[Ibirahiima do maliikanu, do Sodoomu buruxeye]
18
Tunka Duumanten bange Ibirahiima da Maamere yitti xooron kaaran ŋa.
Koota yi,
Ibirahiima gaa taaxunu i tilliisen raqen ŋa,
kinsigan waxati,
2 a da i yinmen wutu,
ma a yaaxen ga nta yugu sikki yi.
A ga da i wari,
a ɲaxali na i gemundi,
nan sujudi.
3 A ti :
« N Kama,
gelli in gaa xeeri kitana an ŋa,
maxa dangi in ŋa kundu,
na a toxo in ma darontaaxu ɲaŋi an da.
4 N na ji kini axa yi,
axa na axa taanun wanqi,
axa na tuuma ku yittu wure yi fonne.
5 N wa riini ti baasen ŋa,
axa na axa du senbendi ti a yi katta axa gaa dangini,
baawo axa na axa xidimandaanan ya noqu.
» I ti :
« A siro,
a dabari xoyi an ga da a ko moxo be. »
6 Ibirahiima da a jewondi dagana tilliisen wure katta Saaratu yi,
nan ti a da :
« A jowondi kuruma,
an na muudu sikki fari jura mullu-mulle wutu,
na a xooti,
na a dabari buurun ŋa. »
7 Ken falle,
a daga goorun ŋa kuruman do kuruma,
na gunbunlen kate raga,
na a kini yaxanbaane yi,
a na a dabari jowoye.
8 Bire be,
i su moxon ga siro,
a da xatti xayen do feenen wutu,
a do gunbunlen biyinte ke,
na i taaxu mukkunu ku wure.
I yige,
na a yinme toxo sikki do yitten ŋa,
i kaaran ŋa.
9 I ga duguta yigeyen ŋa,
i ti a da :
« An yaqe Saaratu na minne ?
» A ti i da :
« A faayi dooke,
tilliisen wure. »
10 I du baananbe yille tini :
« Danqanaaxu kanma,
n wa saagene riini katta an ŋa waaga dan ke waxati,
an yaqe Saaratu wa ren yugo kitana xa.
» Saaratu da i sefon terinka tilliisen laqen ŋa.
11 Ken da a ɲi,
Ibirahiima do Saaratu xaso na siina gabu kita.
Saaratu ma ɲi roono yaxarun laadan ŋa yinme.
12 Saaratu xosi nuxudunsoyi nan ti du da :
« Nke ɲeme falle ya ni,
n gaa riini warijaxe kita ?
N kaman yugon xa xaso ! »
13 Tunka Duumanten ti Ibirahiima da :
« Manne ni Saaratu gaa soyini,
nan ti :
“ Tonŋun ŋa,
nke wa riini saare,
n xa xaso ? ”
14 Fo ɲanŋen ra wa Tunka Duumanten kaaɲana ba ?
Waaga dan ke waxati,
n wa saagene riini katta an ŋa,
Saaratu xa wa ren yugo kitana mene. »
15 Saaratu kute nan ti :
« Nke ma soyi de !
»,
baawo a kenu.
Tunka Duumanten ti :
« Tonŋu, an soyi ! »
16 Ken falle,
yugu ku sikki giri no,
nan taŋe Sodoomu banŋe.
Ibirahiima daga i wara kille.
17 Tunka Duumanten ti du da :
« N gaa riini ke be ɲa,
n nan xawa a muxundini Ibirahiima yi ba ?
18 Na a toxo Ibirahiima,
xabiila xoora senbente ya n riini bogu a yi,
ɲiiɲen xabiilan su xa wa barekini ti a sababun ŋa,
19 n da a sugandi ya kuudo a na i bonsonŋun waaju,
a do i kan noxon seren su,
kuudo aken dangi falle,
i na Tunka Duumanten killen tanga,
na fo siren do fo teleŋonten golli,
na in sefe koninton sabatindi do Ibirahiima yi. »
20 Ken moxo yi,
Tunka Duumanten daali Ibirahiima da :
« Sodoomunkon do Hamooranko,
i jalagin gabo,
i junuubun kasafo moxo buru.
21 N wa yanqana dagana non faayi,
i gaa i jikkunun koono in da moxo be,
gelli i gaa kundun ya. »
22 Yugu ku filli jokki do Sodoomu killen ŋa,
xa Ibirahiima siginten toxo i batte,
Tunka Duumanten jon ŋa.
23 Ibirahiima tinko nan ti :
« Xoyi an wa seri sirun halakini do seri bononton batten ŋa ?
24 A ra wa ɲaana tankerege seri sire wa debe ke noxon ŋa.
Yelli an wa duŋeene debe ke su halakini ba ?
An ra nta a toqo tankerege ke seri siren da ?
25 Na seri siren do seri buren su kiiten ɲa baane yi,
na i kari do me yi.
An nan dara ken da.
Ɲiiɲen su kiitaanan nan xawa kiiten kutunu ti teleŋontaaxun ya yi,
ma kan moxo ? »
26 Tunka Duumanten ti a da :
« N ga na tankerege seri sire ɲi Sodoomu noxon ŋa,
n wa yanpana deben su maxa ti i sababun ŋa. »
27 Ibirahiima saage tini :
« An haqutoxo ya de,
N Kama !
Baawo inke feti fo,
ma doore do xobe.
28 A ra wa ɲaana tankerege ke sere,
seri siru karagi wa a kumana.
An wa duŋeene deben su halakini do kun karagi yi ba ?
» A ti a da :
« N ga na tannaxate do karago ɲi no,
n nta non halakini. »
29 A ti a da xadi :
« A ra wa ɲaana tannaxate seri sire ya n kitene no.
» Alla ti :
« N nta debe ke halakini na tannaxate seri sire toxo no. »
30 A ti :
« Kamane,
maxa butu in wure ti in tirindinde ke gaboyen ŋa de !
A ra wa ɲaana tanjikke seri sire ya na no ?
» A ti :
« N nta non halakini,
n ga na tanjikke ɲi no. »
31 A ti :
« A faayi,
nke saako nan sefe do in Kaman ŋa,
a ra wa ɲaana tanpille baane ya na no.
» A ti :
« N nta non halakini,
n ga na tanpille ɲi no. »
32 A ti :
« N Kama,
maxa butu de,
n sefene ke ta baane ya,
a ra wa ɲaana seri siru tanmi baane ya na no.
» Alla ti :
« N nta debe ke halakini,
n ga na seri siru tanmi ɲi a yi. »
33 Bire be,
Tunka Duumanten do Ibirahiima ga duguta sefen ŋa,
a daga.
Ibirahiima xa saage katta i noqun ŋa.