[Saaratu faatiye]
23
Saaratu da kame do tanpille do siino ɲeri ya bire.
2 A faati Xiriyaata-haraaba,
ken ga ni Heburoona yi,
Kanaana jamaane.
Ibirahiima wu,
na Saaratu saananji.
3 Ken falle a giri a kanma nan daga Heetigankon sagata.
4 A ti :
« Nke ni mukken ya yi axa maxa yere,
n wa a mulla kuŋa,
axa na noqu gaaga in ŋa,
kuudo na in fure ke bulu no. »
5 Heetigankon ti a da :
6 « O yinmanke !
O terinka !
Anken ni seri xoore ya yi oku naxa yere.
Furungoorun faayi,
noqu be ga n liŋo an da,
an fure ke bulu no.
Sere nta o yi yere,
ke be ra ga an kabana an furen buliyen ŋa no. »
7 Ibirahiima giri,
nan sujudi ɲiiɲe ke taaxaanon da.
8 Ken falle,
a ti i da :
« Xoyi axa ga duŋe in na in fure ke bulu yere,
n wa a mundunu axa maxa kuŋa,
axa na Sohaara ren yugo Heferoona ɲaaga in da,
9 a na Maxapeela gidinkunme ke be gaa a ten laqen ŋa gaaga in ŋa ti jonko tinmante yi,
axa jon ŋa,
na a ɲa fururora yi. »
10 A da a ɲi Heferoona taaxunten wa Heetiganko ku naxa.
A xosi Ibirahiima jaabe i su jon ŋa,
a do sere su ga ɲi deben roraqen ŋa, nan ti a da : 11 « N kaman yugo,
n terinka !
N da te ke do gidinkunme be gaa a yi kuyi an ŋa.
N da a kuyi an ŋa in jaman su jon ŋa,
an na an fure ke rondi no. »
12 Ibirahiima sujudi sero ku jon ŋa xadi,
13 nan sefe Heferoona da moxo yi,
be su gaa a digaamen mukku :
« N wa an ɲaagana an na in terinka.
N wa te ke jonkon kinni an ŋa,
an na a raga,
ken ŋa,
n na in furen bulu no. »
14 Heferoona ti :
15 « N yinmanke,
n terinka !
Ɲiiɲe be nta dangini kamo naxati xaalisixullunduubeli ken nta in do an naxa,
an furen rondi no.
»
16 Ibirahiima ga da Heferoona digaamen mugu,
a xosi godoxulle ke haqen jaate a da,
a yinme ga da haqe be ko Heetigankon su jon ŋa,
kamo naxati xaalisixullunduubeli,
ken waxati xaalisin ŋa.
17 Ken bire,
Heferoona te be gaa Maxapeela,
Maamere kinbakkan ŋa,
a do gidinkunme be gaa a yi,
do yitte su gaa te ke noxo,
ma a gaa a yoorini,
18 i su ɲa Ibirahiima fo yi Heetigankon do sere su gaa deben roraqen ŋa jo.