[Baabila taaxe]
11
Waxati dangi,
ɲiiɲe ke su ɲi xan baane ya koono,
sefe kitti baane.
2 Koota yogo,
seron forogonto gilli kinbakkan ŋa,
i da beran xullu xoore wari Sinaari ɲiiɲen ŋa,
i xosi taaxu no.
3 I ti me da :
« O na tuufan katu na a biyi.
» Ken ŋa,
tuufan da gidinsigiran siro i da,
godoronjin da doorinsigiran siro i da.
4 Ken falle,
i ti :
« O na duudandebe taga,
na soororo gille sigindi a yi,
a tonben gaa kiɲene kanmun ŋa.
Ken ŋa,
o na ɲa toxonto yi,
kuudo o n maxa sanqi do ɲiiɲen kaaran su yi. »
5 Fi falle,
Tunka Duumanten yanqa bakka kanmun ŋa,
nan ri debe ke faayi,
a do soorono gille ke be haadamarenmun ga da a taga.
6 A ti du da :
« Ku faayi ga kafi me yi nan ɲa jama baane,
i wa xan baane koono,
ke faayi i gollen joŋaarun ya yi.
Saasa,
fo wo fo ra ntaxa i kaaɲana i golle danbe su ɲanŋen ŋa.
7 Ken ŋa o n yanqa,
o na i xanne ke ɲaxami,
kuudo i n kori me faamunu. »
8 Ken noxo du,
Tunka Duumanten da i sanqi bakka non ŋa do ɲiiɲen kaaran su yi,
ken ga ɲa,
i tuuma debe ke taganden ŋa.
9 Ke ya saabu da,
debe ke gaa xiriini Baabila,
[a wure ga ni :
« ɲaxami »],
baawo Tunka Duumanten da haadamarenmen xannen ɲaxami non ya yi.
Non ya ni xadi,
a ga da i sanqi do ɲiiɲen kaaron su yi.
[Annabi Ibirahiima xibaare]
(Soora 11.10-25.18)
[Saami bonsonŋu]
10 Saami kaadunkon taarexun faayi :
tuufaanan dangi falle ti siino filli,
na Saami wuyin toxo kame siine,
a da Harifaxisaadi saara.
11 Ken falle,
Saami da kamo karagi siine bire,
a da renmu tana kita.
12 Bire be,
Harifaxisaadi wuyin ga kiɲe tanjikke do siino karagi,
a da Seela saara.
13 Ken falle,
a da kamo naxati do siino sikki bire,
a da renmu tana kita.
14 Bire be,
Seela wuyin ga kiɲe tanjikke siine,
a da Hebeeri saara.
15 Ken falle,
a da kamo naxati do siino sikki bire,
a da renmu tana kita.
16 Bire be,
Hebeeri wuyin ga kiɲe tanjikke do siino naxati,
a da Pelege saara.
17 Ken falle,
a da kamo naxati do tanjikke siine bire,
a da renmu tana kita.
18 Bire be,
Pelege wuyin ga kiɲe tanjikke siine,
a da Reewu saara.
19 Ken falle,
a da kamo filli do siino kabi bire,
a da renmu tana kita.
20 Bire be,
Reewu wuyin ga kiɲe tanjikke do siino filli,
a da Seeruga saara.
21 Ken falle,
a da kamo filli do siino ɲeri bire,
a da renmu tana kita.
22 Bire be,
Seeruga wuyin ga kiɲe tanjikke siine,
a da Nahooro saara.
23 Ken falle,
a da kamo filli siine bire,
a da renmu tana kita.
24 Nahooro wuyin ga kiɲe tanpille do siino kabi,
a da Teera saara.
25 Ken falle,
a da kame do siino tanmi do kabu bire,
a da renmu tana kita.
26 Teera wuyin ga kiɲe tanɲere siine,
a da Biraama do Nahooro do Haaraani saara.
27 Teera kaadunkon taarexun faayi :
Teera da Biraama do Nahooro do Haaraani saara,
Haaraani da Luuti saara.
28 Haaraani faati i faaba Teera kaane,
na a toxo i saaredeben ŋa Wuuri,
ken gaa Kasaadinun maran ŋa.
29 Biraama do Nahooro yaxarinwuti.
Biraama yaqen toxon ni Saara,
Nahooro yaqen toxon ni Milika,
Yisika waaxi,
Haaraani ren yaxaren ya ni.
30 Saara ɲa boroke yi,
renme ma ɲi a maxa.
31 Teera forogo gilli Wuuri yi,
Kasaadinun maran ŋa,
a do i kaadunko :
a ren yugo Biraama,
a do Haaraani ren yugo Luuti,
ken ga na a ken kisimaren ŋa,
a do a kallu yaxare Saara,
Biraama yaqe ke,
kuudo i nan daga Kanaana jamaanen ŋa.
I ga kiɲe Haraana,
i taaxu non ŋa.
32 Teera da kamo filli do siino karagi bire,
ken falle,
a faati Haraana yi.