[Maaliki-sidiixi do Biraama]
14
Bire be,
Sinaari tunkanyugo Marafala ga ɲi fankan ŋa,
a do Laasaari tunkanyugo Hariyooxa,
a do Yelaamu tunkanyugo Kadarilamoori,
kafiini Goyimi tunkanyugo Tidaali,
2 i da Sodoomu tunkanyugo Beera gaja, a do Hamoora tunkanyugo Birisa, kafiini Hadima tunkanyugo Sinaabu, ken do Sebuyiimu tunkanyugo Semubeeri, a do Beela tunkanyugo, ken ga ni Suwaara yi. 3 Ku tunkanyugu karagi kafi me yi,
nan sarati me da Sapinxaare yi,
ken ga ni geeji be ɲexe ga nta a yi lenki.
4 Gajanŋen sababun ni :
ku tunkanyugu karagi da siino tanmi do fillo ɲa komaaxun ŋa Kadarilamoori maxa,
siina tanmu do sikkandi,
i muriti.
5 Siina tanmu do naxatandi,
Kadarilamoori do tunkanyugu beenu ga ɲi do a batte,
i da Lefaayigankon gaja Sitarooti-xarinaayimu ɲiiɲen kanma,
na Juujinun gaja Haama ɲiiɲen kanma,
na Heemigankon gaja Xiriyatiimu napon ŋa,
6 na Hoorinun gaja Seyiri gidun kanma na i su ni,
nan daga a wara ma Yeli-paraana,
gunjuran kaaran ŋa.
7 Ken falle,
tunkanyugu ku naxati saage riini katta Heeni-misipaati yi,
ken ga ni Xadesi,
na Hamaleexigankon debun su gaja nan duguta,
na Hamoorikaarankon be taaxunten gaa Hacooni-tamara ɲiiɲen kanma yi gaja na i ni.
8 Ken bire,
Sodoomu do Hamoora do Hadima do Sebuyiimu,
kafiini Beela tunkanyugo,
i bogu nan ɲa kurenkitten ŋa Sidimi napo ke yi,
9 na Yelaamu tunkanyugo Kadarilamoori gaja non ŋa,
a do Goyimi tunkanyugo Tidaali do Sinaari tunkanyugo Marafala a do Laasaari tunkanyugo Hariyooxa.
Gajanŋe ke na kun naxati do ku baanu karagi ya naxa.
10 Gedi gabu ɲi Sidimi napo ke yi,
godoronjin ya ni i ya.
Sodoomu do Hamoora tunkanyugu filli wurunten xenu i noxo,
kuttun wuru nan daga giden ŋa.
11 Ken moxo yi,
i da Sodoomu do Hamoora naaburen su wutu,
na i biraadon su wutu nan daga ti i ya.
12 I da Biraama waaxi ke renme Luuti xa raga,
nan daga ti a yi,
a do i kittidufon su,
baawo aken taaxunten ɲi Sodoomu ya yi.
13 Wuraano ku yogo ri Habaraaniganke Biraama xibaari,
a taaxunten gaa Maamere yitti xooron banŋe,
Maamere ke be ga ni Hamoori bonsonŋe yogo yi,
Hasikooli do Haneeri waaxin ga ni,
ku su do Biraama demu saratini.
14 Biraama ga da a mugu nan ti i maarenmen kittidunlege,
a da kamo sikki do kuranlenmo tanmi do segu kafu me yi i kan yugu saakon ŋa,
na tunkanyugu ku batu,
ma Daani banŋe.
15 A da i kuranlenmon taxandi,
sapa-sapa,
nan xenu xonno ku yi do wuron ŋa,
na i xoso,
na i batu dagana ma Hooba be gaa Damaasi saahelin ŋa,
16 nan saage ti i kittidufoonun su yi,
a do a maarenme Luuti do i kittidufoonun su,
kafiini yaxarun do a kaadunkon kuttu.
17 Biraama saage falle bakka Kadarilamoori gajanŋen ŋa,
a ga do a do tunkanyugu beenu su ga doome yi ni,
Sodoomu tunkanyugon bogu na a gemundi Saawe napon ŋa,
ken ga ni tunkanyugon napon ŋa.
18 Salaamu tunkanyugo Maaliki-sidiixi ya n da buurun do reesendolon bagandi.
Aken ni Alla wuruginten sadaxakiɲandaanan ya yi.
19 A duwa Biraama da nan ti :
« Alla na bareke ro Biraama yi,
Alla ke be ga ni Kaman wuruginten ŋa,
kanmun do ɲiiɲen tagandaana.
20 Bareken wa Alla da,
Alla wuruginte,
Alla ke be ga da an xonnon kini an ŋa.
»
Biraama do fo wo fo ga giri gajallan ŋa, a da a jakkan kini a yi.
21 Sodoomu tunkanyugon xa ti Biraama da :
« Sero ku kini in ŋa,
xa naabure ke,
an yinme na ken wutu. »
22 Biraama ti a da :
« N wa in kitten wuttu nan kuna ti Tunka Duumanten ŋa,
Alla wuruginte,
kanmun do ɲiiɲen tagandaana.
23 Hari toromojo ma seyinfunsi baane,
n nta a wuttu bakka a yi,
an nan maxa daga ti :
“ nke ya n da Biraama bannaaxundi. ”
24 N nta fo wo fo wuttu du da,
ganta in kuranlenmon ga da fo be yiga,
a do in do ku beenu ga sarati :
Haneeri do Hasikooli,
a do Maamere,
kun xa wa i taqen wuttu. »