[Biraama forogoyu]
12
Tunka Duumanten daali Biraama da :
« Giri an jamaanen ŋa,
an na an koren toxo,
an nan bogu an faabankan ŋa,
an nan daga jamaane be in gaa a koyini an ŋa.
2 N wa riini jama xoore bogu an ŋa,
na bareke ro an ŋa,
na an toxon wurugi,
na an ɲa bareken fonlaqen ŋa.
3 N wa sere barekindini,
sere be ga duwa an da,
na sere langa,
sere be ga da an langa,
na ɲiiɲen xabiilanun su barekindi ti an sababun ŋa. »
4 Biraama daga,
xoyi Tunka Duumanten ga da a ko a da moxo be.
Luuti xa daga do a batte.
Biraama ga ɲi bakka Haraana,
a wuyin wa tanɲere do siino karagi.
5 A da i kaagunyaxare Saara wutu,
do i waaxin ren yugo Luuti,
i do naaburu,
do komo beenu ga ɲi i maxa Haraana.
I bogu nan daga Kanaana ɲiiɲen ŋa.
6 Biraama da jamaanen kutu nan daga Sixemu,
katta Moore yitti xooren noqu.
Ken waxati,
Kanaanagankon ɲi ken jamaane yi.
7 Tunka Duumanten bange Biraama da,
nan ti :
« N riini ke jamaane kini an bonsonŋun ya yi.
» Biraama da sadaxindinoqun taga Tunka Duumanten da, ken be ga bange a da non ŋa. 8 Ken falle,
a yille bakka no,
nan daga giden ŋa Beeti-yeli kinbakka.
A da i tilliisen banba Beeti-yeli do Haayi naxa.
Beeti-yeli wa kinxennan ŋa,
Haayi wa kinbakkan ŋa.
Non xa yi,
a da sadaxindinoqun taga Tunka Duumanten da,
nan xirindi ti Alla toxo,
Tunka Duumante.
9 A fonne fonnen daga katta Negeba yi,
Kanaana banboxun ŋa.
10 Dullen ro jamaanen ŋa.
Biraama yanqa katta Misira yi,
kuudo nan taaxu no,
baawo,
dulle ke xoto jamaanen ŋa.
11 Bire be i ga tinko Misira yi,
a ti i yaqe Saara da :
« An da a wari de,
an wariyun ga n faranpara moxo be,
12 Misirankon ga na an wari,
i tini in yaqen ya na an ŋa,
i wa in karini,
na an toxo bireene.
13 Ken kuŋa,
an na a ti in maarenmen ya ni an ŋa,
ma in na xeeri kita do an batten ŋa.
N yonkin xa na kisi ti an ŋa. »
14 Bire be Biraama ga kiɲe Misira yi,
Misirankon da a wari a yaqen faranparen ni moxo siri.
15 Misira tunkanyugon¤ golliɲaŋaanon yinmankon xa da a wari, na a maxankutu tunkanyugon da. Ken ŋa, i do Saara daga tunkanyugo ke noqu. 16 A da Biraama daro ti Saara sababun ŋa,
na xeerin ɲa a da,
na tanmison kini a yi,
a do naanun do farun do komo yugun do komo yaxarun do fari yaxarun do ɲogomo.
17 Xa,
Tunka Duumanten da watti xoto wara tunkanyugo ke do i kan ŋa,
do Saara batte,
Biraama kaagunyaxare ke.
18 Ken ŋa,
tunkanyugo ke da Biraama xiri nan ti a da :
« An da manne xa ɲaŋi in ŋa kundu ?
Manne an ga ma ti an yaqen ya ni ?
19 Manne an ga ti in da an maaren yaxaren ya ni,
ma in gaa a wuttu yaqe yi ?
Saasa ke,
an yaqen faayi,
a raga an nan daga. »
20 Tunkanyugo ke da sero saxu a kanma,
nan daga a do i yaqen wara kille,
a do fo wo fo gaa a maxa.