16
Ken waxati da a ɲi Biraama yaqe Saara ma saare a da.
Xa tunbaari yaxare wa Saara maxa,
Misiranke,
a toxon ni Haajara.
2 Saara ti Biraama da kuŋa :
« An da a wari Tunka Duumanten ma inke ku renme.
An ra wa taarankutiini in tunbaare ke noqu,
a me wa du,
n na renyugo kita bakka a yi.
» Biraama da i yaqe Saara feeran batu.
3 Siino tanmi falle ya ni i taaxe Kanaana yi,
Saara ga da i tunbaare Haajara wutu na a kini Biraama yi yaqe.
[Sumaayila bangeye]
4 Wurun dangi falle Biraama do Haajara naxa,
a da noxon wutu.
A ga da a tu nan ti i warijaxanten ya ni,
a kaman yaxaren fiinun saage roxoono a maxa.
5 Saara ti Biraama da :
« Toora be gaa inke kanma,
an ya toora ni.
Nke ya n da in tunbaaren kini an ŋa,
gelli a ga da i du warijaxanten wari,
nke ntaxa jaatene a maxa keeta,
xa Tunka Duumanten na kiiti in do an naxa. »
6 Biraama ti a da :
« An tunbaaren ya ni,
a na an mareyen ya yi,
fo be gaa na n liŋo an da,
ken ɲaŋi a yi.
» Saara da tooran taŋandi a yi ke ya yi,
ma Haajara ga wurunu a yi,
nan laato bakka a yi.
7 Tunka Duumanten maliikan da Haajara ɲi jinyaaxe yogo kaaran ŋa gunjura,
Suura killen ŋa.
8 A ti :
« Haajara,
Saara tunbaare,
an giri minne ?
An dagana minne ?
» A ti :
« N wurunu laatono bakka in kaman yaxare Saara ya yi. »
9 Tunka Duumanten maliikan ti a da :
« Saage katta an kaman yaxaren ŋa,
an na du maxayanqa a da.
10 N wa riini an bonsonŋun gabondi gaboye su xenpa,
i ra ga nta yirigeene gaboyen maxa.
11 An warijaxanten ya faayi kundu,
an wa saarene ti renyugo yi,
an na a toxora “ Sumaayila ” (a wure ga ni “ Alla wa a mukku ”),
baawo Tunka Duumanten da an tooran wari.
12 A wa riini ɲa balanbelen ŋa¤,
a kitten wa be su yi,
be su xa kitten wa a yi.
A wa riini taaxu i maarenmen su laatoyen ŋa. »
13 Tunka Duumanten be ga sefe Haajara da,
Haajara da a toxon xiri « Alla warindaana »,
baawo a ti :
« Tonŋun tonŋu,
xoyi inke ra wa Alla walla na in biranten toxo ? »
14 Ken ya saabu da ni,
gede ke ga toxore « Lahayi-rooyi »,
a wure ga ni « ŋalinten wallaanan gede »,
ken gaa Xadesi do Bereedi naxa.