[Alla laayidu Nuuha da]
9
Alla da bareke ro Nuuha do i renyugu ku yi,
nan ti i da :
« Xa jiidi,
axa nan gabo,
na ɲiiɲen kanma faga.
2 Ɲiiɲen daabanun su nan xaaye axa da,
nan kanu axa yi.
Kanmun yeliŋun do daaba su gaa dillene ɲiiɲen kanma,
do jin ɲexon su,
i ware axa da.
3 Fo yonkinten su,
n da a kini axa yi biraado yi,
xoyi funtifoonun moxo*,
n da i su wara axa da.
4 Waxati su,
axa ga na ɲi tiyen yigana,
a nan ɲi yonkin ga bogu a yi,
ken ga ni foren ŋa.
5 Axa bireyen jonginten na axa foren ya yi.
Ken saabu da,
n wa axa foren tanbon tugana.
N wa a tanbon tugana daaban do haadamarenmen su yi.
Sere be nda sere foren joxi,
a tanbon wa tugeene a me yi.
6 Sere be nda haadamarenme foren joxi,
haadamarenme ya na an xa foren joqo,
baawo haadamarenmen tage Alla sawuran ya yi.
7 Axakun beenu ga ni,
axa nan jiidi,
axa nan gabo,
nan sanqi ɲiiɲen kanma. »
8 Ken bire,
Alla daali Nuuha do i renyugu ku da :
9 « Nke Alla,
n wa tafunden roono in do axa naxa,
a do axa bonsonŋu beenu gaa riini axa falle,
10 a do tagefo yonkinte su gaa do an batte :
yeliŋu,
kaaduganko,
gunduganko,
a do fo wo fo ga bogu do axa batten ŋa fuure ke noxo,
a do ɲiiɲen kanma fo yonkinten su.
11 N wa tafunden roono in do axa naxa,
n ntaxa tagefo yonkinten su buruxana ti tuufaana ŋaamen ŋa keeta.
Tuufaana ntaxa riini na ɲiiɲen halaki.
12 « Tafunde ke taagumansen faayi,
n gaa ke be sabatindini in do axa naxa,
do fo yonkinte su gaa do axa batte,
do axa bonsonŋu beenu gaa riini falle :
13 n da in jaagubundanŋen ro tabullen noxon ŋa,
ma a na ɲa tafunde ke taagumansen ŋa,
n do ɲiiɲen naxa.
14 Bire be in ga na tabullun kafu me yi ɲiiɲen kanma,
bundanŋe ke ga bange tabullen ŋa,
15 ken ŋa in wa sinmene in do axa tafunden ŋa,
kafiini fo yonkinten su yi,
ferigankon su :
jin ntaxa ɲaana tuufaana yi,
na tagefoonun su buruxa.
16 Bundanŋe ke ga na bange tabullen ŋa,
n wa a faayini,
ma a na in haqilen yanqandi in do ɲiiɲen fo yonkinton tafundi duumanten ŋa,
a do ferigankon su.
17 « Ke ya ni tafunde ke taagumansen ŋa,
n do ɲiiɲen tagefo yonkinten su naxa. »
[Nuuha renmu]
18 Nuuha renmu beenu ga bogu fuuren ŋa,
i toxonun faayi ku :
Saami,
Haami,
a do Yaafesi.
Haami ni Kanaana faaba ya.
19 Nuuha do ku renmu sikki ya n da ɲiiɲen kanma faga.
20 Nuuha joŋa soxono ya.
A da reesetinŋe yogo lori.
21 Koota yogo,
a da reesendolon mini nan mande,
ma a gaa i yiraamun walla tilliisen wure.
22 Haami,
ken ga ni Kanaana faaba yi,
a da i faaba lawuran wari¤,
a bogu na a laxami i waaxinun da.
23 Saami do Yaafesi,
kun da yiraamen wutu na a saxu i kunkun ŋa,
nan fallanbogu telle yiraamen xufu i faaba lawuran ŋa.
I da i yaaxon xiti,
kuudo i nan maxa a lawura ke wari.
24 Bire be Nuuha haqilen ga ri,
a renyugu tugunne ke ga da ke be ɲa,
a da a mugu.
25 Ken ga ɲa,
a da a langa nan ti :
« Hari na Kanaana halaki !
Hari na a ɲa i waaxinu ku da komo fallanke yi. »
26 Ken falle,
a ti xadi :
« Tiigeyen wa Alla da,
ken ga ni Tunka Duumanten ŋa,
Saami Alla.
Yaarabi,
Kanaana nan ɲa kome yi Saami da.
27 Yelli Alla gan na wasaye ɲa Yaafesi da,
a nan taaxu Saami tilliisen wure,
na Kanaana ɲaŋi i da kome yi ! »