[Isiyaaxa bangeye]
21
Tunka Duumante ya n siro Saaratu da,
xoyi a ga da a ko moxo be nan xaso.
A ga da laayidu ke be xa wutu,
a da a tinmandi a da.
2 Saaratu da noxon wutu nan jiidi ti ren yugo yi Ibirahiima da,
nan gemu Alla waxati rakutunte ke yi,
ken da a ɲi Ibirahiima xirisaaxu moxo siri.
3 Ibirahiima da ren yugo ke toxora Isiyaaxa,
[a wure ga ni :
« soye »],
Saaratu ga da ke be saara a da.
4 A saareyen bita segundi,
a da a sunnandi,
xoyi Alla ga da a ɲaamari moxo be.
5 Isiyaaxa gaa saarene,
Ibirahiima wuyin wa kame siine.
6 Saaratu ti kuŋa :
« Alla da ɲaxalifi kini in ŋa,
n gaa soyini,
ayiwa,
sere su nda a mugu,
a wa soyini kapa in ŋa. »
7 A ti xadi :
« Kon ɲi katta tini Ibirahiima da :
koota yi,
Saaratu wa riini renme sugundi ?
A faayi ke,
n da ren yugo kini a yi a xirisaaxun ŋa. »
[Haajara do i renme Sumaayila xateye]
8 Isiyaaxa ga xooro,
Saaratu da a fata bakka konbon ŋa.
A fate koota,
Ibirahiima da yigandi xoore dabari.
9 Haajara ga da ren yugo be kita Ibirahiima da,
Saaratu ga da a do i renme Isiyaaxa wari sangana,
10 a ti Ibirahiima da :
« Ke komo yaxare do i ren yugo ke xata,
baawo a nta xawa xaye wuttu kapa in ren yugo Isiyaaxa yi. »
11 Ke sefe da Ibirahiima sunondi moxo siri,
a ren yugo ke danŋa.
12 Xa,
Alla ti a da :
« Maxa suno do ren yugo ke do tunbaari yaxare ke yi.
Saaratu sefexannu ku batu,
baawo in ga da an bonsonŋe be laayidun wutu,
n na a bangandini Isiyaaxa ya yi.
13 Xa,
tunbaari yaxare ke ren yugo ke xa,
n wa xabiila xoore bagandini a yi,
baawo a xa na an renmen ya. »
14 A yillankaran suxubafana,
Ibirahiima da silafandan do sumalli fakka ji kini Haajara yi,
na i saxu a kunken ŋa,
na a ren yugo ke xa kini a yi,
na a wara.
A daga do gunjuran ŋa,
nan sanku Beeri-seba banŋe.
15 Bire be,
sumalle ke jin ga ɲeme,
a da renme ke saxondi badage yogo wure,
16 nan daga taaxu laatoyen ŋa kamo filli sogone me.
A wa tini du da :
« N nta a mulla na in renmen wari kalla.
» A toxo taaxunu nan taŋe a yi,
a gaa wuunu.
17 Alla da lemine ke wuxannen mugu,
Alla maliikan da Haajara gangu kanmun ŋa nan ti a da :
« Haajara,
manne n ɲa ?
Maxa kanu,
baawo Alla da lemine ke xannen mugu na a toxo i saxuran ŋa.
18 Giri an nan sigi,
an na an renme ke tigiti an kitten ŋa soobe maxa,
baawo in wa riini xabiila xoore bogu a yi. »
19 Alla da a yaaxon wuɲi,
a xosi jinyaaxe wari.
A daga sumallen faga ken ji ya,
na renme ke minindi.
20-21 Renme ke do Alla wa doome,
a xooro na i bireyen su ɲa Paraana gunjuran ŋa,
a ɲa xaɲaana kittiranliŋe yi ti bundanŋen ŋa no.
Saaxen da yaxare muuru a da Misira jamaanen ŋa.
[Ibirahiima do Habimeleexi sarati]
22 Ken waxati baane,
Habimeleexi do i kurunyinmanke Pixooli,
i ri Ibirahiima sagata nan ti a da :
« Anken do Alla wa doome ya an fi ɲaŋunten su yi.
23 Ken kuŋa saasa,
kuna in da ti Alla yi,
nan ti an nta in janbana,
an nta in renmun janbana,
an nta in bonsonŋun janbana.
An wa siroono in da,
xoyi in ga siro an da moxo be,
nan siro jamaane ke da,
an gaa mukkaaxun ŋa jamaane ke be yi. »
24 Ibirahiima duŋe a da i muurifon ŋa,
nan kuna a da.
25 Ken falle,
Ibirahiima da Habimeleexi jalagi,
na a sababun ɲa,
a golliɲaŋaanon ga da gede yogo raga Ibirahiima seron ŋa.
26 Habimeleexi ti a da :
« Nke nta ke golle ɲanŋaana tu,
anken xa ma a ko in da,
lenki falle xa,
n ma a mugu. »
27 Ibirahiima da tanmiso do naanu raga,
na i kini Habimeleexi yi.
I filli su da saratin wutu doome ke ya yi.
28 Ken falle,
Ibirahiima da jaxa yaxaru ɲeri wara i dura.
29 Habimeleexi ti a da :
« An da ku jaxo ɲeri wara i dura manne xa yi ? »
30 A ti a da :
« Ku jaxo ɲeri raga,
n kitten do an kitte,
kuudo nan ɲa seeda yi in da,
nan ti inke ya n da ke gede soxo. »
31 Ken ya saabu da,
noqu ke toxon ga xiri Beeri-seba¤,
baawo i filli su kuna non ŋa.
32 I da saratin wutu Beeri-seba yi ke moxo ya.
Ken falle,
Habimeleexi do i kurunyinmanke Pixooli saage dagana Filisitinun jamaanen ŋa.
33 Ibirahiima xa da yitten lori Beeri-seba.
Non ŋa,
a da Alla duumanten xiri ti i toxo Tunka Duumante.
34 Ken falle,
Ibirahiima da wucu laate ɲa Filisitinun jamaanen ŋa.