Jopaye 17

[Tafunden taagumanse]

Biraama wuyin gaa tankabe do siino kabi, bange a da nan ti : « Nke ya ni ŋa, an bireyen ɲa do in batte, an na ɲa seri tinmante yi. 2 N wa tafunden roono in do an naxa, na an bonsonŋen gabondi, gaboye su xenpa. » 3 Biraama sujudi ɲiiɲen ŋa.

Alla daali a da kuŋa : 4 « O naxan tafunden faayi : an wa ɲaana xabiila gabu xooxo yi. 5 An ntaxa xiriini Biraama [a wure ga ni “ faaba wuruginte ”], xa an toxon wa ɲaana Ibirahiima [a wure ga ni “ xabiila gabu faaba ”], baawo in wa an ɲaana xabiila gabu faaba yi. 6 N wa an gabondini gaboye su xenpa, na xabiila gabu bogu an ŋa, na tunkanyugun bogu an ŋa. 7 Ke tafunde wa sabatiini o naxan ŋa tafundi duumante yi, na a sabatindi in do an bonsonŋun do i yillayun su naxa, kuudo in nan ɲa Kamane yi an da, nan ɲa Kamane yi an bonsonŋun da. 8 An faayi mukkaaxun ŋa ɲiiɲe ke be kanma, Kanaana ɲiiɲe, n wa riini a kamanaaxun kini an do an bonsonŋun ŋa, kuyi duumante, nke ya n riini ɲaŋi i Kaman ŋa.

9-10 « Tafunde ke tanga, an bonsonŋun do i yillayun su na a tanga. Tafunde ke taagumansen faayi ke, an do an bonsonŋu, fo yugon su, xa nan sunne. 11 Axa sunnanden wa ɲaana tafunden taagumansen ŋa in do axa naxa. 12 Axa yillayun su yi, renyugo su ga kiɲe bito segi, an na a sunnandi. Ke taagumanse n ro yugon su yi, ke be ga saare an kan ŋa, walla ma ke be ga xobe, ma walla mukke renyugo, an yinme soxoodi ga fe, an na a ro a su yi. 13 An kan ren saaranten su, a do ke be ga xobe, tafunden taagumansen na ɲa axa faton ŋa tafundi duumante yi. 14 Xa, yugo su ga ma sunne, a wa xateene bakka i xabiilan ŋa, baawo a ma tafunden taagumansen tanga. »

15 Tunka Duumanten daali Ibirahiima da xadi : « An kaagunyaxare ke, maxa a xiri Saara yi keeta [a wure ga ni “ tunkanlenme ”], xa an wa saagene a xilli Saaratu [a wure ga ni “ n tunkanlenme ”]. 16 N wa a barekindini moxo siri, na renyugo kini an ŋa bakka a yi, xabiila gabu wa bakka a yi, tunkanyugun xa wa bakka a yi. » 17 Ibirahiima sujudi ɲiiɲen ŋa, nan soyi. A ti du da : « Yugu xase kame siine, ma yaxarin xase tankabe siine wa renme kitta harisa ? » 18 Ibirahiima ti Alla da : « An ga na Sumaayila birandi o da, na a barekindi, ken wase. » 19 Alla daali ken ya yi : « Ken fe ! An yaqe Saaratu ya n riini renyugo saara an da, an wa a toxorana Isiyaaxa. N wa tafunden sabatindini in do a naxa, a do i bonsonŋu, na a ɲa tafundi duumante yi. 20 Sumaayila be ga ni, n da an duwaawun mugu a da, n wa a barekindini, na a jiidi na a gabondi, gaboye su xenpa. Yinmanko tanmi do fillo wa bakka a yi, a wa ɲaana xabiila xoore yi. 21 Xa, n na tafunden sabatindini in do Isiyaaxa ya naxa, Saaratu gaa ke be saarana an danŋa waaga dan kundu. »

22 Bire be, Alla do Ibirahiima ga duguta sefen ŋa, a sege. 23 Ken koota baane su, Ibirahiima da i renyugo Sumaayila raga na a sunnandi, a do leminu beenu ga saare a kan ŋa, do ku beenu ga xobe. A da i kan noxon yugon su sunnandi, xoyi Alla ga da a ko a da moxo be. 24 Ibirahiima gaa sunneene, a wuyin wa tankabe do siino kabi, 25 a renyugo Sumaayila wuyin wa siino tanmi do sikko. 26 Ke moxo ya ni, Ibirahiima ga da i renyugo Sumaayila sunnandi, 27 a do yugo su ga saare a kan ŋa, a do mukkunu beenu gaa no, i ga xobe, i su sunne do a yi.