13
Biraama do i kiteyen su,
kafiini a yaqe Saara,
a do Luuti,
i girindindi bakka Misira yi,
nan taŋe Negeba.
2 Biraama ni naaburu siginten do kanŋen do goden bannan ya yi.
3 A fonne fonnen daga,
nan giri Negeba,
nan daga ma Beeti-yeli do Haayi naxan ŋa,
a tilliisen ga ɲi noqu be.
4 Ken ni noqu ke be Biraama ga da sadaxindinoqun sigindi non ŋa ya ta fana, a xirindi ti Tunka Duumanten ŋa no.[Biraama do Luuti fateye]
5 Luuti xa gaa do Biraama batte ke yi,
nan do tanmisen wa a xa maxa,
a do tilliisu.
6 I naaburen nan gaba toxodoome danŋa,
baawo sokken ma ɲi i bakka.
7 Gajanŋe yogo xa ro Biraama nagaanaanon do Luuti nagaanaanon naxa,
ke su kanma,
Kanaanagankon do Perijinun xa taaxunten wa ɲiiɲe ke kanma.
8 Ken ya ga ni,
Biraama ti Luuti da :
« N lenme,
haqu toxo !
Laxadun gajanŋen nta siro inke do anken naxa,
a nta siro o nagaanaanon naxa,
baawo o ya ni baane.
9 Ɲiiɲen su faayi an wure,
an ra wa booxene bakka in ŋa,
an ga na daga tayen ŋa,
nke na daga noogen ŋa,
an ga na daga noogen ŋa,
nke na daga tayen ŋa. »
10 Luuti da i yinmen wutu nan faayindi,
a da a wari Yarade guufurunbayanmen su xayen ya ni,
nan daga a wara ma Suwaara yi,
ken da a ɲi Tunka Duumanten ma Sodoomu do Hamoora kara¤. Fanlaqu ku ɲi xoyi Tunka Duumanten naaxon do Misira jamaanen moxon ya yi. 11 Luuti da Yarade guufurunbayanme ke sugandi,
nan daga katta kinbakkan ŋa.
Biraama do Luuti fate bakka me yi kundu ya yi.
12 Biraama toxo Kanaana jamaanen ŋa,
Luuti daga taaxu do guufurunbayanmen debun ŋa,
na i tilliisun banba Sodoomu banŋe.
13 Sodoomunko ni allankutaanon ya yi,
i wa Tunka Duumanten kutana ti i golli buru gabe yi.
14 Luuti do Biraama fate falle bakka me yi,
Tunka Duumanten daali Biraama da :
« An yinmen wutu,
an nan faayindi gelli an sigira ke yi,
katta saahelin do banboxun ŋa,
a do kinbakkan do kinxenna,
15 baawo an yaaxen gaa ke jamaane be yi,
n wa a su kinni an ŋa,
na a kini an bonsonŋun ŋa abada.
16 N wa riini an bonsonŋun gabondi xoyi seyijuran moxo,
sere be nda kati seyijuran yirigana,
an na kati i xa yirigana.
17 Giri Biraama !
An na jamaane ke su tera,
baawo in riini a kini an ya yi. »
18 Ken ga ɲa,
Biraama da i tilliisun gana katta Maamere yitti xooron banŋe,
Heburoona kaaran ŋa,
nan taaxu no.
A da sadaxindinoqu taga Tunka Duumanten da non ŋa.