Jopaye 19

Lellan muraanen biren ŋa, maliikanu ku filli ri Sodoomu na Luuti ɲi taaxunu deben ŋa. Bire be, a ga da i wari, a giri na i gemundi, nan sujudi ɲiiɲen ŋa. 2 A ti kuŋa : « N Kamannu, xa ri yanqa axa xidimandaanan noqu, axa na axa taanu wanqi nan wuyi. Ken ŋa, axa na furute do axa killen ŋa. » I ti : « Aayi, o yanqana yere ya. » 3 Luuti xoto do i ya. I lagari dagana do a batte. A da mukkunbaasu dabari i da, a do buuru lewiirintanŋe, i da i yiga.

4 I saxu waxatin gaa kiɲeene, deben yugon su ri yoori kan ŋa, na a wutu a fonnanxayen ŋa ma a yugu xaso, 5 i do a gaa me yi : « Luuti, Luuti ! Ku yugu filli be ga ri an ka ke yi wuro roye, i na minne ? I bagandi riini ! O n saxu do i batte. » 6 Luuti bogu riini katta i ya bulunŋen ŋa, na laqen texe. 7 A ti : « N maarenmu, n wa axa ɲaagana, xa maxa fo buren ɲa. 8 Saasa ke, ren yaxarin xusu filli wa in maxa, n na i bagandi katta axa yi, fo be ga n liŋo axa da, xa na a ɲa kun ŋa, xa, ku yugu filli, xa maxa fo ɲeɲi i ya, baawo i ri xaliifi in ŋa ya. » 9 I ti a da : « Giri bakka no ! » I saage tini me da : « Ke allankome mukkunman ya n ri taaxu yere, saasa a da i du ɲa kiitaana yi. » I ti Luuti da : « O wa fo ɲaana anken yinme yi, ken ga n bononta an mukkunun xallen ŋa. » Ken falle, i da a teregiɲa, ti i wa baafen xosono. 10 Ken bire, yugu ku filli da i kittun fuutu do Luuti yi, na a rondi kan noxon ŋa, na laqen texe. 11 Xa, sero beenu ga ɲi laqen ŋa, i da finkun wara i ya, nan giri i fo tugunnen ŋa, na a wara i fo xooren ŋa. I konto laqen kitta.

12 Yugu ku ti Luuti da : « Sero tana wa an maxa debe ke yi ba ? An renmun do an kallunu, maarenme su gaa an maxa debe ke yi, i su bagandi telle, 13 baawo o wa riini debe ke halaki, i jalagin gabo Tunka Duumanten maxa. A da o wara riini i halaki ken ya yi. »

14 Luuti daga katta i kallu yugun ŋa, ku beenu ga da a ren yaxarun tanman raga. A ti i da : « Xa giri axa n bogu debe ke yi, baawo Tunka Duumanten faayi debe ke halakini ya. » Luuti kallu yugu ku da a raga sangaanan ya yi.

15 Bire be fajirin ga yingi, maliikanu ku filli da a jewondi do Luuti batten ŋa nan ti a da : « Giri, an do an yaqen nan bogu, a do anku ren yaxaru filli be gaa no, i n maxa daga halaki ti deben bonontaaxun ŋa. » 16 Bire be Luuti ga sikka fonne, yugu ku filli da a raga ti kitten ŋa, a do i yaqen do i ren yaxarun filli, na i bagandi katta deben falle, Tunka Duumanten hinneyen saabu da.

17 Bire be i ga kiɲe deben falle, maliika baanen ti a da : « Ayiwa, wuru ! An na an yonkin kisi, maxa an falle faayi, maxa sigi guufurunbayanme ke dingira su yi ! Wuru dagana katta giden ŋa, kuudo an nan maxa halaki ! » 18 Luuti ti : « N Kama, n wa axa ɲaagana, n nta a mulla nan daga giden ŋa. 19 N da an neeman kita yinme du, an da an hinneyen xa koyi in ŋa nan duguta, na in yonkin kisi. Nke ra nta wurunu dagana giden ŋa, balaawun nan maxa in kita killen ŋa, n gaa kalla. 20 Ken debinlenme gaa dooke yi nan roxo, saasa ke, n wa wurunu dagana non ŋa, a n tinka wuraana da, n yonkin na kisi ke fi xoore yi. » 21 Maliika ke ti a da : « A siro, n duŋe an muurifon ŋa, an gaa do debe ke be yi, n nta balaawu yanqandini no. 22 Ken kuŋa, a jowondi kuruma, an nan wuru dagana no, baawo in ra nta fo wo fo ɲaana, an ga ma kiɲe non ŋa. » Ken ya saabu da ni debe ke toxon ga xiri Suwaara, [a wure ga ni : « fo tugunne »].

23 Kiyen gaa bakka, Luuti kiɲe Suwaara. 24 Ken falle, Tunka Duumante ya n da tinbiritin do yinben guuji Sodoomu do Hamoora kanma, gilli kanmun ŋa. 25 A da kun debu do i taaxaanon su dopa i xannun kanma, a do guufurunbayanmen do i funtifoonun su, ti yinbu ku yi. 26 Xa, Luuti yaqen da i falle faayi, a yille nan ɲa sapintunguron ŋa.

27 Ibirahiima furute dagana i do Tunka Duumanten sigitaanu ku yi. 28 A taŋe Sodoomu do Hamoora do guufurunbayanmen ŋa. A da a ɲi tiidinbinnen wa donqono kanmun ŋa.

29 Bire be, Alla gaa guufurunbayanmedunko halakini, a sinme Ibirahiima yi, ken saabu da, a gaa balaawun yanqandini Luuti deben kanma, a da Luuti bagandi.

[Luuti bonsonŋu]

30 Waxati dangi falle, Luuti kanu taaxunu Suwaara, ken ya saabu da, a do i ren yaxaru ku filli ga giri no, nan daga taaxu gidinkunmen ŋa. 31 Koota yi, ren yaxarin xooren ti fo tugunnen da : « O faaba xaso, ayiwa, yugo ntaxa jamaanen ŋa, a gaa riini katta o yi xoyi duna su laadan moxo. 32 O nta faayini, na reesendolon minindi o faaba yi, nan saxu do a batte, o na funtifo kita a da. » 33 Ken wuro su yi, i da faaben minindi, ren yaxarin fanan daga saxu do a batte. Faaben ma bogu a saxunten seeda, a ma bogu a girinten seeda.

34 A bitafilla, ren yaxarin xoore ke ti fo tugunnen da : « Wuri, nke saxu do o faaba yi. Wuro ke xadi, o na a minindi, an xa na daga saxu do a batte, o na funtifo kita a da. » 35 I da faaben minindi ken wuro xa yi, ren yaxarin tugunne ke xa daga saxu do a batte. Faaben ma bogu a saxunten seeda, a ma bogu a girinten seeda.

36 Luuti renmu ku filli su da noxo wutu a da ke moxo yi. 37 Ren yaxarin xoore ke saare ti ren yugo yi, a da a toxora Mowaaba [a wure ga ni : « n faaba soxoodi »]. Aken ya ni Mowaabagankon xooxo yi. 38 Ren yaxarin tugunne ke xa saare ti yugo yi. A da a toxora Beni-hanmi [a wure ga ni : « n xabiilan ren yugo »]. Aken ya ni Hamoonigankon xooxo yi.