[Ibirahiima jaarabiye]
22
Ku fiinu dangi falle,
Alla da Ibirahiima jaarabi.
A da a xiri :
« Ibirahiima !
» A ti :
« N naamu. »
2 Alla ti a da :
« An renyugu baane Isiyaaxa be an gaa a mulla,
a raga an do a n daga Mooriya jamaanen ŋa,
an na a sadaxi in da sadaxaxuruminte yi non ŋa gide kanma,
n gaa riini ke be koyi an ŋa. »
3 A yillankara,
Ibirahiima furute na i faren moxon sirondi,
na i golliɲaŋaano filli wutu,
a do i renyugo Isiyaaxa.
A da suwan yogo xa kara sadaxaxurumiyen xanne maxa.
Ken falle,
Alla ga da noqu ke be koyi a yi,
a daga no.
4 Bito sikki terende falle,
Ibirahiima da i yinmen wutu,
a da dingira ke hayina laatoyen ŋa.
5 A ti i golliɲaŋaano ku da kuŋa :
« Axa do faren nan toxo yere.
N do lemine ke wa dagana Alla batu dooke,
ken bire o na saage riini katta axa yi. »
6 Ken bire,
Ibirahiima da suwo ku tiŋandi Isiyaaxa yi,
a yinme da yinben do labon wutu,
ken ŋa,
i daga doome.
7 Isiyaaxa da i faaba sefanlenmaaxu,
nan ti a da :
« N faaba.
» Ibirahiima ti a da :
« Manne xa n ɲa,
n renme ?
» Isiyaaxa ti :
« Ke ni suwan do yinben ya yi,
xa jaxe be gaa ɲaana sadaxa xuruminten ŋa na minne ? »
8 Ibirahiima ti a da :
« N renme,
jaxe be gaa ɲaana sadaxa xuruminte,
a na Alla ya yi.
» I filli jokki do i killen ŋa doome kuŋa.
9 Bire be,
i ga kiɲe dingira ke be Alla ga da a ko a da,
Ibirahiima da sadaxindinoqun dabari,
na suwon saxu a kanma.
A da i renyugo Isiyaaxa siiti kuŋa,
na a saxundi suwo ku kanma.
10 Ken falle,
a da i labon wutu kuudo na i renme ke xurusi.
11 Ken waxati,
Tunka Duumanten maliikan gangundi kanmun ŋa :
« Ibirahiima !
Ibirahiima !
» A ti :
« N naamu. »
12 A ti a da :
« Maxa an renme ke xurusi,
maxa fo ɲaŋi a yi,
baawo in da a tu saasa,
ti an wa kanna inke Alla yi,
an ma bara an ren baanen kinni in ŋa. »
13 Ibirahiima da i yinmen wutu,
nan faayindi,
ma a yaaxen ga nta jaxandigen bennun balanton gaa yitten ŋa.
A daga jaxe ke raga,
na a saxundi i renmen batten ŋa sadaxindinoqun ŋa.
14 A da noqu ke toxora Adonayi-yire [a wure ni « Kamanen yaaxen wa a yi »].
Ken saabu da,
gelli ken waxati,
seron wa tini :
« A na Tunka Duumanten ya yi giden kanma. »
15 Tunka Duumanten maliikan da Ibirahiima gangu ta fillandin ŋa gilli kanmun ŋa nan ti :
16 « N kuna ti in yinme jaatin ŋa,
Tunka Duumanten daalen ya ni,
an ga da ke ɲa,
an ga ma bara an renyugu baanen kinni in ŋa.
17 Ma in ga da an barekindi bareke fo xoore yi,
na an bonsonŋun gabondi xo kanmun saanun moxo,
xoyi seyinfunsen moxo geejinxannen ŋa,
i wa riini i xonnon mara xa.
18 Ɲiiɲen xabiilan su xa wa barekiini do an bonsonŋen batte,
na a sababu an ga da in sefen batu. »
19 Ken falle,
Ibirahiima do i renme ke saage katta i golliɲaŋaano ku filli yi.
I su giri nan daga doome Beeri-seba yi,
i gooren banŋe,
nan ɲa non ŋa.
[Nahooro bonsonŋu]
20 Ku fiinu dangi falle,
a koni Ibirahiima da ti,
Milika da renmun saara a waaxi Nahooro da :
21 Wuci do Buuja,
a do Xemuyeli,
ken ni Haraami faaba ya,
22 a do Keseedi do Hajo do Pilidaasi kafiini Yidilaafa do Betuyeli.
23 Betuyeli,
ken ya n da Rebexa saara.
Ku ya ni renyugu segi be Milika ga da i saara Nahooro da.
24 A taarayaxare Reyuuma xa da renmu saara a da.
Kun ni Teeba,
Gahaama,
Tahasa,
a do Maaxa.