanfallun ŋa,
lellan mulaanen biren ya ni yaxarun ɲoŋo waxatin ŋa.
12 Ken bire,
a duwa :
« Tunka Duumante,
n yinmanke Ibirahiima Alla,
an siroyen koyi in yinmanken ŋa,
n gaa ke be mundunu,
n na a kita lenki.
13 N faayi ke sikki geden kaaran ŋa,
debidunkon ren yaxarun wa riini jin xesu yere.
14 N ga na ti xusunne be da :
“ Haqu toxo,
an na ji kini in ŋa,
n nan mini.
” a nan ti :
“ Mini !
Ayiwa in wa an ɲogomon xa minindini.
” ken ya nan ɲa,
an golliɲaŋaana Isiyaaxa yaqen ŋa.
Ken ŋa,
n wa a tuunu ti an siro in yinmanken da. »
15 A ma hari duguta i sefen ŋa,
Rebexa xosi ri,
ɲoŋoyokken wa a kunken ŋa.
Rebexa ni Ibirahiima waaxi Nahooro do Milika ren yugo Betuyeli ren yaxaren ya yi.
16 Ren yaxare ke faranparen ni moxo siri,
xuson ya n ni,
a ma yugo wari abada.
A yanqa gedinlaqe ke yi na i yokken faga nan saage.
17 Golliɲaŋaana ke wuru do a batte,
nan ti a da :
« Haqu toxo,
an na ji kini in ŋa in nan mini. »
18 A ti a da :
« Yabo,
n yinmanke.
» A da i yokken yanqandi kuruma,
na jin kini,
yugon nan mini.
19 Ken falle,
a ti :
« N wa jin kinni,
an ɲogomon xa na mini moxo siri. »
20 A da jin yilla fuuren ŋa kuruma nan wuru dagana geden ŋa,
na jin bagandi ɲogomo ku su da.
21 Golliɲaŋaana ke kaawafinten toxo sikki,
a kori hari sefene,
a wa du da :
« Ke na inke killen sironten ya Tunka Duumanten maxa. »
22 Ɲogomon ga mini bire be nan duguta,
a da nuxundunkanŋe wutu,
a wa menqalli baane do fonne haqe,
na kangodo filli wutu,
baane su xotoyen wa tanpille do menqallu segi.
23 Ken falle,
a da xusunne ke tirindi :
« Anken ni ko renme yi ?
Wuyira wa kiteene an faaban kan ŋa,
sere ra gaa wuyini no ba ? »
24 A ti a da :
« Nke ni Betuyeli ren yaxaren ya yi,
Milika do Nahooro kisimare.
25 Yabo,
wuyiran wa in faaba kan ŋa,
daaban yiganden gaben xa wa a maxa. »
26 Golliɲaŋaana ke sujudi Tunka Duumanten da kuŋa,
27 nan ti :
« Tiigeyen wa Tunka Duumanten da,
n kaman yugo Ibirahiima Alla,
an da an siroyen do an saxiiraaxun koyi in kaman yugon ŋa.
An da in geesu in terende ke yi,
ma an gaa in walla in kaman yugon seron kaara. »
28 Rebexa wuru dagana i ma banŋe,
ke be ga ɲa na a su laxami a da.
29-30 Gidanyugo wa a maxa,
a toxon ni Labaani.
A ga da nuxundunkanŋe ke do godo ku wari i xoxona yaxaren maxa,
a do a ga da yugon fi ɲaŋinton mugu,
a da a jewondi dagana do golliɲaŋaana ke batte gedinlaqen ŋa,
a da a do i ɲogomon ɲi no.
31 A da a kuuɲi nan ti a da :
« O n daga,
Tunka Duumanten ga da sere ke be barekindi,
an na manne mundunu kanfallen ŋa yere ?
N da wuyiran moxo sirondi an danŋa yinme,
na noqu dabari an ɲogomon xa da. »
32 Ken ŋa,
yugo ke daga do a yi kan ŋa.
I da ɲogomo ku likkun yanqandi,
na biraadon kini i ya,
na jin kini,
yugo ke na i taanun wanqi,
a do a do ku beenu gaa doome.
33 Ken falle,
i da yiganden kini i ya,
xa golliɲaŋaana ke da sefen wutu nan ti :
« Nke ra nta yigeene na a toxo fo be gaa in maxa in ga ma a ko.
» Labaani ti a da :
« A siro,
a ko. »
34 A ti :
« Nke ni Ibirahiima golliɲaŋaanan ya yi.
35 Tunka Duumanten da in kaman yugo ke barekindi moxo siri,
na a ɲa seri xoore yi,
na tanmisen do nan kini a yi,
a do kanŋen do godoxulle,
kafiini komen yugon do a yaxare,
a do ɲogomen do fare.
36 Saaratu,
ken ga na in kaman yugo Ibirahiima xojidunken ŋa,
a xaso falle,
a saare ti ren yugo yi,
fo wo fo gaa in kaman yugo ke maxa kuŋa,
a da a su kini a yi.
37 « N kaman yugon da in kunandi kuŋa nan ti :
“ Maxa yaxare kini in ren yugo ke yi Kanaanaganko ren yaxarun ŋa,
kun be,
n taaxunten gaa i noxo,
38 xa,
an wa dagana in yinme faabankan ŋa,
na yaxare mundu in ren yugo ke da non ŋa. ”
39 N ti in kaman yugon da :
“ A ra wa ɲaana yaxare ke nta duŋeene riini yere. ”
40 Ken ŋa,
a ti in da :
“ N gaa tereene do Tunka Duumante ke be liŋun ŋa,
a wa maliikan walla an kaane,
a wa an killen liŋondini,
kuudo an na yaxare kita in ren yugon da,
n seron ŋa,
n faabanka.
41 An ga na kiɲe in seron ŋa,
i nda bara yaxaren walla riini do an batte,
an kuneye ke nta an ragana. ”
42 « N ga kiɲe gedinlaqe ke yi lenki kuŋa,
n duwa :
“ Tunka Duumante,
n yinmanke Ibirahiima Alla,
gelli an gaa in terende ke liŋondini,
n gaa terende ke be yi,
43 ayiwa,
n siginten ya faayi ke gedinlaqen ŋa,
ken ŋa,
xusunne be nda bogu nan ri jixesi,
n ga na ti a da :
‘ Ji yogo kini in ŋa n nan mini. ’
44 a nan ti :
‘ Mini,
ayiwa,
n wa an ɲogomon xa minindini.
’ Ken na ɲa yaxare be Tunka Duumanten ga da sugandi in kaman yugo ke ren yugon da. ”
45 « N ma hari duguta in duwaawun ŋa,
ma in yaaxen ga nta Rebexa yi bakka,
a ɲoŋo yokken gaa a kunken ŋa.
A yanqa gedinlaqe ke yi,
na jin xesu.
N ti a da :
“ Ji yogo kini in ŋa in nan mini. ”
46 A da i yokken yanqandi kuruma nan ti :
“ Mini,
ayiwa,
n wa an ɲogomon xa minindini.
” N mini,
n ɲogomon xa mini.
47 Ken falle,
n da a tirindi nan ti :
“ Xusunne,
anken ni ko renme yi ?
” A ti in da :
“ Nke ni Betuyeli ren yaxaren ya yi,
Nahooro do Milika kisimare.
” Ken bire,
n da kanŋen ro a nuxunnen ŋa,
na godon ro a kitten ŋa.
48 Ken falle nan sujudi Tunka Duumanten da,
na a tiiga,
n kaman yugo Ibirahiima Alla,
aken be ga da in kanda killi siren kanma,
na in kaman yugon waaxin ren yaxaren kita a ren yugon da.
49 Ayiwa saasa,
gelli axa gaa a mulla na siroye do saxiiraaxu saxu in kaman yugon kanma,
xa da in xibaari.
A ga na ɲi ken ga fe xa,
xa da a ko in da,
n nan daga noqu tana. »
50 Labaani do Betuyeli ti :
« Ke fi giri Tunka Duumanten ya yi.
Oku ra nta fo wo fo koono ke yi,
a ɲanŋen do a ɲanŋinbalaaxun su.
51 Rebexa faayi an wure,
a raga an do a n daga,
a nan ɲa an kaman yugon ren yugon yaqen ŋa xoyi Tunka Duumanten ga da a ko moxo be. »
52 Bire be Ibirahiima golliɲaŋaanan ga da ke sefe mugu,
a sujudi Tunka Duumanten da.
53 Ken falle,
a da kanŋen do xaalisixullen maxanyettun do yiraamun bagandi na i kini Rebexa yi,
nan saage na ɲaxalifo nafanto kini a gidanyugo ke do a ma xa yi.
54 Ku fiinu dangi falle,
a do i teranlenmon yige nan mini nan wuyi.
A yillankara,
a ti Rebexa gidanyugo ke do a ma da :
« N wa killen mundunu nan saage dagana in kaman yugon noqu. »
55 I ti :
« O wa a mulla xuso ke nan toxo o maxa bitonnu,
ma bito tanmi me,
ken falle,
a na daga. »
56 A ti i da :
« Xa maxa in leelandi xadi,
Tunka Duumanten da in killen liŋondi nan duguta.
Xa da in wara in nan xosi daga in kaman yugon noqun ŋa ta baane. »
57 I ti i na ren yaxare ke xiri,
kuudo na a tirindi i sinmeyen ŋa.
58 I da Rebexa xiri nan ti a da :
« An wa a mulla nan daga do ke yugo batte lenki ba ?
» A ti i da :
« Yabo. »
59 Ken bire,
i da Rebexa do i xoorondaana yaxaren¤ wara dagana do Ibirahiima golliɲaŋaanan do i teranlenmon batte.
60 I duwa Rebexa da nan ti :
« O maaren yaxare,
yelli an gan na ɲa wujunun wujunun seron ma yi,
yelli an bonsonŋun gan na ɲa i xonnon maraano yi. »
61 Rebexa do i komo yaxarun giri nan setu ɲogomon kanma nan daga do golliɲaŋaanan batte.
62 Ken da a ɲi,
Isiyaaxa giri bakka Lahayi-rooyi geden banŋen ŋa,
a sabatinten wa Negeba yi.
63 Lelle yogo,
Isiyaaxa baane daga yiile gunnen ŋa.
A ga da i yinmen wutu,
a xosi ɲogomon wari laatoyen ŋa katta du yi.
64 Rebexa xa da i yinmen wutu,
a da Isiyaaxa wari,
a xosi bonte bakka ɲogomen kanma.
65 A ti golliɲaŋaana ke da :
« Ke yugo ni ko yi,
a gaa riini gemu o yi ke gunne yi yere ?
» A ti a da :
« N kaman yugo Isiyaaxa ya ni.
» A da i xufan wutu kuŋa na i yeeson muxundi.