[Habimeleexi do Ibirahiima yaqe Saaratu]
20
Fi falle,
Ibirahiima yille gilli Maamere yitti xooron ŋa,
nan daga Negeba.
A taaxu Garaara yi,
Xadesi do Suura naxa,
na wuce ɲa no.
2 Ibirahiima wa tini seron da,
i maaren yaxaren ya ni Saaratu yi.
Ken saabu da,
Garaara tunkanyugo Habimeleexi da seron wara dagana Saaratu wutu.
3 Alla ri katta Habimeleexi yi kuyin ŋa nan ti a da :
« An ga da yaxare ke be wutu,
an wa kalla a saabu da,
baawo a yaxinten ya ni. »
4 Xa,
Habimeleexi ma ɲi ga joofe Saaratu yi.
A ti :
« N Kama,
an na in do in jama kari,
hari o ma fo ɲa ?
5 Yugon yinme ya n ti i maaren yaxaren ya ni.
Yaxaren yinme xa ti i maaren yugon ya ni.
N ma ke wutu fo bure xanne maxa de,
n ma a wutu ti ŋanniyi bure xa yi mene. »
6 Alla daali a da kuyi ke yi :
« N da a tu,
nan ti an da a ɲa ti ŋanniyi siren ya yi,
ken ya saabu da ni in ga da an kaba,
ti an nan maxa kati Saaratu yi,
kuudo an nan maxa in kuta.
7 Saasa,
yugon yaqen saaga a yi,
a na duwa an da,
an na bire,
baawo,
annabinyinme ya ni. An ga ma a saagandi, an do fo wo fo gaa an maranden ŋa, axa su wa kalla. »8 A yillankara,
Habimeleexi furute na i golliɲaŋaanon su xiri,
na i kuyi ke laxami i da,
i kanu siri.
9 Ken falle,
Habimeleexi da Ibirahiima xiri nan ti a da :
« An da manne xa ɲaŋi o yi kundu ?
Nke xa da manne ɲaŋi an ŋa,
an ga da ke balaawu xoore jonkoyi in do in maranden ŋa ?
Gollu beenu ga nta xawa ɲaana,
na kun ɲaŋi in ŋa.
10 An da manne wari,
an ga da ke ɲa ? »
11 Ibirahiima ti :
« N da a sinma ti allankanne nta ke ɲiiɲe kanma yi ya fewu,
i n maxa daga in kari do in yaqen batte.
12 Tonŋun ŋa,
n maaren yaxaren ya ni.
O wa faabe yi,
xa o nta saaxe yi,
aken ɲaŋi inke da yaqe yi.
13 Bire be,
Alla ga da a ɲa,
nke ga da in faabankan wara,
n ti a da :
“ An du domindi ke yi in da :
o nda daga dingira su yi,
an nan ti an gida ya ni in ŋa. ” »
14 Ken ŋa,
Habimeleexi da tanmison do naanun do komo yugun do komo yaxarun wutu,
na i kini Ibirahiima yi,
na a yaqe Saaratu xa saaga a yi.
15 A ti a da xadi :
« N ɲiiɲen ya faayi boyini an kaane,
noqu be ga n liŋo an da,
taaxu no. »
16 A ti Saaratu da :
« N da wujune godoxulle kini an maaren yugon ŋa,
a na a kini an ŋa muso yi,
na an teleŋontaaxun koyi an teranlenman su yi,
a nan ɲa an da darontaaxu xa yi. »