[Alla do Biraama tafunde]
15
Ku su dangi falle,
Tunka Duumanten daalen bange Biraama da nan ti a da :
« Biraama,
maxa kanu,
nke ya ni an tangandaanan ŋa xoyi xodore.
N wa riini tugaadi xoore kini an ŋa. »
2 Biraama jaabi :
« N Kama,
Tunka Duumante,
n faayi riini faati,
renme nta in maxa,
an riini manne kini inke yi ?
Damaasinke Yelijeeri ya n riini inke kan xeyen wutu.
3 An ma bonsonŋe kini in ŋa,
n kan noxon renme yogo ya n riini in xeyen wutu. »
4 A faayi,
Tunka Duumanten daalen ri a yi nan ti :
« Ken nta an xeyen wuttu,
an yinme tikkanlenmen ya n riini an xeyen wutu. »
5 Ken falle,
a da a bagandi i tilliisen wure nan ti a da :
« Kanmu ke faayi,
an na saanu ku jaate.
Selli an ga na kati i jaatene,
an bonsonŋun riini gabo kundu ya*. »
6 Biraama toŋondi ti Tunka Duumanten ŋa,
Tunka Duumanten xa da a jaate baarinte yi*.
7 A ti a da xadi :
« Nke ya ni Tunka Duumante be ga da an bagandi Wuuri,
Kasaadinun maran ŋa,
kuudo na ke ɲiiɲe kamanaaxun kini an ŋa. »
8 Biraama ti :
« N Kama Tunka Duumante,
manne taagumanse na a koyini inke yi ti inke wa riini ke ɲiiɲe mara ? »
9 Tunka Duumanten ti a da :
« Siinosikkinnanlenme raga,
an na siinosikkinsugo raga,
na siinosikkinjaxandige raga,
na boorin xabiilanu filli raga,
na i sadaxi in da. »
10 Biraama da ku fo koninto su raga,
na baane su kara naxaanen ŋa,
na i kettun filli jonkoyi me yi,
xa a ma yeliŋu ku kara.
11 Janbanun yanqa tiyu ku kanma,
Biraama da i xata.
12 Futuron waxati,
xenqo xote da Biraama raga,
a xosi kuyi,
kanuyi xoore do biten ŋa.
13 Tunka Duumanten daali Biraama da kuŋa :
« An na a tu an bonsonŋun wa riini ɲa tuŋaaranko yi wandi jamaane yi,
i wa i ɲaana komo yi,
na i roxo kamo naxati siine haqe.
14 Xa xabiila be gaa i ɲaana komo yi,
n wa i kiitini,
ken falle,
an bonsonŋu ku do naaburu gabe wa bakka,
15 xa,
anken wa riini faati xeerin ŋa,
wuyi barekinte falle.
16 An yilleyi naxatandin ya n saagene riini yere,
baawo Hamoorikaarankon garamajigingollun ma kiɲe i xenpan ŋa fina,
n gaa i xatana bakka yere¤. »
17 Bire be,
biten ga ro moxo siri,
Alla da taxamen do tiiden do sunqun kumunten dangindi do tiyi kutunto ku naxan ŋa.
18 Ken koota yi,
Tunka Duumanten da tafunden sabatindi i do Biraama naxa nan ti :
« N wa ke ɲiiɲe kinni an bonsonŋun ŋa,
nan giri Misira fanŋe ke yi,
nan daga a wara Furaata fan xooren ŋa.
19 Noqu ke ni Xeeninun do Xenaajinun ya ɲiiɲe yi,
a do Xadamooninun
20 do Heetiganko,
kafiini Perijinun do Refaayigankon ŋa,
21 ken do Hamoorikaarankon do Kanaanaganko,
a do Girigaasikaarankon do Yebuusikaaranko. »